ന്യൂഡൽഹി, 2026 ഒക്ടോബർ 30 –

ഡൽഹിയിൽ വായുമലിനീകരണം നിയന്ത്രിക്കാൻ വാഹനങ്ങളുടെ പ്രവേശനത്തിന് പുതിയ നിയന്ത്രണങ്ങൾ ഏർപ്പെടുത്തുന്നു. നവംബർ ഒന്നുമുതൽ ബിഎസ്-6 മലിനീകരണ നിലവാരം പാലിക്കാത്ത ചില വാഹനങ്ങൾക്ക് ഡൽഹിയിലേക്ക് പ്രവേശിക്കാൻ കഴിയില്ല. അയൽ സംസ്ഥാനങ്ങളിൽനിന്ന് എത്തുന്ന വാഹനങ്ങൾക്കാണ് പ്രധാനമായും നിയന്ത്രണം ബാധകമാകുന്നത്. പരിഷ്കരിച്ച ഗ്രേഡഡ് റെസ്പോൺസ് ആക്ഷൻ പ്ലാൻ അഥവാ ഗ്രാപ്പിന്റെ ഭാഗമായാണ് നടപടി. ഡൽഹിയിലേക്ക് യാത്ര ചെയ്യുന്നവർ വാഹനങ്ങളുടെ യോഗ്യത മുൻകൂട്ടി പരിശോധിക്കണമെന്ന് ട്രാഫിക് പൊലീസ് നിർദേശിച്ചു.

ഏതൊക്കെ വാഹനങ്ങൾക്ക് പ്രവേശിക്കാം?

ബിഎസ്-6 നിലവാരമുള്ള വാഹനങ്ങൾക്കും സിഎൻജി, ഇലക്ട്രിക് വാഹനങ്ങൾക്കും ഡൽഹിയിലേക്ക് പ്രവേശിക്കാം. സർക്കാർ പ്രത്യേക ഇളവ് അനുവദിച്ച വാഹനങ്ങൾക്കും പ്രവേശനം ലഭിക്കും. എന്നാൽ നിശ്ചിത മലിനീകരണ നിലവാരം പാലിക്കാത്ത വാഹനങ്ങൾക്ക് നിയന്ത്രണമുണ്ടാകും. സാധുവായ പൊല്യൂഷൻ അണ്ടർ കൺട്രോൾ സർട്ടിഫിക്കറ്റും വാഹനങ്ങൾക്ക് നിർബന്ധമാണ്. ഡൽഹിക്ക് പുറത്തു രജിസ്റ്റർ ചെയ്ത വാഹനങ്ങൾക്ക് അവയുടെ വിഭാഗവും മലിനീകരണ നിലവാരവും അനുസരിച്ചായിരിക്കും നിയന്ത്രണം ബാധകമാകുക.

ബസുകൾക്കും ലോറികൾക്കും പ്രത്യേക നിബന്ധന

മറ്റ് സംസ്ഥാനങ്ങളിൽനിന്ന് ഡൽഹിയിലേക്ക് വരുന്ന ബസുകൾക്കും പുതിയ നിബന്ധനകൾ ബാധകമാണ്. ഇലക്ട്രിക്, സിഎൻജി, ബിഎസ്-6 ഡീസൽ ബസുകൾക്കാണ് നിശ്ചിത വ്യവസ്ഥകൾക്ക് വിധേയമായി പ്രവേശനം അനുവദിക്കുക. ഡൽഹി ലക്ഷ്യസ്ഥാനമല്ലാത്ത ലോറികളും മറ്റ് ചരക്കുവാഹനങ്ങളും നഗരത്തിലൂടെ കടന്നുപോകാൻ അനുവദിക്കില്ല. ഇത്തരം വാഹനങ്ങൾ നഗരത്തിന് പുറത്തുള്ള പെരിഫറൽ എക്സ്പ്രസ് വേകൾ ഉപയോഗിക്കണം. ട്രാക്ടറുകൾക്കും പ്രാദേശികമായി രൂപമാറ്റം വരുത്തിയ വാഹനങ്ങൾക്കും ബാധകമായ ചട്ടങ്ങൾ അനുസരിച്ച് നിയന്ത്രണമുണ്ടാകും.

വായുമലിനീകരണം കൂടിയതോടെയാണ് നടപടി

ശൈത്യകാലം അടുത്തതോടെ ഡൽഹിയിലെ വായുനിലവാരം മോശമായതാണ് നിയന്ത്രണങ്ങൾ ശക്തമാക്കാൻ കാരണം. ഒക്ടോബർ 21ന് വായുനിലവാരം മോശം വിഭാഗത്തിലേക്ക് താഴ്ന്നതിനെ തുടർന്ന് കമ്മീഷൻ ഫോർ എയർ ക്വാളിറ്റി മാനേജ്മെന്റ് ഗ്രാപ്പിന്റെ ഒന്നാംഘട്ട നിയന്ത്രണങ്ങൾ നടപ്പാക്കിയിരുന്നു. സെപ്റ്റംബറിൽ ഗ്രാപ്പ് ചട്ടങ്ങൾ പരിഷ്കരിച്ചപ്പോൾ പഴയ അന്തർസംസ്ഥാന ബസുകൾക്കുള്ള ചില നിയന്ത്രണങ്ങൾ രണ്ടാംഘട്ടത്തിൽനിന്ന് ഒന്നാംഘട്ടത്തിലേക്ക് മാറ്റിയിരുന്നു. മലിനീകരണം വർധിക്കുന്നതിന്റെ തുടക്കത്തിൽത്തന്നെ നിയന്ത്രണങ്ങൾ നടപ്പാക്കാനാണ് തീരുമാനം.

അതിർത്തികളിൽ പരിശോധന ശക്തമാക്കും

നവംബർ ഒന്നുമുതൽ ഡൽഹിയിലേക്കുള്ള പ്രവേശനകവാടങ്ങളിൽ വാഹനപരിശോധന കൂടുതൽ കർശനമാക്കും. വാഹനങ്ങളുടെ രജിസ്ട്രേഷൻ വിവരങ്ങൾ, മലിനീകരണ നിലവാരം, പിയുസി സർട്ടിഫിക്കറ്റ് എന്നിവ പരിശോധിക്കും. പ്രവേശനവിലക്കുള്ള വാഹനങ്ങളെക്കുറിച്ച് ഡ്രൈവർമാർക്ക് അറിയാൻ അതിർത്തികളിൽ പ്രത്യേക ബോർഡുകൾ സ്ഥാപിക്കുന്ന കാര്യവും അധികൃതർ പരിഗണിക്കുന്നുണ്ട്. നിയമങ്ങൾ പാലിക്കാത്ത വാഹനങ്ങൾ നഗരത്തിലേക്ക് കടക്കുന്നത് തടയാൻ അയൽ സംസ്ഥാനങ്ങളുമായുള്ള ഏകോപനവും ശക്തമാക്കിയിട്ടുണ്ട്.

യാത്രയ്ക്ക് മുമ്പ് വാഹനത്തിന്റെ യോഗ്യത പരിശോധിക്കണം

ഡൽഹിയിലേക്കുള്ള യാത്ര ആസൂത്രണം ചെയ്യുന്നവർ വാഹനം പുതിയ നിബന്ധനകൾ പാലിക്കുന്നുണ്ടെന്ന് ഉറപ്പാക്കണമെന്ന് ട്രാഫിക് പൊലീസ് അറിയിച്ചു. രജിസ്ട്രേഷനും മലിനീകരണ സർട്ടിഫിക്കറ്റും ഉണ്ടെന്നതുകൊണ്ടുമാത്രം എല്ലാ വാഹനങ്ങൾക്കും പ്രവേശനം ലഭിക്കണമെന്നില്ല. കൂടുതൽ വിവരങ്ങൾക്ക് 011-25844444, 1095 എന്നീ ട്രാഫിക് പൊലീസ് ഹെൽപ്പ്‌ലൈൻ നമ്പറുകളിൽ ബന്ധപ്പെടാം. പുതിയ നിയന്ത്രണങ്ങൾ ഡൽഹിയിലെ വാഹനങ്ങളിൽനിന്നുള്ള മലിനീകരണം കുറയ്ക്കാൻ സഹായിക്കുമെന്നാണ് അധികൃതരുടെ പ്രതീക്ഷ.