പതിമൂന്നാം സ്ഥാനത്തുനിന്ന് പത്താം സ്ഥാനത്തേക്ക്

2024-ൽ ലിയോണിൽ നടന്ന ലോക നൈപുണ്യ മത്സരത്തിൽ ഇന്ത്യ പതിമൂന്നാം സ്ഥാനത്തായിരുന്നു. അന്ന് നാല് വെങ്കല മെഡലുകളും മികവിനുള്ള 12 മെഡലുകളും ലഭിച്ചു. ഇത്തവണത്തെ നേട്ടം രാജ്യത്തെ യുവാക്കളുടെ നൈപുണ്യത്തിന് ആഗോളതലത്തിൽ ലഭിച്ച അംഗീകാരമാണെന്ന് നൈപുണ്യ വികസന, സംരംഭകത്വ മന്ത്രാലയം വിലയിരുത്തി.

ആറ് ദിവസം നീണ്ട മത്സരത്തിൽ ഏകദേശം 70 രാജ്യങ്ങളിൽനിന്നും മേഖലകളിൽനിന്നുമായി 1,400-ലധികം യുവാക്കൾ പങ്കെടുത്തു. സെപ്റ്റംബർ 23 മുതൽ 26 വരെയായിരുന്നു പ്രധാന മത്സരങ്ങൾ. സാങ്കേതിക മികവ്, പുതുമ, കൃത്യത, കരകൗശലം എന്നിവ അംഗീകരിച്ചുകൊണ്ട് സെപ്റ്റംബർ 27-ന് നടന്ന സമാപനച്ചടങ്ങിൽ വിജയികളെ ആദരിച്ചു. മത്സരാർഥികൾക്കൊപ്പം വിവിധ രാജ്യങ്ങളുടെ പ്രതിനിധികൾ, വിദഗ്ധർ, വ്യവസായ പ്രതിനിധികൾ എന്നിവരും ചടങ്ങിൽ പങ്കെടുത്തു.

ആറ് വിഭാഗങ്ങളിൽ വെള്ളി

ബേക്കറിയിൽ സ്മൃതി നമ്പ്യാർ, ദന്ത കൃത്രിമാവയവ നിർമാണത്തിൽ മുഹമ്മദ് സലാം, ഡിജിറ്റൽ ഇന്ററാക്ടീവ് മീഡിയ ഡിസൈനിൽ കോവിഡ് അജയ് ഗംഗ്രാഡെ, വ്യാവസായിക ഡിസൈൻ സാങ്കേതികവിദ്യയിൽ പാർഥ് വോറ, ചരക്കുനീക്കത്തിലും ചരക്ക് കൈമാറ്റത്തിലും മെഹ്‌റുന്നിസ ബീഗം, ചില്ലറ വിൽപ്പനയിൽ സാനിയ ജോഷി എന്നിവർ വെള്ളി മെഡൽ നേടി. സൃഷ്ടിപരവും സാങ്കേതികവും സേവന മേഖലയുമായി ബന്ധപ്പെട്ടതുമായ വിഭാഗങ്ങളിലാണ് ഈ നേട്ടങ്ങൾ. വെള്ളി മെഡൽ നേടിയ സ്മൃതി നമ്പ്യാരെ ഇന്ത്യയുടെ മികച്ച മത്സരാർഥിയായും തിരഞ്ഞെടുത്തു.

ഉന്നതമായ തൊഴിൽ നൈപുണ്യം പ്രകടിപ്പിക്കുന്ന മത്സരാർഥികൾക്കാണ് ലോക നൈപുണ്യ മത്സരത്തിന്റെ അന്താരാഷ്ട്ര മാനദണ്ഡപ്രകാരം മികവിനുള്ള മെഡൽ നൽകുന്നത്. സാങ്കേതിക, വ്യാവസായിക, ഡിജിറ്റൽ, സൃഷ്ടിപര, സേവന വിഭാഗങ്ങളിലായി ഇന്ത്യയ്ക്ക് ഇത്തരം 20 മെഡലുകൾ ലഭിച്ചു. വിഭാഗങ്ങളും ജേതാക്കളും ഇവരാണ്:

പുതിയ 11 വിഭാഗങ്ങളിൽ അരങ്ങേറ്റം

ഇത്തവണ 11 പുതിയതും വളർന്നുവരുന്നതുമായ നൈപുണ്യ വിഭാഗങ്ങളിൽ ഇന്ത്യ ആദ്യമായി പങ്കെടുത്തു. ദന്ത കൃത്രിമാവയവ നിർമാണം, ഡിജിറ്റൽ ഇന്ററാക്ടീവ് മീഡിയ ഡിസൈൻ, ഇന്റലിജന്റ് സെക്യൂരിറ്റി ടെക്നോളജി, ലാൻഡ്സ്കേപ്പ് ഗാർഡനിങ്, ഒപ്റ്റോ ഇലക്ട്രോണിക് ടെക്നോളജി, ചില്ലറ വിൽപ്പന, ആളില്ലാ വ്യോമ സംവിധാനങ്ങൾ, വ്യാവസായിക മെക്കാനിക്സ്, സോഫ്റ്റ്‌വെയർ പരിശോധന, ഹെവി വെഹിക്കിൾ ടെക്നോളജി, വിമാന അറ്റകുറ്റപ്പണി എന്നിവയായിരുന്നു അവ. ഭാവിയിലെ തൊഴിലുകൾക്കും പുതിയ സാങ്കേതികവിദ്യകൾക്കും വ്യവസായ ആവശ്യങ്ങൾക്കും കൂടുതൽ പ്രാധാന്യം നൽകുന്നതിന്റെ ഭാഗമായാണ് ഈ വിഭാഗങ്ങളിലെ പങ്കാളിത്തം.

രാസ ലബോറട്ടറി സാങ്കേതികവിദ്യ, ചരക്കുനീക്കവും ചരക്ക് കൈമാറ്റവും, ഫാഷൻ ടെക്നോളജി, ഉൽപ്പന്നങ്ങളുടെ ദൃശ്യാവതരണം, ആരോഗ്യവും സാമൂഹിക പരിചരണവും, ആതിഥേയത്വം തുടങ്ങിയ വിഭാഗങ്ങളിലും യുവതികൾ ഇന്ത്യയെ പ്രതിനിധീകരിച്ചു. തൊഴിലധിഷ്ഠിത വിദ്യാഭ്യാസത്തിലും നൈപുണ്യ വികസനത്തിലും സ്ത്രീകൾക്ക് ലഭിക്കുന്ന അവസരങ്ങൾ വിപുലമാകുന്നതിന്റെ സൂചനയായാണ് മന്ത്രാലയം ഇത് ചൂണ്ടിക്കാട്ടിയത്.

പരിശീലനത്തിലേക്ക് മത്സരാനുഭവം എത്തിക്കും

ഇന്ത്യൻ സംഘത്തെ അഭിനന്ദിച്ച കേന്ദ്ര നൈപുണ്യ വികസന, സംരംഭകത്വ സഹമന്ത്രി സ്വതന്ത്ര ചുമതലയുള്ള ജയന്ത് ചൗധരി, വിദ്യാഭ്യാസ സഹമന്ത്രിയുമാണ്. മുൻ മത്സരത്തെക്കാൾ മെച്ചപ്പെട്ട പ്രകടനം ഇന്ത്യയുടെ നൈപുണ്യ രംഗത്തെ ആഗോള മുന്നേറ്റമാണെന്ന് അദ്ദേഹം പറഞ്ഞു. നേട്ടത്തിന് പിന്നിൽ പ്രവർത്തിച്ച എല്ലാ മത്സരാർഥികളെയും വിദഗ്ധരെയും പരിശീലകരെയും വ്യവസായ പങ്കാളികളെയും അദ്ദേഹം അഭിനന്ദിച്ചു. മെഡലുകൾക്കൊപ്പം യുവാക്കൾ പ്രകടിപ്പിച്ച ആത്മവിശ്വാസവും നിശ്ചയദാർഢ്യവും മികവും അഭിമാനകരമാണെന്നും, ലോകത്തിലെ മികച്ചവരുമായി മത്സരിക്കാൻ എല്ലാ യുവാക്കൾക്കും അവസരം നൽകുന്ന പരിശീലന സംവിധാനം ശക്തിപ്പെടുത്തുമെന്നും അദ്ദേഹം പറഞ്ഞു.

ലോക നൈപുണ്യ ഇന്ത്യയുടെ ഔദ്യോഗിക പ്രതിനിധിയും മന്ത്രാലയത്തിലെ മുതിർന്ന സാമ്പത്തിക ഉപദേഷ്ടാവുമായ മനീഷ സെൻസർമ, മത്സരം പഠനത്തിനുള്ള അവസരം കൂടിയാണെന്ന് പറഞ്ഞു. മാറുന്ന ആഗോള തൊഴിൽ മാനദണ്ഡങ്ങൾ, പുതിയ സാങ്കേതികവിദ്യകൾ, മറ്റ് രാജ്യങ്ങളിലെ മികച്ച രീതികൾ എന്നിവ അടുത്തറിയാൻ ഷാങ്ഹായിലെ അനുഭവം മത്സരാർഥികൾക്കും വിദഗ്ധർക്കും സഹായിച്ചു. ഈ പഠനം മികച്ച പരിശീലന രീതികളിലേക്കും വിലയിരുത്തൽ മാനദണ്ഡങ്ങളിലേക്കും വ്യവസായങ്ങളുമായുള്ള കൂടുതൽ സഹകരണത്തിലേക്കും മാറ്റുകയാണ് അടുത്ത ലക്ഷ്യമെന്ന് അവർ വ്യക്തമാക്കി.

നൈപുണ്യ വികസന, സംരംഭകത്വ മന്ത്രാലയത്തിന്റെ കീഴിൽ ദേശീയ നൈപുണ്യ വികസന കോർപ്പറേഷനാണ് ഇന്ത്യയുടെ പങ്കാളിത്തം ഏകോപിപ്പിച്ചത്. മേഖലാ നൈപുണ്യ കൗൺസിലുകൾ, വ്യവസായ പങ്കാളികൾ, പരിശീലന സ്ഥാപനങ്ങൾ, സാങ്കേതിക വിദഗ്ധർ, മറ്റ് പങ്കാളികൾ എന്നിവരുടെ പിന്തുണയും ലഭിച്ചു. മത്സരത്തിലെ അന്താരാഷ്ട്ര അനുഭവം രാജ്യത്തെ പരിശീലനവും നൈപുണ്യ വിലയിരുത്തലും മെച്ചപ്പെടുത്താൻ സഹായിക്കുമെന്ന് മന്ത്രാലയം വ്യക്തമാക്കി. ഗുണമേന്മയുള്ള നൈപുണ്യ വികസനത്തിലും വ്യവസായ സഹകരണത്തിലും ആഗോള നിലവാരവുമായി താരതമ്യം ചെയ്തുള്ള പരിശീലനത്തിലും തുടർച്ചയായ നിക്ഷേപം ആവശ്യമാണെന്നും മന്ത്രാലയം ചൂണ്ടിക്കാട്ടി.

രണ്ടു വർഷത്തിലൊരിക്കൽ നടക്കുന്ന ലോക നൈപുണ്യ മത്സരം തൊഴിലധിഷ്ഠിത, സാങ്കേതിക മേഖലകളിലെ കഴിവുകൾ പ്രകടിപ്പിക്കാൻ വിവിധ രാജ്യങ്ങളിലെ യുവാക്കൾക്ക് വേദിയൊരുക്കുന്നു. അന്താരാഷ്ട്ര നിലവാരം പ്രോത്സാഹിപ്പിക്കാനും അറിവുകൾ പങ്കിടാനും നൈപുണ്യം ആവശ്യമായ തൊഴിലുകളിലേക്ക് യുവാക്കളെ ആകർഷിക്കാനുമാണ് മത്സരം ലക്ഷ്യമിടുന്നത്.