ലഖ്‌നൗ, 2026 ഒക്ടോബർ 27 –

ഉത്തർപ്രദേശിലെ അയോധ്യയിൽ പത്താമത് ദീപോത്സവം നവംബർ ഏഴിന് വിപുലമായി ആഘോഷിക്കും. ഇന്ത്യൻ സംസ്കാരവും മതവിശ്വാസവും പാരമ്പര്യവും ലോകത്തിന് മുന്നിൽ അവതരിപ്പിക്കുന്ന ആഘോഷമായിരിക്കും ഇത്തവണത്തേതെന്ന് മുഖ്യമന്ത്രി യോഗി ആദിത്യനാഥ് അറിയിച്ചു. രാമായണത്തെ ആസ്പദമാക്കി 2,100 ഡ്രോണുകളുടെ ആകാശപ്രദർശനവും 2,147 പേർ പങ്കെടുക്കുന്ന സരയൂ ആരതിയും നടക്കും. അയോധ്യ നഗരത്തിലുടനീളം ലക്ഷക്കണക്കിന് മൺചിരാതുകളും തെളിക്കും. ദീപോത്സവത്തിന്റെ ഒരുക്കങ്ങൾ വിലയിരുത്തിയ യോഗി ആദിത്യനാഥ് ആഘോഷം ഭംഗിയായി നടത്താൻ ഉദ്യോഗസ്ഥർക്ക് നിർദേശം നൽകി.

2,100 ഡ്രോണുകൾ; 35,000 സന്നദ്ധപ്രവർത്തകർ

ദീപോത്സവം മൂന്ന് ഘട്ടങ്ങളിലായാണ് സംഘടിപ്പിക്കുന്നത്. ആദ്യഘട്ടത്തിൽ സാകേത് കോളേജിൽനിന്ന് രാമായണ കഥകൾ അവതരിപ്പിക്കുന്ന നിശ്ചലദൃശ്യങ്ങളും കലാപരിപാടികളും ഉൾപ്പെട്ട ഘോഷയാത്ര ആരംഭിക്കും. രണ്ടാംഘട്ടത്തിൽ രാമകഥ പാർക്കിൽ ശ്രീരാമന്റെയും സീതയുടെയും പ്രതീകാത്മക വരവും ഭരതനുമായുള്ള കൂടിക്കാഴ്ചയും രാമപട്ടാഭിഷേകവും അവതരിപ്പിക്കും. മൂന്നാംഘട്ടത്തിലാണ് സരയൂ ആരതിയും ദീപങ്ങൾ തെളിക്കുന്ന ചടങ്ങും ഡ്രോൺ പ്രദർശനവും നടക്കുക. രാം കി പൈഡിയിൽ 200 കലാകാരന്മാർ പരിപാടികൾ അവതരിപ്പിക്കും. ലേസർ പ്രദർശനവും പരിസ്ഥിതിസൗഹൃദ വെടിക്കെട്ടും അന്താരാഷ്ട്ര രാമലീല അവതരണങ്ങളും ഉണ്ടാകും. ഏകദേശം 35,000 സന്നദ്ധപ്രവർത്തകരാണ് ആഘോഷങ്ങളിൽ പങ്കെടുക്കുക. ഭക്തരുടെയും സന്ദർശകരുടെയും സുരക്ഷയ്ക്കും യാത്രാസൗകര്യങ്ങൾക്കും പ്രത്യേക പ്രാധാന്യം നൽകണമെന്ന് മുഖ്യമന്ത്രി നിർദേശിച്ചു.

13 സംസ്ഥാനങ്ങളിൽനിന്ന് ആയിരം കലാകാരന്മാർ

2017ൽ പ്രധാനമന്ത്രി നരേന്ദ്ര മോദിയുടെ മാർഗനിർദേശപ്രകാരം ആരംഭിച്ച അയോധ്യ ദീപോത്സവത്തിന് ഇന്ന് ആഗോള അംഗീകാരം ലഭിച്ചിട്ടുണ്ടെന്ന് യോഗി ആദിത്യനാഥ് പറഞ്ഞു. ഇത്തവണ കേരളം ഉൾപ്പെടെ 13 സംസ്ഥാനങ്ങളിൽനിന്നായി ആയിരത്തോളം കലാകാരന്മാർ നാടൻകലകളും പരമ്പരാഗത നൃത്തരൂപങ്ങളും അവതരിപ്പിക്കും. 12 രാജ്യങ്ങളിൽനിന്നുള്ള സാംസ്കാരിക പ്രതിനിധികളും പങ്കെടുക്കുമെന്നാണ് പ്രതീക്ഷ. ഇന്ത്യയിലെ വിദേശ അംബാസഡർമാർക്കും വിദേശരാജ്യങ്ങളിലെ ഇന്ത്യൻ നയതന്ത്രപ്രതിനിധികൾക്കും ക്ഷണം നൽകുന്നുണ്ട്. ഡിജിറ്റൽ പ്ലാറ്റ്‌ഫോമുകളിലൂടെ അഞ്ച് കോടിയിലധികം ആളുകളിലേക്ക് ആഘോഷങ്ങൾ എത്തിക്കാനാണ് ലക്ഷ്യം. രാമജന്മഭൂമി തീർഥക്ഷേത്ര ട്രസ്റ്റ് ഭാരവാഹികളുമായും സന്യാസിമാരുമായും സഹകരിച്ച് ഒരുക്കങ്ങൾ പൂർത്തിയാക്കാൻ ഉദ്യോഗസ്ഥർക്ക് നിർദേശം നൽകിയിട്ടുണ്ട്.