ന്യൂഡൽഹി  / 2026  / നവംബർ 02

യുവതലമുറയെ, പ്രത്യേകിച്ച് ജെൻ സിയെ, സ്വദേശി പ്രസ്ഥാനവുമായി ബന്ധിപ്പിക്കാൻ ന്യൂഡൽഹിയിലെ കൊണാട്ട് പ്ലേസിൽ ഖാദി ദീപാവലി ഫെസ്റ്റ് 2026 സംഘടിപ്പിച്ചു. ഒക്ടോബർ 31ന് ആരംഭിച്ച മേള ഖാദി ഗ്രാമവ്യവസായ കമ്മീഷൻ അധ്യക്ഷൻ മനോജ് ഗോയൽ ഉദ്ഘാടനം ചെയ്തു. റീഗൽ സിനിമയ്ക്ക് എതിർവശത്തുള്ള എൻഡിഎംസി പാലിക പാർക്കിലാണ് പരിപാടി. പ്രധാനമന്ത്രി നരേന്ദ്ര മോദിയുടെ ‘ഹർ ഘർ സ്വദേശി, ഘർ ഘർ സ്വദേശി’ എന്ന ആഹ്വാനം ജനങ്ങളിലെത്തിക്കുകയാണ് ലക്ഷ്യം.

‘ഖാദി വാലി ദീപാവലി’ എന്ന പ്രമേയത്തിലുള്ള പരിപാടിയിൽ മാധ്യമപ്രവർത്തകരുമായുള്ള പ്രത്യേക സംവാദവും ദീപാവലി സൗഹൃദസംഗമവും നടന്നു. മനോജ് ഗോയൽ മുഖ്യാതിഥിയായി പങ്കെടുത്തു. ദീപാവലിയിലും മറ്റ് ഉത്സവങ്ങളിലും ഖാദിയും സ്വദേശി ഉൽപ്പന്നങ്ങളും ഉപയോഗിക്കാൻ ജനങ്ങളെ പ്രേരിപ്പിക്കുക, ഇന്ത്യൻ കരകൗശല തൊഴിലാളികളുടെയും ഗ്രാമീണ സംരംഭകരുടെയും ഉൽപ്പന്നങ്ങൾക്ക് കൂടുതൽ അംഗീകാരം നേടിക്കൊടുക്കുക എന്നിവയും മേളയുടെ ലക്ഷ്യങ്ങളാണ്. ഓരോ വീട്ടിലും സ്വദേശി ഉൽപ്പന്നങ്ങൾ എത്തിക്കുക, പ്രാദേശിക ഉൽപ്പന്നങ്ങൾക്ക് പിന്തുണ നൽകുക, സ്വയംപര്യാപ്ത ഇന്ത്യ കെട്ടിപ്പടുക്കുക എന്നീ പ്രധാനമന്ത്രിയുടെ ആശയങ്ങളും പരിപാടി മുന്നോട്ടുവയ്ക്കുന്നു.

ഖാദി തുണി മാത്രമല്ല, സ്വയംപര്യാപ്തതയുടെ അടയാളം

രാഷ്ട്രപിതാവ് മഹാത്മാഗാന്ധി ഖാദിയെ വെറുമൊരു തുണിയായല്ല കണ്ടതെന്ന് മനോജ് ഗോയൽ പറഞ്ഞു. സ്വയംപര്യാപ്തതയുടെയും ആത്മാഭിമാനത്തിന്റെയും സാമ്പത്തിക സ്വാതന്ത്ര്യത്തിന്റെയും പ്രതീകമായിരുന്നു ഗാന്ധിജിക്ക് ഖാദി. പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ ഖാദി, സ്വദേശി പ്രസ്ഥാനങ്ങൾക്ക് പുതിയ ഉണർവും വിപുലമായ ജനപങ്കാളിത്തവും ലഭിച്ചെന്നും അദ്ദേഹം അഭിപ്രായപ്പെട്ടു.

‘ഹർ ഘർ സ്വദേശി, ഘർ ഘർ സ്വദേശി’ എന്ന ആഹ്വാനം സ്വദേശി സാധനങ്ങൾ വാങ്ങുന്നതിൽ മാത്രം ഒതുങ്ങുന്നതല്ല. ഇന്ത്യൻ ഉൽപ്പന്നങ്ങളിൽ അഭിമാനം വളർത്താനും പ്രാദേശിക ഉൽപ്പാദകരെ പ്രോത്സാഹിപ്പിക്കാനും രാജ്യത്തിന്റെ സാമ്പത്തിക സ്വയംപര്യാപ്തത ശക്തിപ്പെടുത്താനുമുള്ള വിപുലമായ പ്രചാരണമാണത്. ഉത്സവകാലത്ത് ഖാദിയും സ്വദേശിയും പ്രാദേശികവുമായ ഉൽപ്പന്നങ്ങൾ വാങ്ങുന്നത് പ്രധാനമന്ത്രിയുടെ ആത്മനിർഭർ ഭാരത് എന്ന കാഴ്ചപ്പാടിന് കരുത്തേകുമെന്നും ഗോയൽ പറഞ്ഞു.

ഉത്സവകാലത്തെ വാങ്ങലുകൾ തൊഴിലാളികളുടെ വീടുകളിലും സന്തോഷമെത്തിക്കും

ഇന്ത്യൻ സമ്പദ്‌വ്യവസ്ഥയ്ക്കും പ്രാദേശിക വിപണികൾക്കും കരകൗശല തൊഴിലാളികൾക്കും ഉത്സവകാലം ഏറെ പ്രധാനമാണെന്ന് ഗോയൽ ചൂണ്ടിക്കാട്ടി. ഓരോ കുടുംബവും ഉത്സവകാലത്ത് ഖാദിക്കും മറ്റ് സ്വദേശി ഉൽപ്പന്നങ്ങൾക്കും മുൻഗണന നൽകിയാൽ അതിന്റെ നേരിട്ടുള്ള പ്രയോജനം രാജ്യത്തെ ദശലക്ഷക്കണക്കിന് കരകൗശല തൊഴിലാളികൾക്കും നെയ്ത്തുകാർക്കും ഗ്രാമീണ സംരംഭകർക്കും അവരുടെ കുടുംബങ്ങൾക്കും ലഭിക്കും.

സ്വദേശി ഉൽപ്പന്നങ്ങൾ വാങ്ങുന്നത് ഉപഭോക്താവിന്റെ ഒരു തിരഞ്ഞെടുപ്പ് മാത്രമല്ല. രാജ്യത്തിന്റെ സമ്പദ്‌വ്യവസ്ഥയും പ്രാദേശിക തൊഴിലവസരങ്ങളും ശക്തിപ്പെടുത്തുന്നതിൽ പൗരന്മാർ നൽകുന്ന പ്രധാന സംഭാവന കൂടിയാണിത്. മേളയിൽ ഖാദി ഉൽപ്പന്നങ്ങൾക്ക് 20 ശതമാനവും ഗ്രാമവ്യവസായ ഉൽപ്പന്നങ്ങൾക്ക് 10 ശതമാനവും പ്രത്യേക വിലക്കിഴിവുണ്ട്. ഈ ദീപാവലിക്ക് വീടുകളിൽ വിളക്ക് തെളിക്കുന്നതിനൊപ്പം ഖാദിയും സ്വദേശി ഉൽപ്പന്നങ്ങളും സ്വീകരിച്ച് ദശലക്ഷക്കണക്കിന് കരകൗശല തൊഴിലാളികളുടെയും ഗ്രാമീണ കുടുംബങ്ങളുടെയും ജീവിതത്തിലും സന്തോഷത്തിന്റെ വെളിച്ചമെത്തിക്കണമെന്ന സന്ദേശമാണ് മേള നൽകുന്നത്.

യുവാക്കൾക്ക് ഉപഭോക്താക്കളായും സംരംഭകരായും അവസരം

ജെൻ സി ഉൾപ്പെടെയുള്ള യുവാക്കൾ സ്വദേശി പ്രസ്ഥാനത്തിൽ പങ്കാളികളാകണമെന്ന് ഗോയൽ അഭ്യർഥിച്ചു. ഫാഷൻ, രൂപകൽപ്പന, സാങ്കേതികവിദ്യ, പുതുമയുള്ള ആശയങ്ങൾ എന്നിവയിൽ ഇന്നത്തെ യുവാക്കൾ ഏറെ ശ്രദ്ധ പുലർത്തുന്നവരാണ്. ആധുനിക രൂപകൽപ്പനയും ആകർഷകമായ അവതരണവും മികച്ച ബ്രാൻഡിങ്ങും ഇന്നത്തെ ജീവിതശൈലിയും ഖാദി ഗ്രാമവ്യവസായ ഉൽപ്പന്നങ്ങളുമായി ചേർത്താൽ അവ യുവാക്കൾക്കിടയിൽ കൂടുതൽ ജനപ്രിയമാകും. യുവാക്കൾക്ക് ഇവയുടെ ഉപഭോക്താക്കളാകുന്നതിനൊപ്പം ബ്രാൻഡ് അംബാസഡർമാരായും ഡിസൈനർമാരായും ഡിജിറ്റൽ പ്രചാരകരായും സംരംഭകരായും പ്രവർത്തിക്കാമെന്നും അദ്ദേഹം പറഞ്ഞു.

പ്രാദേശിക ഉൽപ്പന്നങ്ങളെ ലോകവിപണിയിലെത്തിക്കാനുള്ള പ്രധാനമന്ത്രിയുടെ കാഴ്ചപ്പാട് യാഥാർഥ്യമാക്കുന്നതിലും യുവാക്കൾക്ക് നിർണായക പങ്കുണ്ട്. സാമൂഹികമാധ്യമങ്ങൾ, ഇ കൊമേഴ്‌സ്, ഡിജിറ്റൽ മാർക്കറ്റിങ്, സ്റ്റാർട്ടപ്പുകൾ എന്നിവയിലൂടെ ഖാദി ഗ്രാമവ്യവസായ ഉൽപ്പന്നങ്ങൾ രാജ്യത്തിന്റെ എല്ലാ ഭാഗങ്ങളിലും എത്തിക്കാം. അന്താരാഷ്ട്ര വിപണികളിൽ അവയ്ക്ക് പുതിയൊരു വ്യക്തിത്വം സൃഷ്ടിക്കാനും യുവാക്കൾക്ക് കഴിയുമെന്ന് ഗോയൽ വ്യക്തമാക്കി.

പുതുതലമുറയെ ബന്ധിപ്പിക്കാൻ പോഡ്കാസ്റ്റ്; വിറ്റുവരവിലും മുന്നേറ്റം

വികസിത ഭാരതം 2047 എന്ന കാഴ്ചപ്പാടും പ്രാദേശിക ഉൽപ്പന്നങ്ങളെ പിന്തുണയ്ക്കാനുള്ള ആഹ്വാനവും യുവതലമുറയിലെത്തിക്കാൻ ഖാദി ഗ്രാമവ്യവസായ കമ്മീഷൻ ‘ബാത് ഖാദി കി’ എന്ന പോഡ്കാസ്റ്റ് ആരംഭിച്ചതായി ഗോയൽ അറിയിച്ചു. ഖാദിയുടെ പൈതൃകം, ആധുനിക ഫാഷൻ, പുതുമകൾ, യുവസംരംഭകത്വം തുടങ്ങിയ വിഷയങ്ങളിലൂടെയാണ് ജെൻ സിയെ ഖാദിയുമായും സ്വദേശി പ്രസ്ഥാനവുമായും ബന്ധിപ്പിക്കാൻ ശ്രമിക്കുന്നത്. പുതുതലമുറയിൽ ഖാദി ജനപ്രിയമാക്കാനും സ്വയംപര്യാപ്ത ഇന്ത്യയ്ക്കായുള്ള പ്രതിജ്ഞ ശക്തിപ്പെടുത്താനും ഈ സംരംഭം സഹായിക്കുമെന്നും അദ്ദേഹം പറഞ്ഞു.

പ്രധാനമന്ത്രിയുടെ ദീർഘവീക്ഷണവും നയങ്ങളും ഖാദി ഗ്രാമവ്യവസായ മേഖലയെ അഭൂതപൂർവമായ പുരോഗതിയിലേക്ക് നയിച്ചെന്ന് മാധ്യമപ്രവർത്തകരുമായുള്ള സംവാദത്തിൽ ഗോയൽ അഭിപ്രായപ്പെട്ടു. 2025–26 സാമ്പത്തികവർഷത്തിൽ മേഖലയിലെ വിറ്റുവരവ് 1.87 ലക്ഷം കോടി രൂപ കടന്നു. 2.04 കോടിയിലധികം പേർക്ക് മേഖല തൊഴിൽ നൽകിയിട്ടുണ്ട്. സമീപഭാവിയിൽ വിറ്റുവരവ് 2.51 ലക്ഷം കോടി രൂപയിലെത്തിക്കാനുള്ള ലക്ഷ്യം കൈവരിക്കാനാകുമെന്നും അദ്ദേഹം ആത്മവിശ്വാസം പ്രകടിപ്പിച്ചു.

.