ഗുവാഹത്തി (അസം)  / 2026   / ഒക്ടോബർ 25

ഇന്ത്യയുടെ പരമ്പരാഗത കരകൗശലങ്ങളുടെയും കൈത്തറി ഉൽപ്പന്നങ്ങളുടെയും സമ്പന്നമായ വൈവിധ്യം പരിചയപ്പെടുത്തി ഗുവാഹത്തിയിൽ ശിൽപ് സമാഗം മേള തുടരുന്നു. അസമിന്റെ തലസ്ഥാനമായ ഗുവാഹത്തിയിലെ ഖാനാപാറ ഫാം ഗേറ്റിൽ നടക്കുന്ന എട്ട് ദിവസത്തെ മേള നാലാം ദിവസത്തിലെത്തി. കേന്ദ്ര സാമൂഹികനീതി ശാക്തീകരണ മന്ത്രാലയമാണ് സംഘാടകർ. വടക്കുകിഴക്കൻ സംസ്ഥാനങ്ങൾ ഉൾപ്പെടെ രാജ്യത്തിന്റെ വിവിധ ഭാഗങ്ങളിൽനിന്നുള്ള കരകൗശലത്തൊഴിലാളികളെ ഒരുമിപ്പിക്കുന്ന മേളയിൽ 31 വനിതകൾ ഉൾപ്പെടെ 75 പേർ പങ്കെടുക്കുന്നു. ഏകദേശം 40 ഇനം കൈത്തറി, കരകൗശല ഉൽപ്പന്നങ്ങളാണ് ഇവർ പ്രദർശിപ്പിക്കുന്നത്. പരമ്പരാഗത കഴിവുകൾക്ക് വിപണി കണ്ടെത്താനും തൊഴിലാളികളുടെ ഉപജീവനം മെച്ചപ്പെടുത്താനുമാണ് ഈ വേദി ഒരുക്കിയിരിക്കുന്നത്. 2026–27 സാമ്പത്തിക വർഷത്തിൽ മന്ത്രാലയം സംഘടിപ്പിക്കുന്ന ശിൽപ് സമാഗം മേള പരമ്പരയിലെ രണ്ടാമത്തെ മേളയാണിത്.

ഉൽപ്പന്നങ്ങൾ വാങ്ങാം; സംഗീതവും നൃത്തവും ആസ്വദിക്കാം

ഒക്ടോബർ 28 ബുധനാഴ്ച വരെ മേള തുടരുമെന്ന് മന്ത്രാലയത്തിലെ മുതിർന്ന ഉദ്യോഗസ്ഥൻ അറിയിച്ചു. ദിവസവും രാവിലെ 11 മുതൽ രാത്രി ഒമ്പത് വരെയാണ് പൊതുജനങ്ങൾക്ക് പ്രവേശനം. സന്ദർശകർ വൈവിധ്യമാർന്ന പരമ്പരാഗത ഉൽപ്പന്നങ്ങൾ കണ്ടറിയുകയും അവ വാങ്ങി കരകൗശലത്തൊഴിലാളികൾക്ക് പിന്തുണ നൽകുകയും ചെയ്യുന്നുണ്ട്. നിരവധി കലാകാരന്മാർ അവതരിപ്പിക്കുന്ന പരമ്പരാഗത സംഗീത, നൃത്തപരിപാടികളും സന്ദർശകർ ആസ്വദിക്കുന്നു. രാജ്യത്തിന്റെ വിവിധ മേഖലകളിലെ കൈത്തറി ഉൽപ്പന്നങ്ങളും പരമ്പരാഗത കരകൗശലങ്ങളും ഗുവാഹത്തി മേളയിലുണ്ട്. വടക്കുകിഴക്കൻ സംസ്ഥാനങ്ങളിലെയും രാജ്യത്തിന്റെ മറ്റു ഭാഗങ്ങളിലെയും തൊഴിലാളികളുടെ പങ്കാളിത്തം ഇന്ത്യയുടെ കലാപാരമ്പര്യം, തദ്ദേശീയ കരവിരുത്, സാംസ്കാരിക പൈതൃകം എന്നിവയുടെ വൈവിധ്യം അടുത്തറിയാൻ അവസരമൊരുക്കുന്നു. പരമ്പരാഗത അറിവുകളും കരകൗശല രീതികളും നിലനിർത്തുന്ന തൊഴിലാളികളുടെ കഴിവിനും സർഗാത്മകതയ്ക്കും കൂടുതൽ അംഗീകാരം നേടിക്കൊടുക്കാനും മേള ലക്ഷ്യമിടുന്നു.

ഇടനിലക്കാരില്ലാതെ വിൽപ്പന; കൂടുതൽ വിപണികളിലേക്ക് വഴി

പങ്കെടുക്കുന്ന തൊഴിലാളികൾക്ക് സ്വന്തം ഉൽപ്പന്നങ്ങൾ പ്രദർശിപ്പിക്കാനും സന്ദർശകർക്ക് നേരിട്ട് വിൽക്കാനും മേള അവസരമൊരുക്കുന്നു. പുതിയ ഉപഭോക്താക്കളുമായി ബന്ധം സ്ഥാപിക്കാനും കൂടുതൽ വിപണികളിലേക്ക് എത്താനുള്ള സാധ്യതകൾ കണ്ടെത്താനും ഇതിലൂടെ കഴിയും. തൊഴിലാളികളും ഉപഭോക്താക്കളും നേരിട്ട് ഇടപഴകുന്നതിലൂടെ വിപണിപ്രവേശനം ശക്തമാക്കാനും സംരംഭകത്വം പ്രോത്സാഹിപ്പിക്കാനും ഉപജീവനാവസരങ്ങൾ മെച്ചപ്പെടുത്താനുമാണ് ശ്രമമെന്ന് ഉദ്യോഗസ്ഥൻ പറഞ്ഞു. പരമ്പരാഗത കരകൗശലത്തൊഴിലാളികളുടെ ഉന്നമനത്തിനും ഉപജീവനത്തിനുമായുള്ള ‘ഭാരത് തുലിപ്’ പദ്ധതിയുടെ പ്രചാരണവും മേളയുടെ പ്രധാന ലക്ഷ്യമാണ്. പദ്ധതിയുടെ ഗുണഭോക്തൃവിഭാഗങ്ങളിൽപ്പെട്ട തൊഴിലാളികൾ നിർമിക്കുന്ന ഉൽപ്പന്നങ്ങൾ നേരിട്ടുള്ള വിൽപ്പനശാലകളിലൂടെയും ഇ കൊമേഴ്സ് വേദികളിലൂടെയും വിപണിയിലെത്തിക്കാൻ ഇത് സഹായിക്കുന്നു. വിശാലമായ വിപണികളും ഡിജിറ്റൽ മാർഗങ്ങളും ലഭ്യമാക്കി വിപണിബന്ധങ്ങൾ ശക്തമാക്കാനും കൂടുതൽ ഉപഭോക്താക്കളിലേക്ക് എത്താനും വരുമാനം വർധിപ്പിക്കാനുള്ള അധിക അവസരങ്ങൾ സൃഷ്ടിക്കാനുമാണ് പദ്ധതി. മാറുന്ന ഉപഭോക്തൃവിപണികളുമായി തൊഴിലാളികളെയും ഉൽപ്പന്നങ്ങളെയും ബന്ധിപ്പിക്കുന്നതിലൂടെ പരമ്പരാഗത കലകളുടെ സംരക്ഷണത്തിനും പ്രചാരണത്തിനും ഇത് പിന്തുണ നൽകുന്നു.

മൂന്ന് ദേശീയ കോർപ്പറേഷനുകളുടെ ഗുണഭോക്താക്കൾക്കും പിന്തുണ

മന്ത്രാലയത്തിനു കീഴിലെ മൂന്ന് ദേശീയ കോർപ്പറേഷനുകളുമായി ബന്ധപ്പെട്ട കരകൗശലത്തൊഴിലാളികൾക്കും ഗുണഭോക്താക്കൾക്കും വിപണനസഹായം നൽകുന്ന പ്രധാന സംരംഭമാണ് ശിൽപ് സമാഗം മേള. ദേശീയ പട്ടികജാതി ധനകാര്യ വികസന കോർപ്പറേഷൻ, ദേശീയ സഫായി കരംചാരി ധനകാര്യ വികസന കോർപ്പറേഷൻ, ദേശീയ പിന്നാക്ക വിഭാഗ ധനകാര്യ വികസന കോർപ്പറേഷൻ എന്നിവയാണ് ഈ സ്ഥാപനങ്ങൾ. ഈ വർഷത്തെ ആദ്യ മേള കർണാടകത്തിലെ മൈസൂരുവിൽ ഒക്ടോബർ 19ന് സമാപിച്ചിരുന്നു. മൈസൂരുവിലെ ദസറ പ്രദർശന മൈതാനത്ത് ഒമ്പത് ദിവസം നടന്ന മേളയിൽ ആയിരക്കണക്കിന് സന്ദർശകരെത്തി. പ്രധാനമന്ത്രി നരേന്ദ്ര മോദിയുടെ ‘സബ്കാ സാഥ്, സബ്കാ വികാസ്’ എന്ന ആശയത്തിന്റെ അടിസ്ഥാനത്തിലാണ് മേള മുന്നോട്ടുപോകുന്നത്. പട്ടികജാതിക്കാർ, മറ്റു പിന്നാക്ക വിഭാഗക്കാർ, ശുചീകരണത്തൊഴിലാളികളായ സഫായി മിത്രകൾ, വിമുക്ത ഗോത്രവിഭാഗക്കാർ എന്നിവരുടെ സാമ്പത്തിക ശാക്തീകരണമാണ് ലക്ഷ്യം. ഈ വിഭാഗങ്ങൾക്ക് കഴിവുകൾ അവതരിപ്പിക്കാനും ഉൽപ്പന്നങ്ങൾ വിപണിയിലെത്തിക്കാനും സ്ഥിരതയുള്ള ഉപജീവനാവസരങ്ങളിലൂടെ സാമ്പത്തിക സ്വാശ്രയത്വം ശക്തമാക്കാനും മേള പ്രത്യേക വേദിയൊരുക്കുന്നു.

വിൽപ്പനയ്ക്കൊപ്പം ക്ഷേമപദ്ധതികളെയും പരിചയപ്പെടുത്തുന്നു

പരമ്പരാഗത ഉൽപ്പന്നങ്ങളുടെ വിൽപ്പന പ്രോത്സാഹിപ്പിക്കുന്നതിനൊപ്പം മന്ത്രാലയവും മൂന്ന് ദേശീയ കോർപ്പറേഷനുകളും നടപ്പാക്കുന്ന ക്ഷേമ, ധനസഹായ, വികസന പദ്ധതികളെക്കുറിച്ചും മേള അവബോധം നൽകുന്നു. സന്ദർശകർക്കും പങ്കെടുക്കുന്ന വിഭാഗങ്ങൾക്കും ഈ വിവരങ്ങൾ ലഭ്യമാക്കുന്നുണ്ട്. സാമ്പത്തിക, വികസന സഹായങ്ങൾക്കൊപ്പം വിപണിയുടെ ആവശ്യങ്ങൾ കണക്കിലെടുത്തുള്ള ഇടപെടലുകളും കൂട്ടിച്ചേർക്കുകയാണ് ഈ സംരംഭമെന്ന് ഉദ്യോഗസ്ഥൻ പറഞ്ഞു. ഇതിലൂടെ തൊഴിലാളികൾക്ക് പരമ്പരാഗത കഴിവുകളും കരവിരുതും പ്രയോജനപ്പെടുത്തി പ്രായോഗികമായ ഉപജീവനമാർഗങ്ങൾ കണ്ടെത്താനാകും. സാമ്പത്തിക പരിമിതികളുള്ള വിഭാഗങ്ങളുടെ സാമൂഹിക, സാമ്പത്തിക ശാക്തീകരണത്തിനായി സംരംഭകത്വം പ്രോത്സാഹിപ്പിക്കുകയും വിപണിപ്രവേശനം എളുപ്പമാക്കുകയും സ്ഥിരതയുള്ള ഉപജീവനത്തിന് പിന്തുണ നൽകുകയും ചെയ്യുന്ന മന്ത്രാലയത്തിന്റെ ശ്രമങ്ങളുടെ തുടർച്ചയാണ് ഇത്തരം മേളകൾ. പങ്കെടുക്കുന്ന തൊഴിലാളികൾക്ക് കൂടുതൽ ശ്രദ്ധ ലഭിക്കാനും അവരുടെ ഉൽപ്പന്നങ്ങളെക്കുറിച്ച് കൂടുതൽ പേർ അറിയാനും മേള സഹായിക്കുന്നു. ഇന്ത്യയുടെ സമ്പന്നമായ കൈത്തറി, കരകൗശല പാരമ്പര്യങ്ങളുമായി പൊതുജനങ്ങൾക്ക് കൂടുതൽ അടുത്തിടപഴകാനും ഇത് അവസരമൊരുക്കുന്നു.

.