കർഷകരുടെ പരമ്പരാഗത അറിവിനെ ശാസ്ത്രവും വിപണിയുമായി ബന്ധിപ്പിക്കണമെന്ന് പി. കെ. മിശ്ര

ന്യൂഡൽഹി  / 2026 /  നവംബർ 12 

ഇന്ത്യയുടെ കാർഷിക ജൈവവൈവിധ്യം സംരക്ഷിക്കുകയും അതിൽ പുതുമകൾ കൊണ്ടുവരികയും ചെയ്യുന്നവരായി കർഷകരെ അംഗീകരിക്കണമെന്ന് പ്രധാനമന്ത്രിയുടെ പ്രിൻസിപ്പൽ സെക്രട്ടറി ഡോ. പി. കെ. മിശ്ര പറഞ്ഞു. അവരുടെ പരമ്പരാഗത അറിവിനെ ശാസ്ത്രീയ ഗവേഷണം, വിത്തുവിതരണ സംവിധാനങ്ങൾ, വിപണിയിലെ അവസരങ്ങൾ എന്നിവയുമായി ബന്ധിപ്പിക്കണമെന്നും അദ്ദേഹം ആവശ്യപ്പെട്ടു. സസ്യ ഇനങ്ങളുടെയും കർഷക അവകാശങ്ങളുടെയും സംരക്ഷണ അതോറിറ്റിയുടെ ഇരുപത്തിരണ്ടാം സ്ഥാപകദിനത്തിലും പ്ലാന്റ് ജീനോം സേവിയർ പുരസ്കാരദാനച്ചടങ്ങിലും നവംബർ പന്ത്രണ്ടിന് സംസാരിക്കുകയായിരുന്നു അദ്ദേഹം.

സസ്യ ഇനങ്ങളുടെയും കർഷക അവകാശങ്ങളുടെയും സംരക്ഷണത്തിനായി 2001ൽ കൊണ്ടുവന്ന നിയമം ഇരുപത്തിയഞ്ച് വർഷം പൂർത്തിയാക്കുന്ന വേളയിലാണ് ചടങ്ങ് നടക്കുന്നതെന്നും മിശ്ര ചൂണ്ടിക്കാട്ടി. കാലാവസ്ഥാമാറ്റം, ജലക്ഷാമം, കീടങ്ങൾ, രോഗങ്ങൾ എന്നിവയെ ചെറുക്കുന്ന വിളകൾ വികസിപ്പിക്കാൻ ഇന്ത്യയുടെ സമ്പന്നമായ കാർഷിക ജൈവവൈവിധ്യം നിർണായകമാണെന്ന് അദ്ദേഹം പറഞ്ഞു. പരമ്പരാഗത അറിവും ഭക്ഷണസംസ്കാരങ്ങളും സമൂഹങ്ങളുടെ ഉപജീവനമാർഗങ്ങളും സംരക്ഷിക്കുന്നതിലും ഇതിന് വലിയ പങ്കുണ്ട്.

നാടൻ ഇനങ്ങളുടെ സംരക്ഷണത്തിന് ന്യായമായ പ്രതിഫലം

ഇന്ത്യയിലെ ഇരുപത്തിരണ്ട് കാർഷിക ജൈവവൈവിധ്യ കേന്ദ്രങ്ങളെക്കുറിച്ച് മിശ്ര പരാമർശിച്ചു. സമൂഹങ്ങളുടെ നേതൃത്വത്തിൽ നടക്കുന്ന സംരക്ഷണത്തിന് ഉദാഹരണമായി ഒഡീഷയിലെ കോരാപുട്ടിനെ അദ്ദേഹം ചൂണ്ടിക്കാട്ടി. ഐക്യരാഷ്ട്രസഭയുടെ ഭക്ഷ്യ-കാർഷിക സംഘടന 2012ൽ കോരാപുട്ടിനെ ആഗോള പ്രാധാന്യമുള്ള കാർഷിക പൈതൃക സംവിധാനമായി അംഗീകരിച്ചിരുന്നു.

പുതിയ സസ്യ ഇനങ്ങൾ വികസിപ്പിക്കുന്നവരുടെ അവകാശങ്ങൾ സംരക്ഷിക്കുന്നതിനൊപ്പം കർഷകരെ സസ്യ ഇനങ്ങളുടെ സംരക്ഷകരായും കൃഷിക്കാരായും വികസിപ്പിക്കുന്നവരായും അംഗീകരിക്കുന്നതാണ് ഇന്ത്യയുടെ നിയമത്തിന്റെ പ്രത്യേകതയെന്ന് അദ്ദേഹം പറഞ്ഞു. അതോറിറ്റിയിൽ രജിസ്റ്റർ ചെയ്ത ഇനങ്ങളിൽ പകുതിയോളം കർഷകരുടെ ഇനങ്ങളാണ്. ജനിതക വിഭവങ്ങൾ സംരക്ഷിക്കുന്ന സമൂഹങ്ങൾക്ക് ന്യായമായ പ്രതിഫലം ഉറപ്പാക്കുന്നതിൽ ആനുകൂല്യങ്ങൾ പങ്കിടാനുള്ള വ്യവസ്ഥകൾക്കും ദേശീയ ജീൻ നിധിക്കും പ്രധാന പങ്കുണ്ടെന്നും അദ്ദേഹം വ്യക്തമാക്കി.

മൂവായിരത്തോളം കാലാവസ്ഥാ പ്രതിരോധശേഷിയുള്ള വിളയിനങ്ങൾ

ഇന്ത്യൻ കാർഷിക ഗവേഷണ കൗൺസിലിന് കീഴിലെ നാഷണൽ ബ്യൂറോ ഓഫ് പ്ലാന്റ് ജനറ്റിക് റിസോഴ്സസിലുള്ള ദേശീയ ജീൻ ബാങ്ക് ലോകത്തിലെ രണ്ടാമത്തെ വലിയ ജീൻ ബാങ്കാണെന്ന് മിശ്ര പറഞ്ഞു. ദേശീയ കാർഷിക ഗവേഷണ സംവിധാനത്തിന് കീഴിൽ കാലാവസ്ഥയെ പ്രതിരോധിക്കാൻ ശേഷിയുള്ള മൂവായിരത്തോളം വിളയിനങ്ങൾ വികസിപ്പിച്ചിട്ടുണ്ടെന്നും അദ്ദേഹം അറിയിച്ചു. സവിശേഷമായ കാർഷിക ഉൽപ്പന്നങ്ങൾക്ക് സാമ്പത്തിക അവസരങ്ങൾ തുറന്നുകൊടുക്കാൻ ഭൗമസൂചിക പദവിക്ക് കഴിയുമെന്നും അദ്ദേഹം ചൂണ്ടിക്കാട്ടി.

കർഷക അവകാശങ്ങൾക്കായുള്ള അന്താരാഷ്ട്ര ശ്രമങ്ങളിൽ ഇന്ത്യ നൽകുന്ന സംഭാവനകളും മിശ്ര വിശദീകരിച്ചു. ഭക്ഷണത്തിനും കൃഷിക്കുമുള്ള സസ്യജനിതക വിഭവങ്ങളെക്കുറിച്ചുള്ള അന്താരാഷ്ട്ര ഉടമ്പടിയിലെ ഇന്ത്യയുടെ പങ്കാളിത്തം, 2022ൽ ന്യൂഡൽഹിയിൽ നടന്ന ഭരണസമിതി സമ്മേളനം, 2023ലെ കർഷക അവകാശങ്ങളെക്കുറിച്ചുള്ള ആഗോള സമ്മേളനം എന്നിവ അദ്ദേഹം പരാമർശിച്ചു. ബ്രിക്സ് കൃഷിമന്ത്രിമാർ അംഗീകരിച്ച ഇൻഡോർ പ്രഖ്യാപനവും വിത്തുസംവിധാനങ്ങളിലെ കർഷക അവകാശങ്ങൾക്കായി ആഗോള വേദി രൂപവത്കരിച്ചതും അദ്ദേഹം എടുത്തുപറഞ്ഞു.

അംഗീകാരത്തിനൊപ്പം സാമ്പത്തിക അവസരങ്ങളും വേണം

കർഷകർക്ക് അംഗീകാരം നൽകുന്നതിൽനിന്ന് അവരെ കൂടുതൽ കരുത്തരാക്കുന്നതിലേക്ക് പ്രവർത്തനങ്ങൾ മാറണമെന്ന് മിശ്ര ആവശ്യപ്പെട്ടു. സമൂഹ വിത്തുബാങ്കുകളും കൃഷിയിടങ്ങളിൽ സസ്യങ്ങളെ വളർത്തി സംരക്ഷിക്കുന്ന ജീൻ ബാങ്കുകളും ശക്തിപ്പെടുത്തണം. പരമ്പരാഗത അറിവിനെ ആധുനിക ശാസ്ത്രീയ ഗവേഷണവുമായി ബന്ധിപ്പിക്കണം. കർഷകരുടെ വിളയിനങ്ങളെ ഗുണമേന്മയുള്ള വിത്തുസംവിധാനങ്ങൾ, കർഷക ഉൽപ്പാദക സംഘടനകൾ, വിപുലമായ വിപണികൾ എന്നിവയുമായി ബന്ധിപ്പിക്കണമെന്നും അദ്ദേഹം പറഞ്ഞു.

കർഷകരുടെ സംരംഭകത്വം പ്രോത്സാഹിപ്പിക്കണം. ആനുകൂല്യങ്ങൾ ന്യായമായും സുതാര്യമായും പങ്കിടുന്നുവെന്ന് ഉറപ്പാക്കണം. അങ്ങനെ ജൈവവൈവിധ്യ സംരക്ഷണം കർഷകർക്ക് നിലനിൽക്കുന്ന സാമ്പത്തിക അവസരങ്ങളായി മാറണമെന്നും അദ്ദേഹം ആവശ്യപ്പെട്ടു.

ഒരു പുരസ്കാരത്തിനപ്പുറം ഓരോ സീസണിലും വരുമാനം ഉറപ്പാക്കണം

ഇന്ത്യയുടെ കാർഷികമേഖലയിലെ മാറ്റങ്ങളിൽ പങ്കെടുക്കുന്നവരായി മാത്രം കർഷകരെ കാണരുതെന്ന് മിശ്ര പറഞ്ഞു. ആ മാറ്റങ്ങൾക്ക് സംഭാവന നൽകുന്നവരും അതിന്റെ ഗുണഫലങ്ങൾ ലഭിക്കേണ്ടവരുമായും അവരെ അംഗീകരിക്കണം. പരമ്പരാഗത ഇനങ്ങൾ സംരക്ഷിക്കുന്ന കർഷകർക്ക് തുടർച്ചയായ സാമ്പത്തിക നേട്ടം ലഭിക്കേണ്ടതുണ്ടെന്നും അദ്ദേഹം വ്യക്തമാക്കി.

“ഒരു പുരസ്കാരം കർഷകനെ ഒരിക്കൽ ആദരിക്കുന്നു. എന്നാൽ വിത്തുവിതരണ ശൃംഖലയും വിപണിയും ആനുകൂല്യങ്ങളിലെ ന്യായമായ വിഹിതവും ഓരോ കൃഷിക്കാലത്തും കർഷകന് താങ്ങാകുന്നു” എന്ന് അദ്ദേഹം പറഞ്ഞു. കാർഷിക വൈവിധ്യം സംരക്ഷിക്കുക എന്നത് കർഷകർ, ശാസ്ത്രജ്ഞർ, സർവകലാശാലകൾ, വ്യവസായമേഖല, ഭരണകൂടം, സമൂഹം എന്നിവരുടെ കൂട്ടുത്തരവാദിത്വമാണെന്നും അദ്ദേഹം വ്യക്തമാക്കി. അതോറിറ്റിയെയും എല്ലാ പുരസ്കാരജേതാക്കളെയും അഭിനന്ദിച്ചാണ് അദ്ദേഹം പ്രസംഗം അവസാനിപ്പിച്ചത്.