ന്യൂഡൽഹി  / 2026 /  നവംബർ 02

എംപ്ലോയീസ് പ്രോവിഡന്റ് ഫണ്ട് ഓർഗനൈസേഷന്റെ എഴുപത്തിനാലാം സ്ഥാപകദിനാഘോഷത്തിൽ വാട്‌സാപ്പ് സേവനങ്ങളും അർഹമായ പ്രവർത്തനരഹിത അക്കൗണ്ടുകളിലെ തുക സ്വമേധയാ തീർപ്പാക്കുന്ന സംവിധാനവും ഉദ്ഘാടനം ചെയ്തു. നവംബർ ഒന്നിന് ന്യൂഡൽഹിയിലെ ഡോ. അംബേദ്കർ അന്താരാഷ്ട്ര കേന്ദ്രത്തിൽ നടന്ന ചടങ്ങിൽ കേന്ദ്ര തൊഴിൽ, യുവജനകാര്യ, കായിക മന്ത്രിയും ഇപിഎഫ് കേന്ദ്ര ട്രസ്റ്റി ബോർഡ് അധ്യക്ഷനുമായ ഡോ. മൻസുഖ് മാണ്ഡവ്യ അധ്യക്ഷത വഹിച്ചു. തൊഴിലാളികൾക്കും പെൻഷൻകാർക്കും സാങ്കേതികവിദ്യയുടെ സഹായത്തോടെ കൂടുതൽ കരുതലുള്ള സേവനം ഉറപ്പാക്കുകയാണ് പുതിയ നടപടികളുടെ ലക്ഷ്യം. നിയമപ്രകാരം പ്രവർത്തിക്കുന്ന പ്രോവിഡന്റ് ഫണ്ട് സ്ഥാപനത്തിൽനിന്ന് രാജ്യത്തെ പ്രധാന സാമൂഹികസുരക്ഷാ സ്ഥാപനങ്ങളിലൊന്നായി ഇപിഎഫ്ഒ വളർന്നതിന്റെ ഓർമപ്പെടുത്തലുമായി ആഘോഷം.

കേന്ദ്ര തൊഴിൽ മന്ത്രാലയ സെക്രട്ടറി ചന്ദ്രഭൂഷൺ കുമാർ, കേന്ദ്ര പ്രോവിഡന്റ് ഫണ്ട് കമ്മിഷണർ രമേശ് കൃഷ്ണമൂർത്തി, കേന്ദ്ര ട്രസ്റ്റി ബോർഡ് അംഗങ്ങൾ, തൊഴിലാളികൾ, തൊഴിലുടമകൾ, മറ്റ് ബന്ധപ്പെട്ടവർ എന്നിവർ പങ്കെടുത്തു. വിശ്വാസം, സേവനം, തൊഴിലാളികളോടുള്ള പ്രതിബദ്ധത എന്നിവയാണ് ഇപിഎഫ്ഒയുടെ 74 വർഷത്തെ യാത്രയ്ക്ക് അടിത്തറയായതെന്ന് മാണ്ഡവ്യ പറഞ്ഞു. എട്ടുകോടിയിലധികം അംഗങ്ങളുടെ വിഹിതത്തിലൂടെ സമാഹരിച്ച 32 ലക്ഷം കോടി രൂപയുടെ നിധി സ്ഥാപനത്തിലുള്ള വിശ്വാസത്തിന്റെ തെളിവാണ്. ജീവനക്കാരുടെ സമർപ്പണവും കഠിനാധ്വാനവും പ്രതിബദ്ധതയുമാണ് ഈ നേട്ടത്തിന് പിന്നിലെന്നും അദ്ദേഹം പറഞ്ഞു.

ഓരോ തൊഴിലാളിയുടെയും പരാതിക്ക് കരുതലോടെ പരിഹാരം

സാമൂഹികസുരക്ഷ ഉറപ്പാക്കുമ്പോൾ മാനുഷികമായ സമീപനം വേണമെന്ന് മാണ്ഡവ്യ നിർദേശിച്ചു. രാഷ്ട്രനിർമാണത്തിൽ പങ്കാളികളായ ഓരോ തൊഴിലാളിക്കും അർഹമായ ബഹുമാനവും അന്തസ്സും നൽകണം. അവരുടെ ആശങ്കകളും പരാതികളും കരുണയോടെയും സഹാനുഭൂതിയോടെയും പരിഹരിക്കണം. സൈറ്റ്സ് 2.01 ഉൾപ്പെടെയുള്ള സാങ്കേതിക മാറ്റങ്ങൾക്ക് പിന്നിലെ തുടർച്ചയായ പരിശ്രമങ്ങളെ അദ്ദേഹം അഭിനന്ദിച്ചു. സേവനം ഏറ്റവും അവസാനം ലഭിക്കുന്ന തൊഴിലാളിയുടെ ക്ഷേമത്തിലും ഓരോ ഉദ്യോഗസ്ഥനും ശ്രദ്ധിക്കണം. പ്രധാനമന്ത്രി നരേന്ദ്ര മോദി മുന്നോട്ടുവച്ച പഞ്ചപ്രാണിൽനിന്ന് പ്രചോദനം ഉൾക്കൊള്ളണമെന്നും വികസിത ഭാരതം എന്ന ലക്ഷ്യത്തിനായി സംഭാവന നൽകണമെന്നും അദ്ദേഹം ആവശ്യപ്പെട്ടു. സേവനം നമ്മുടെ സംസ്കാരമാണെന്നും മന്ത്രി പറഞ്ഞു. ഇപിഎഫ്ഒ എഴുപത്തഞ്ചാം വർഷത്തിലേക്ക് കടക്കുമ്പോൾ എല്ലാ മേഖലകളിലെയും പുതുമകൾ തൊഴിലാളികളെ കേന്ദ്രമാക്കിയാകണം. കാലത്തിനനുസരിച്ച് പ്രവർത്തനരീതികൾ മാറ്റുകയും വെല്ലുവിളികളെ നേരിടാനുള്ള കരുത്ത് വളർത്തുകയും വേണം. ഉദ്യോഗസ്ഥർക്കും അംഗങ്ങൾക്കും ഗുണഭോക്താക്കൾക്കും ദീപാവലി ആശംസകൾ നേർന്ന മന്ത്രി, അവരുടെ ജീവിതത്തിൽ വിജയത്തിന്റെയും സമൃദ്ധിയുടെയും വെളിച്ചം നിറയട്ടെയെന്നും ആശംസിച്ചു.

ഏഴുപതിറ്റാണ്ടിലേറെ നീണ്ട സേവനത്തിലൂടെ ഇന്ത്യയുടെ സാമൂഹികസുരക്ഷാ സംവിധാനത്തിന് അടിത്തറയിടാനും അത് ശക്തിപ്പെടുത്താനും ഇപിഎഫ്ഒയ്ക്ക് കഴിഞ്ഞെന്ന് തൊഴിൽ മന്ത്രാലയ സെക്രട്ടറി ഡോ. ചന്ദ്രഭൂഷൺ കുമാർ പറഞ്ഞു. വരുംതലമുറകൾക്ക് മാതൃകയാക്കാവുന്ന പ്രവർത്തനമാണിത്. സാമൂഹികസംരക്ഷണവും തൊഴിൽ പരിഷ്കാരങ്ങളും സംഘടിത മേഖലയ്ക്കൊപ്പം അസംഘടിത മേഖലയിലെ അവസാനത്തെ തൊഴിലാളിയിലേക്കും എത്തണം. ചിട്ടപ്പെടുത്തിയ നടപടികളിലൂടെ ഇത് സാധ്യമാക്കുന്നതിന് ഇപിഎഫ്ഒ മാതൃകയാണ്. ഇതുവരെ പിന്നിട്ട വഴിയും ഇനി സഞ്ചരിക്കാനുള്ള ദൂരവും വിലയിരുത്താനുള്ള അവസരമാണ് സ്ഥാപകദിനമെന്നും അദ്ദേഹം പറഞ്ഞു. പരിഷ്കരണം തുടർച്ചയായ പ്രക്രിയയാണ്. ഡിജിറ്റൽ കാലത്ത് സാധാരണക്കാരുടെ പ്രശ്നങ്ങൾ ഫലപ്രദമായി പരിഹരിക്കാൻ മാറ്റങ്ങൾ തുടരേണ്ടതുണ്ട്. ഉദ്യോഗസ്ഥരുടെ മനോഭാവത്തിലും കാഴ്ചപ്പാടിലും അതിനനുസരിച്ചുള്ള മാറ്റം വേണം. ഗുണഭോക്താക്കൾക്ക് സേവനം എളുപ്പത്തിൽ ലഭ്യമാക്കാനും ജീവിതം സുഗമമാക്കാനും മുൻഗണന നൽകണം. 2047ലെ വികസിത ഭാരതം എന്ന ലക്ഷ്യത്തിലേക്കുള്ള കൂട്ടായ പരിശ്രമത്തിന്റെ ഭാഗമാണിതെന്നും അദ്ദേഹം വ്യക്തമാക്കി.

ക്ലെയിമുകൾ തീർപ്പാക്കാൻ ശരാശരി 2.57 ദിവസം

1952ലെ സ്ഥാപകകാല പ്രതിബദ്ധതയിൽനിന്ന് ദേശീയ സാമൂഹികസുരക്ഷാ സ്ഥാപനമായി ഇപിഎഫ്ഒ വളർന്ന യാത്ര കേന്ദ്ര പ്രോവിഡന്റ് ഫണ്ട് കമ്മിഷണർ രമേശ് കൃഷ്ണമൂർത്തി അനുസ്മരിച്ചു. നിലവിൽ ഏകദേശം എട്ടുകോടി വിഹിതം അടയ്ക്കുന്ന അംഗങ്ങൾക്കും 85 ലക്ഷം പെൻഷൻകാർക്കും സ്ഥാപനം സേവനം നൽകുന്നു. ഏകദേശം 32 ലക്ഷം കോടി രൂപയുടെ വിരമിക്കൽ നിധിയും സംരക്ഷിക്കുന്നു. വലിയ സാങ്കേതിക, ഭരണപരമായ മാറ്റങ്ങൾക്കിടയിലും സേവനങ്ങൾ തുടരാൻ പരിശ്രമിച്ച രാജ്യത്തുടനീളമുള്ള ഉദ്യോഗസ്ഥരുടെയും ജീവനക്കാരുടെയും സംഭാവന അദ്ദേഹം എടുത്തുപറഞ്ഞു. ഇപിഎഫ്ഒയെ കൂടുതൽ എളുപ്പത്തിൽ സമീപിക്കാവുന്നതും വിശ്വസനീയവും മാനുഷികവുമായ സ്ഥാപനമാക്കണം. തീർപ്പാക്കുന്ന ഓരോ ക്ലെയിമിലൂടെയും നൽകുന്ന ഓരോ പെൻഷനിലൂടെയും പ്രതിസന്ധിയിൽ സഹായിക്കുന്ന ഓരോ കുടുംബത്തിലൂടെയുമാണ് സ്ഥാപനത്തിലുള്ള വിശ്വാസം വളരുന്നത്. അംഗങ്ങൾക്കും പെൻഷൻകാർക്കും അനുഭവപ്പെടുന്ന ആത്മവിശ്വാസവും സുരക്ഷയുമാകണം സ്ഥാപനത്തിന്റെ വിജയത്തിന്റെ അന്തിമ അളവുകോലെന്നും അദ്ദേഹം പറഞ്ഞു.

സൈറ്റ്സ് 2.01 വഴിയുള്ള സാങ്കേതിക മാറ്റങ്ങളുടെ ഫലവും ചടങ്ങിൽ അവതരിപ്പിച്ചു. ക്ലെയിമുകൾ തീർപ്പാക്കാൻ എടുക്കുന്ന ശരാശരി സമയം 2026 ഒക്ടോബറിൽ 2.57 ദിവസമായി കുറഞ്ഞു. അംഗങ്ങൾക്ക് പ്രോവിഡന്റ് ഫണ്ട് സമ്പാദ്യം കൂടുതൽ വേഗത്തിലും സൗകര്യപ്രദമായും ലഭ്യമാക്കാനുള്ള തുടർച്ചയായ ശ്രമങ്ങളുടെ ഫലമാണിതെന്ന് വിശദീകരിച്ചു.

വാട്‌സാപ്പിൽ ബാലൻസ് അറിയാം; ചെറിയ അക്കൗണ്ടുകൾ സ്വമേധയാ തീർപ്പാക്കും

ഇപിഎഫ്ഒയുടെ സ്ഥിരീകരിച്ച വാട്‌സാപ്പ് സേവനത്തിലൂടെ അംഗങ്ങൾക്ക് പിഎഫ് ബാലൻസ്, അവസാനത്തെ അഞ്ച് ഇടപാടുകൾ, പാസ്ബുക്ക് വിവരങ്ങൾ എന്നിവ അറിയാനാകും. വ്യക്തിഗത മാർഗനിർദേശവും പ്രധാനമന്ത്രി വികസിത് ഭാരത് റോസ്ഗാർ യോജനയുമായി ബന്ധപ്പെട്ട ആവശ്യങ്ങൾ പൂർത്തിയാക്കാനുള്ള സഹായവും ലഭിക്കും. പരിചിതമായ മൊബൈൽ സംവിധാനത്തിലൂടെ പതിവുസേവനങ്ങൾ ലഭ്യമാകുന്നതോടെ ഇപിഎഫ്ഒ ഓഫീസുകൾ സന്ദർശിക്കേണ്ട സാഹചര്യം കുറയും.

ആധാർ സ്ഥിരീകരിച്ച, ആയിരം രൂപ വരെ ബാലൻസുള്ള പ്രവർത്തനരഹിത ഇപിഎഫ് അക്കൗണ്ടുകളിലെ തുക ലഭിക്കാൻ ഇനി അംഗങ്ങൾ പ്രത്യേകം ക്ലെയിം നൽകേണ്ടതില്ല. നിർദേശിച്ച തിരിച്ചറിയൽ പരിശോധനയും ബാങ്ക് അക്കൗണ്ട് പരിശോധനയും പൂർത്തിയാക്കിയശേഷം ഇപിഎഫ്ഒ സ്വമേധയാ തീർപ്പാക്കൽ ആരംഭിക്കും. അർഹമായ തുക യഥാർഥ ഗുണഭോക്താക്കൾക്ക് കൈമാറുകയാണ് ലക്ഷ്യം. ഏകദേശം ഒരുലക്ഷം അക്കൗണ്ടുകളിലായി അഞ്ചുകോടി രൂപയുടെ ആനുകൂല്യം ലഭിക്കുമെന്നാണ് പ്രതീക്ഷ.

ഏഴ് പ്രസിദ്ധീകരണങ്ങൾ പുറത്തിറക്കി; മികവിന് പുരസ്കാരങ്ങൾ

അറിവ് വികസിപ്പിക്കൽ, സ്ഥാപനതല പഠനം, നിയമാവബോധം, കരുതലുള്ള ഭരണം എന്നിവയ്ക്ക് പ്രാധാന്യം നൽകുന്ന ഏഴ് പ്രസിദ്ധീകരണങ്ങൾ ചടങ്ങിൽ പുറത്തിറക്കി. ഇപിഎഫ്ഒ സ്റ്റേറ്റ് പ്രൊഫൈൽ 2026ൽ സ്ഥാപനത്തിന്റെ ഭൂമിശാസ്ത്രപരമായ സാന്നിധ്യം, സംസ്ഥാനങ്ങളിലെ വ്യാപ്തി, അംഗത്വം, സ്ഥാപനങ്ങൾ, ക്ലെയിമുകൾ, പെൻഷൻകാർ എന്നിവയുടെ കണക്കുകളുണ്ട്. സാമൂഹികസുരക്ഷാ നിയമങ്ങളിലെ പ്രധാന കോടതി വിധികൾ ഉൾപ്പെടുത്തിയ കോംപെൻഡിയം ഓഫ് ജഡ്ജ്മെന്റ്സ് 2026, അറിവോടെയും സ്ഥിരതയോടെയും തീരുമാനമെടുക്കാൻ സഹായിക്കും. ഉദ്യോഗസ്ഥരുടെയും ജീവനക്കാരുടെയും സാഹിത്യ, സർഗാത്മക രചനകൾ ഉൾപ്പെടുത്തിയ കേന്ദ്ര നിധി ഹിന്ദി മാസിക 2026–27 ഹിന്ദി ഭാഷയുടെ പ്രോത്സാഹനവും ലക്ഷ്യമിടുന്നു. ബിയോണ്ട് ദ ഡെസ്ക്, ബിയോണ്ട് ദ ഓർഡിനറി എന്ന പ്രസിദ്ധീകരണം ഔദ്യോഗിക ചുമതലകൾക്കപ്പുറമുള്ള ജീവനക്കാരുടെ കഴിവുകളും നേട്ടങ്ങളും അവതരിപ്പിക്കുന്നു. പിഡിയുഎൻഎഎസ്എസ് ആരംഭിച്ച സംവാദപരമ്പരയിലെ ധാർമിക നേതൃത്വം, കരുതലുള്ള ഭരണം, സ്ഥാപനപരമായ മാറ്റം എന്നിവയെക്കുറിച്ചുള്ള ആശയങ്ങളാണ് റീഇമാജിനിങ് ഗവേണൻസ്: ഡിസ്കോഴ്സ് ഫോർ എക്സലൻസ് എന്ന പ്രസിദ്ധീകരണത്തിൽ. ശാസൻ വിധി മേം കരുണ എന്ന പുസ്തകത്തിൽ 62 മേഖലാ ഓഫീസുകളിൽനിന്നുള്ള 83 യഥാർഥ അനുഭവപഠനങ്ങളുണ്ട്. അംഗങ്ങളുടെ പരാതികൾ പരിഹരിക്കുന്നതിലെ സഹാനുഭൂതിയും പുതുമയുള്ള സമീപനങ്ങളുമാണ് ഇതിലുള്ളത്. ദ ഇന്ത്യൻ ജേണൽ ഓഫ് സോഷ്യൽ സെക്യൂരിറ്റിയുടെ 2026ലെ ഒന്നാം വാല്യത്തിൽ സാമൂഹികസുരക്ഷ, തൊഴിൽവിപണി, ഡിജിറ്റൽ മാറ്റം, പെൻഷൻ ഭരണം തുടങ്ങിയ സമകാലിക വിഷയങ്ങളിൽ ഇപിഎഫ്ഒ ഉദ്യോഗസ്ഥരുടെ ഗവേഷണരചനകൾ ഉൾപ്പെടുത്തിയിട്ടുണ്ട്.

മേഖലാ ഓഫീസുകൾ, സോണൽ ഓഫീസുകൾ, ഉദ്യോഗസ്ഥർ, ജീവനക്കാർ എന്നിവരുടെ മികച്ച സംഭാവനകൾക്ക് ഭവിഷ്യ നിധി പുരസ്കാരങ്ങൾ 2026 സമ്മാനിച്ചു. മേഖലാ, ജില്ലാതല പ്രവർത്തനം, പരാതി പരിഹാരം, പെൻഷൻ സേവനങ്ങൾ, മരണാനന്തര ക്ലെയിം തീർപ്പാക്കൽ, പ്രയാസ്, പ്രധാനമന്ത്രി വികസിത് ഭാരത് റോസ്ഗാർ യോജന നടപ്പാക്കൽ, സാങ്കേതിക നവീകരണം, പരിശീലനം, പ്രചാരണം, ശുചിത്വം, ഇളവ് അനുവദിച്ച സ്ഥാപനങ്ങൾ, കായികം എന്നീ മേഖലകളിലെ മികവിനാണ് അംഗീകാരം. സേവനനിലവാരവും സ്ഥാപനത്തിന്റെ മികവും ഉയർത്തുന്നതിലെ ജീവനക്കാരുടെ സമർപ്പണവും പുതുമയും പ്രതിബദ്ധതയും പുരസ്കാരങ്ങളിലൂടെ ആദരിച്ചു. ഇപിഎഫ്ഒയിലെ മാറ്റങ്ങൾ ഓരോ തൊഴിലാളിക്കും പെൻഷൻകാരനും കൂടുതൽ സുരക്ഷയും അന്തസ്സും ആത്മവിശ്വാസവും നൽകണമെന്ന പൊതുകാഴ്ചപ്പാടാണ് നേതൃത്വത്തിന്റെ പ്രസംഗങ്ങളിൽ ഉയർന്നത്. സാങ്കേതിക മുന്നേറ്റത്തിനൊപ്പം മാനുഷിക കരുതലും സാമൂഹികസുരക്ഷയുടെ വ്യാപനത്തിനൊപ്പം വിശ്വസനീയമായ സേവനവും കാര്യക്ഷമതയ്ക്കൊപ്പം അനുകമ്പയും ഉറപ്പാക്കാനാണ് സ്ഥാപനത്തിന്റെ ശ്രമം. തൊഴിലാളിയുടെ വർഷങ്ങളായുള്ള അധ്വാനത്തിന്റെ ഫലം അവർക്കും കുടുംബത്തിനും സുരക്ഷയും അന്തസ്സും മനഃസമാധാനവുമായി മാറണമെന്ന തുടർച്ചയായ പ്രതിബദ്ധതയാണ് ഈ യാത്രയെന്നും ചടങ്ങ് ഓർമിപ്പിച്ചു.

.

.

.