ന്യൂഡൽഹി  / 2026  / നവംബർ 01 

ഇന്ത്യയുടെ കൽക്കരി ഇറക്കുമതി 2026 ഓഗസ്റ്റിൽ 5.83 ശതമാനം കുറഞ്ഞു. 2025 ഓഗസ്റ്റിലെ 111.05 ദശലക്ഷം ടണ്ണിൽനിന്ന് 104.57 ദശലക്ഷം ടണ്ണിലേക്കാണ് ഇറക്കുമതി താഴ്ന്നത്. കുറവ് 6.48 ദശലക്ഷം ടണ്ണാണ്. ആഭ്യന്തര കൽക്കരി ഉൽപ്പാദനം കൂട്ടാനും ലഭ്യത മെച്ചപ്പെടുത്താനും വിതരണശൃംഖല ശക്തമാക്കാനും കൽക്കരി മന്ത്രാലയം നടത്തുന്ന തുടർച്ചയായ ശ്രമങ്ങളുടെ പശ്ചാത്തലത്തിലാണ് ഈ നേട്ടം.

വൈദ്യുത നിലയങ്ങളുടെ ഇറക്കുമതിയിൽ കുറവ്

വൈദ്യുത നിലയങ്ങളുടെ കൽക്കരി ഇറക്കുമതി 6.39 ശതമാനം കുറഞ്ഞു. 2025 ഓഗസ്റ്റിൽ 22.77 ദശലക്ഷം ടണ്ണായിരുന്നത് 2026 ഓഗസ്റ്റിൽ 21.32 ദശലക്ഷം ടണ്ണായി. ആഭ്യന്തര കൽക്കരിയുടെ ലഭ്യത കൂട്ടാനും രാജ്യത്തെ കൽക്കരി ഉപയോഗിക്കുന്ന നിലയങ്ങളിൽ കലർത്തുന്നതിനായി ഇറക്കുമതി ചെയ്യുന്ന കൽക്കരിയെ ആശ്രയിക്കുന്നത് കുറയ്ക്കാനുമുള്ള ശ്രമങ്ങളുമായി ഈ കുറവ് യോജിക്കുന്നു.

ഇറക്കുമതി കൽക്കരി ഉപയോഗിക്കുന്ന നിലയങ്ങളിൽ നേരിയ വർധന

പ്രധാനമായും ഇറക്കുമതി കൽക്കരിയിൽ പ്രവർത്തിക്കാൻ രൂപകൽപ്പന ചെയ്ത വൈദ്യുത നിലയങ്ങളുടെ ഇറക്കുമതിയിൽ നേരിയ വർധനയുണ്ടായി. 2025 ഓഗസ്റ്റിലെ 18.13 ദശലക്ഷം ടണ്ണിൽനിന്ന് 2026 ഓഗസ്റ്റിൽ 18.31 ദശലക്ഷം ടണ്ണായി. വർധന 0.98 ശതമാനമാണ്.

അതേസമയം, ആഭ്യന്തര കൽക്കരിയിൽ പ്രവർത്തിക്കുന്ന നിലയങ്ങളിൽ കലർത്താൻ കൊണ്ടുവരുന്ന കൽക്കരിയുടെ ഇറക്കുമതി 35.23 ശതമാനം കുറഞ്ഞു. 4.64 ദശലക്ഷം ടണ്ണിൽനിന്ന് 3.00 ദശലക്ഷം ടണ്ണിലേക്കാണ് താഴ്ന്നത്. കലർത്തുന്നതിനുള്ള ഇറക്കുമതി ആവശ്യകത കുറഞ്ഞെന്നാണ് ഇത് വ്യക്തമാക്കുന്നത്. വൈദ്യുതി ഉൽപ്പാദനത്തിന് ആഭ്യന്തര കൽക്കരിയുടെ ലഭ്യത മെച്ചപ്പെടുത്താനുള്ള ശ്രമങ്ങളുമായി ഈ മാറ്റവും യോജിക്കുന്നു.

മൊത്തം ഉപഭോഗത്തിലും ഇറക്കുമതിയുടെ പങ്ക് കുറഞ്ഞു

രാജ്യത്തെ മൊത്തം കൽക്കരി ഉപഭോഗത്തിൽ ഇറക്കുമതി കൽക്കരിയുടെ വിഹിതം 2025 ഓഗസ്റ്റിലെ 21.20 ശതമാനത്തിൽനിന്ന് 2026 ഓഗസ്റ്റിൽ 19.30 ശതമാനമായി കുറഞ്ഞു. 1.90 ശതമാന പോയിന്റിന്റെ കുറവാണിത്. ആ മാസത്തിൽ രാജ്യം ഇറക്കുമതി കൽക്കരിയെ ആശ്രയിക്കുന്നത് കുറഞ്ഞെന്നാണ് ഈ കണക്ക് വ്യക്തമാക്കുന്നത്.

ഉരുക്ക് വ്യവസായത്തിന്റെ പ്രധാന അസംസ്കൃത വസ്തുവായ കോക്കിങ് കൽക്കരിയുടെ ഇറക്കുമതിയും 4.18 ശതമാനം കുറഞ്ഞു. 28.49 ദശലക്ഷം ടണ്ണിൽനിന്ന് 27.30 ദശലക്ഷം ടണ്ണിലേക്കാണ് താഴ്ന്നത്. രാജ്യത്തെ കൽക്കരി നിക്ഷേപങ്ങളുടെ ഗുണനിലവാരവും സ്വഭാവവും കാരണം ഈ വിഭാഗത്തിൽ ആഭ്യന്തര ലഭ്യതയ്ക്ക് പരിമിതിയുണ്ട്. അതിനാൽ ഉരുക്ക് മേഖലയ്ക്ക് ആവശ്യമായ പ്രത്യേക അസംസ്കൃത വസ്തുക്കളുടെ ആവശ്യകതയും കോക്കിങ് കൽക്കരി ഇറക്കുമതിയെ സ്വാധീനിക്കുന്നു.

ഖനിയിൽനിന്നുള്ള നീക്കവും വിതരണവും ശക്തമാക്കുന്നു

ആഭ്യന്തര കൽക്കരി ഉൽപ്പാദനവും ഖനികളിൽനിന്നുള്ള ഏറ്റെടുക്കലും വർധിപ്പിക്കുന്നതിലാണ് മന്ത്രാലയത്തിന്റെ ശ്രദ്ധ. ഖനിയിൽനിന്ന് പ്രധാന ഗതാഗത സംവിധാനത്തിലേക്കുള്ള ആദ്യഘട്ട ബന്ധം ശക്തമാക്കുകയും കൽക്കരി പുറത്തേക്ക് കൊണ്ടുപോകാനുള്ള അടിസ്ഥാനസൗകര്യങ്ങൾ മെച്ചപ്പെടുത്തുകയും ചെയ്യുന്നു. താപവൈദ്യുത നിലയങ്ങളിലെ കൽക്കരി ശേഖരവും സൂക്ഷ്മമായി നിരീക്ഷിക്കുന്നുണ്ട്.

റെയിൽവേ മന്ത്രാലയം, കോൾ ഇന്ത്യ ലിമിറ്റഡ്, അതിന്റെ അനുബന്ധ കമ്പനികൾ എന്നിവയുമായി ചേർന്നാണ് പ്രവർത്തനങ്ങൾ ഏകോപിപ്പിക്കുന്നത്. വൈദ്യുതോൽപ്പാദന സ്ഥാപനങ്ങൾക്ക് ആവശ്യത്തിന് കൽക്കരി സമയത്ത് എത്തിക്കുകയാണ് ലക്ഷ്യം. ആഭ്യന്തര വിതരണം കൂടുതൽ വിശ്വസനീയമാക്കാനും ഒഴിവാക്കാവുന്ന ഇറക്കുമതി ആശ്രയം കുറയ്ക്കാനും രാജ്യത്തുടനീളം തടസ്സമില്ലാത്ത വൈദ്യുതി ഉൽപ്പാദനത്തെ പിന്തുണയ്ക്കാനുമാണ് ഈ നടപടികൾ.

ഉൽപ്പാദനത്തിനൊപ്പം ഗതാഗതത്തിനും ഗുണനിലവാരത്തിനും പ്രാധാന്യം

മൊത്തം ഇറക്കുമതിയിലും പ്രത്യേകിച്ച് ആഭ്യന്തര കൽക്കരി നിലയങ്ങളിൽ കലർത്താനുള്ള ഇറക്കുമതിയിലുമുണ്ടായ കുറവ്, ആഭ്യന്തര ഉൽപ്പാദനവും ഗതാഗതവും വിതരണശൃംഖലയും ശക്തമാക്കേണ്ടതിന്റെ പ്രാധാന്യം വ്യക്തമാക്കുന്നു. അതേസമയം, ഇറക്കുമതി കൽക്കരിയിൽ പ്രവർത്തിക്കുന്ന നിലയങ്ങളുടെയും ഉരുക്ക് മേഖലയുടെയും ഇറക്കുമതി അവയുടെ പ്രത്യേക ഇന്ധന, അസംസ്കൃത വസ്തു ആവശ്യങ്ങളെ പ്രതിഫലിപ്പിക്കുന്നു.

ആഭ്യന്തര ഉൽപ്പാദനം ഇനിയും കൂട്ടാനും കൽക്കരി നീക്കാനുള്ള ശേഷി മെച്ചപ്പെടുത്താനും വിതരണശൃംഖല കൂടുതൽ കാര്യക്ഷമമാക്കാനും മന്ത്രാലയം പ്രവർത്തനം തുടരും. അനുയോജ്യമായ ഗുണനിലവാര പരിപാലനവും പ്രോത്സാഹിപ്പിക്കും. സാധ്യമായ മേഖലകളിൽ ഇറക്കുമതി ആശ്രയം കുറയ്ക്കുന്നതിനൊപ്പം രാജ്യത്തെ വൈദ്യുതി, വ്യവസായ മേഖലകൾക്ക് വിശ്വസനീയമായ കൽക്കരി ലഭ്യത ഉറപ്പാക്കുകയാണ് ലക്ഷ്യം.

.