ജാംനഗർ  / 2026 /  ഒക്ടോബർ 15 

ആയുർവേദ ചികിത്സയിലും ഗവേഷണത്തിലും നിർമിതബുദ്ധിയുടെ സാധ്യതകൾ ചർച്ച ചെയ്യാൻ ജാംനഗറിൽ ദ്വിദിന ദേശീയ സിമ്പോസിയം. ആയുഷ് മന്ത്രാലയത്തിന് കീഴിലുള്ള ഇൻസ്റ്റിറ്റ്യൂട്ട് ഓഫ് ടീച്ചിങ് ആൻഡ് റിസർച്ച് ഇൻ ആയുർവേദയുടെ ആറാം സ്ഥാപകദിനത്തോടനുബന്ധിച്ചാണ് ഒക്ടോബർ 15, 16 തീയതികളിൽ ‘ആയുടെക് നവോന്മേഷ് 2026’ സംഘടിപ്പിക്കുന്നത്. ഡോ. പി. എം. മേത്ത അനുസ്മരണ പ്രഭാഷണവും ഇതോടൊപ്പം നടക്കും. പരമ്പരാഗത ആയുർവേദ അറിവുകളെ ആധുനിക ഡിജിറ്റൽ സാങ്കേതികവിദ്യകളുമായി കൂട്ടിയിണക്കി ഗവേഷണം, നവീകരണം, ആരോഗ്യസേവനങ്ങൾ എന്നിവ മെച്ചപ്പെടുത്താനുള്ള വഴികളാണ് പരിപാടി പരിശോധിക്കുന്നത്.

ലോകാരോഗ്യ സംഘടനയിൽ നിന്നടക്കം വിദഗ്ധർ പങ്കെടുക്കും

സ്ഥാപനത്തിന്റെ ഡയറക്ടർ പ്രൊഫ. ഡോ. തനൂജ നേസരിയുടെ നേതൃത്വത്തിലാണ് പരിപാടി. പാർലമെന്റ് അംഗം പൂനംബെൻ മാഡം മുഖ്യാതിഥിയാകും. സ്വിറ്റ്സർലൻഡിലെ ലോകാരോഗ്യ സംഘടനയുടെ ആരോഗ്യ സംവിധാന വിഭാഗത്തിൽ ഡേറ്റ, ഡിജിറ്റൽ ഹെൽത്ത്, അനലിറ്റിക്സ്, നിർമിതബുദ്ധി എന്നിവയുടെ ചുമതല വഹിക്കുന്ന സമീർ പൂജാരി പങ്കെടുക്കും. ലോകാരോഗ്യ സംഘടനയുടെ ആഗോള പരമ്പരാഗത വൈദ്യശാസ്ത്ര കേന്ദ്രം ഡയറക്ടർ ഡോ. ശ്യാമ കുരുവിളയും പരിപാടിയിലെത്തും. ഗാന്ധിനഗറിലെ നാഷണൽ ഇൻസ്റ്റിറ്റ്യൂട്ട് ഓഫ് ഫാർമസ്യൂട്ടിക്കൽ എജ്യുക്കേഷൻ ആൻഡ് റിസർച്ച് ഡയറക്ടർ പ്രൊഫ. ശൈലേന്ദ്ര സരഫ്, ഗുജറാത്ത് ആയുർവേദ സർവകലാശാല വൈസ് ചാൻസലർ ഡോ. മാനസി ദേശ്പാണ്ഡെ, ആയുഷ് മന്ത്രാലയത്തിലെ മുൻ ആയുർവേദ ഉപദേഷ്ടാവ് ഡോ. മനോജ് നേസരി എന്നിവരും വിശിഷ്ടാതിഥികളാകും.

ഔഷധവികസനം മുതൽ ചികിത്സവരെ ചർച്ച

ആയുർവേദവും ആധുനിക ഡിജിറ്റൽ സാങ്കേതികവിദ്യകളും കൂട്ടിയിണക്കുന്നതിനെക്കുറിച്ച് ഗവേഷണത്തിനും നവീകരണത്തിനും ഊന്നൽ നൽകിയുള്ള ചർച്ചകൾക്ക് വിദഗ്ധരുടെ പങ്കാളിത്തം സഹായിക്കുമെന്നാണ് പ്രതീക്ഷ. ആയുർവേദ ഗവേഷണം, ഔഷധവികസനം, വിദ്യാഭ്യാസം, ആരോഗ്യസേവന വിതരണം എന്നിവയിൽ നിർമിതബുദ്ധിയും ഡിജിറ്റൽ സാങ്കേതികവിദ്യകളും എങ്ങനെ ഉപയോഗിക്കാമെന്ന് ദേശീയ, അന്തർദേശീയ വിദഗ്ധർ ചർച്ച ചെയ്യും. വിദഗ്ധ പ്രഭാഷണങ്ങൾ, അക്കാദമിക ചർച്ചകൾ, ഗവേഷണ-സാങ്കേതിക സഹകരണ ചർച്ചകൾ, സ്ഥാപനതല അംഗീകാരങ്ങൾ നൽകൽ, സാംസ്കാരിക പരിപാടികൾ എന്നിവയും സിമ്പോസിയത്തിലുണ്ടാകും. ഗവേഷണം, ഔഷധവികസനം, ഗുണനിലവാര ഉറപ്പാക്കൽ, മെഡിക്കൽ വിദ്യാഭ്യാസം, ആരോഗ്യസേവനങ്ങൾ എന്നിവയിൽ നിർമിതബുദ്ധി ഉപയോഗിക്കുമ്പോഴുള്ള ധാർമികവും ശാസ്ത്രീയവും പ്രായോഗികവുമായ വശങ്ങൾക്ക് പ്രത്യേക പ്രാധാന്യം നൽകും.

പരമ്പരാഗത അറിവിനൊപ്പം ഡേറ്റ അധിഷ്ഠിത സമീപനവും

ആയുർവേദവും നിർമിതബുദ്ധിയും കൂട്ടിയിണക്കുന്നത് ഗവേഷണത്തിനും നവീകരണത്തിനും പുതിയ വഴികൾ തുറക്കുമെന്ന് ഡയറക്ടർ പ്രൊഫ. ഡോ. തനൂജ നേസരി പറഞ്ഞു. പരമ്പരാഗത അറിവുകളെ ആധുനിക ശാസ്ത്രീയ രീതികളുമായും ഡേറ്റ അധിഷ്ഠിത സമീപനങ്ങളുമായും ബന്ധിപ്പിക്കുന്നത് ആയുർവേദത്തിന്റെ മുന്നേറ്റത്തിന് സഹായിക്കും. അറിവുകളുടെ കൈമാറ്റത്തിനും പൊതുജനാരോഗ്യ സേവനങ്ങൾ ശക്തിപ്പെടുത്തുന്നതിനും ഇത് പ്രയോജനപ്പെടുമെന്നും അവർ വ്യക്തമാക്കി. ആയുർവേദ പണ്ഡിതർ, ഗവേഷകർ, ചികിത്സകർ, സാങ്കേതികവിദഗ്ധർ എന്നിവർക്ക് പൊതുവേദിയൊരുക്കുകയാണ് സ്ഥാപനത്തിന്റെ ലക്ഷ്യം. പരമ്പരാഗത വൈദ്യശാസ്ത്രത്തിൽ ഉത്തരവാദിത്വത്തോടെയുള്ള സാങ്കേതിക നവീകരണവും വിവിധ പഠനശാഖകൾ തമ്മിലുള്ള സഹകരണവും പ്രോത്സാഹിപ്പിക്കാനും പരിപാടി ലക്ഷ്യമിടുന്നു.

ആയുർവേദത്തിൽ ദേശീയ പ്രാധാന്യം നേടിയ ആദ്യ സ്ഥാപനം

2020 ഒക്ടോബർ 15ന് പ്രധാനമന്ത്രി നരേന്ദ്ര മോദിയാണ് സ്ഥാപനം രാജ്യത്തിന് സമർപ്പിച്ചത്. ആയുർവേദ മേഖലയിൽ ദേശീയ പ്രാധാന്യമുള്ള സ്ഥാപനം എന്ന പദവി ലഭിച്ച രാജ്യത്തെ ആദ്യ സ്ഥാപനമാണിത്. ആയുർവേദത്തിലെ ചരിത്രപരവും അക്കാദമികവുമായ പാരമ്പര്യത്തിന് പേരുകേട്ട ജാംനഗറിലാണ് ഇത് പ്രവർത്തിക്കുന്നത്. ബിരുദം മുതൽ ഗവേഷണബിരുദം വരെയുള്ള പഠനപരിപാടികളിലൂടെ വിദ്യാഭ്യാസവും ഗവേഷണവും പ്രോത്സാഹിപ്പിക്കുന്നു. ആയുർവേദ ഫാർമസി, യോഗ, പ്രകൃതിചികിത്സ എന്നിവയുമായി ബന്ധപ്പെട്ട കോഴ്സുകളുമുണ്ട്. വിദ്യാഭ്യാസ-ഗവേഷണ മേഖലകളിൽ 18 ദേശീയ സ്ഥാപനങ്ങളും ഒൻപത് അന്തർദേശീയ സ്ഥാപനങ്ങളും ഉൾപ്പെടെ 27 സ്ഥാപനങ്ങളുമായി ധാരണാപത്രം ഒപ്പുവെച്ചിട്ടുണ്ട്. സ്ഥാപനത്തിന്റെ ആയുർവേദ ഗ്രന്ഥശാലയിൽ 30,000ത്തിലധികം പുസ്തകങ്ങളും 5,000ത്തിലധികം കൈയെഴുത്തുപ്രതികളുമുണ്ട്. നിർദിഷ്ട മാനദണ്ഡങ്ങൾ പാലിച്ച് വൈദ്യശാസ്ത്ര-ഔഷധ ഗവേഷണത്തിനുള്ള പരീക്ഷണമൃഗ പരിപാലന കേന്ദ്രവും പ്രവർത്തിക്കുന്നു.

ദിവസേന ആയിരത്തോളം പേർക്ക് ചികിത്സ

ആശുപത്രികൾക്കും ആരോഗ്യസേവന ദാതാക്കൾക്കുമുള്ള ദേശീയ അക്രഡിറ്റേഷൻ ബോർഡിന്റെ അംഗീകാരമുള്ള 300 കിടക്കകളുള്ള ആശുപത്രിയാണ് സ്ഥാപനം നടത്തുന്നത്. ഇവിടെ പുറംരോഗ വിഭാഗത്തിൽ ദിവസേന ശരാശരി ആയിരത്തോളം രോഗികൾ ചികിത്സ തേടുന്നു. സ്ഥാപിതമായതുമുതൽ 18,47,807 രോഗികൾക്ക് പുറംരോഗ വിഭാഗത്തിലൂടെ വൈദ്യോപദേശവും ചികിത്സയും നൽകിയിട്ടുണ്ട്. 27,520 പേർ കിടത്തിച്ചികിത്സയും നേടി. വിവിധ വിഭാഗങ്ങളിലായി ഇപ്പോൾ 20 പുറംരോഗ വിഭാഗങ്ങൾ പ്രവർത്തിക്കുന്നുണ്ട്. ജാംനഗർ നഗരത്തിലും ജില്ലയിലുമായി എട്ട് സ്ഥലങ്ങളിൽ ആഴ്ചതോറും പുറംരോഗ ചികിത്സാസേവനങ്ങളും നൽകുന്നു. ടെസ്റ്റിങ്-കാലിബ്രേഷൻ ലബോറട്ടറികൾക്കുള്ള ദേശീയ അക്രഡിറ്റേഷൻ ബോർഡിന്റെ അംഗീകാരമുള്ള ആറ് ലബോറട്ടറികളും സ്ഥാപനത്തിലുണ്ട്. ഇവയിൽ ആധുനിക ശാസ്ത്രീയ ഉപകരണങ്ങൾ സജ്ജമാക്കിയിട്ടുണ്ട്. യോഗയ്ക്കും പ്രകൃതിചികിത്സയ്ക്കും പ്രത്യേക സൗകര്യങ്ങളുമുണ്ട്.

.