ബെംഗളൂരു  / 2026  /സെപ്റ്റംബർ 20 

ഇന്ത്യ യെ ലോകത്തിലെ ഏറ്റവും വലിയ പട്ടുനൂൽ ഉത്പാദക രാജ്യമാക്കുകയാണ് ലക്ഷ്യമെന്ന് കേന്ദ്ര ടെക്സ്റ്റൈൽസ് മന്ത്രി ഗിരിരാജ് സിങ് പറഞ്ഞു. 2028-29ഓടെ ഒന്നാം സ്ഥാനത്തെത്താനാണ് ലക്ഷ്യം. ബെംഗളൂരുവിൽ കേന്ദ്ര സിൽക്ക് ബോർഡിന്റെ 77-ാം സ്ഥാപകദിന പരിപാടിയും പട്ടുനൂൽ ഉത്പന്ന-സാങ്കേതിക പ്രദർശനവും ഉദ്ഘാടനം ചെയ്യുകയായിരുന്നു അദ്ദേഹം. രാജ്യത്തെ പട്ടുനൂൽ ഉത്പാദനം 2014ലെ 26,000 മെട്രിക് ടണ്ണിൽ നിന്ന് ഇപ്പോൾ 42,000 മെട്രിക് ടണ്ണായി ഉയർന്നതായും മന്ത്രി പറഞ്ഞു.

കർഷകരുടെ വരുമാനം 12 ലക്ഷം രൂപയിലേക്ക്

മൾബറി ഇലയുടെ വിളവ് വർധിപ്പിക്കുകയും പട്ടുനൂൽപ്പുഴു വളർത്തൽ ചക്രങ്ങളുടെ എണ്ണം കൂട്ടുകയും ചെയ്ത് കർഷകരുടെ വാർഷിക വരുമാനം 10 ലക്ഷം മുതൽ 12 ലക്ഷം രൂപവരെയാക്കാനാണ് ശ്രമം. ജില്ല, സംസ്ഥാനം, ദേശീയ തലങ്ങളിൽ മികച്ച പട്ടുനൂൽ കർഷകനുള്ള പുരസ്കാര മത്സരങ്ങൾ സംഘടിപ്പിക്കണമെന്നും ഗിരിരാജ് സിങ് നിർദേശിച്ചു. ശാസ്ത്രജ്ഞരുടെ പുതിയ കണ്ടുപിടിത്തങ്ങളും സങ്കര ഇനങ്ങളും ആധുനിക യന്ത്രങ്ങളും നേരിട്ട് കർഷകരിലെത്തിക്കണമെന്നും അദ്ദേഹം പറഞ്ഞു.

ചൈനയിലെ ഉത്പാദനക്കുറവ് ഇന്ത്യയ്ക്ക് അവസരം

ചൈനയിലെ ഉത്പാദനം കുറയുന്ന സാഹചര്യത്തിൽ രാജ്യാന്തര വിപണിയിൽ ഇന്ത്യൻ പട്ടുനൂലിന് ആവശ്യകത ഉയരുകയാണെന്ന് മന്ത്രി പറഞ്ഞു. പട്ടുനൂൽ വളർത്തൽ മുതൽ നൂൽ ചുറ്റലും നെയ്ത്തും വരെയുള്ള മുഴുവൻ ശൃംഖലയും ശക്തിപ്പെടുത്താനാണ് കേന്ദ്രത്തിന്റെ ശ്രമം. രാജ്യത്തെ വസ്ത്രവിപണി 300 ബില്യൺ ഡോളറിലെത്തിക്കുകയും നെയ്ത്തുകാർക്കും തൊഴിലാളികൾക്കും സാമ്പത്തിക സുരക്ഷ ഉറപ്പാക്കുകയും ചെയ്യുന്നത് പ്രധാന മുൻഗണനകളാണെന്നും മന്ത്രി വ്യക്തമാക്കി.

പട്ടുനൂൽ ഉത്പാദനത്തിൽ കർണാടക മുന്നിൽ

രാജ്യത്തെ മൊത്തം പട്ടുനൂൽ ഉത്പാദനത്തിൽ കർണാടകയാണ് മുന്നിലെന്ന് കേന്ദ്ര സഹമന്ത്രി ശോഭ കരന്ദ്‌ലാജെ പറഞ്ഞു. അടിസ്ഥാന സൗകര്യ വികസനത്തിനും വ്യവസായ വളർച്ചയ്ക്കും സർക്കാർ പ്രത്യേക ശ്രദ്ധ നൽകുന്നുണ്ട്. ആധുനിക സാങ്കേതികവിദ്യയും ഉയർന്ന സാന്ദ്രതയിലുള്ള ഉത്പാദന രീതികളും ഉപയോഗിച്ച് കയറ്റുമതി നിലവാരത്തിലുള്ള പട്ടുനൂൽ നിർമ്മിക്കാനാണ് ശ്രമം. ഇതിലൂടെ ആഭ്യന്തര ഉത്പാദനം ഉയർത്തുകയും ഇറക്കുമതി ആശ്രയം കുറയ്ക്കുകയും ചെയ്യുമെന്ന് അവർ പറഞ്ഞു.

2030-31ൽ 60,000 മെട്രിക് ടൺ ലക്ഷ്യം

2030-31ഓടെ രാജ്യത്തെ പട്ടുനൂൽ ഉത്പാദനം 60,000 മെട്രിക് ടണ്ണാക്കാനാണ് ലക്ഷ്യമെന്ന് കേന്ദ്ര ടെക്സ്റ്റൈൽസ് മന്ത്രാലയ ജോയിന്റ് സെക്രട്ടറി പദ്മിനി സിങ്‌ല പറഞ്ഞു. ഉയർന്ന വിളവുള്ള പട്ടുനൂൽപ്പുഴു സങ്കര ഇനങ്ങളും പുതിയ യന്ത്രങ്ങളും ഇതിനായി ഉപയോഗിക്കും. ഗുണനിലവാര പരിശോധനയ്ക്കും ഉത്പാദന ശേഷി വർധിപ്പിക്കാനും നിർമിതബുദ്ധി, ഭൂമിശാസ്ത്ര വിവര സംവിധാനം, യന്ത്രപഠനം തുടങ്ങിയ സാങ്കേതികവിദ്യകളും ഉപയോഗിക്കുമെന്നും അവർ അറിയിച്ചു.

28 ശാസ്ത്രജ്ഞർക്ക് നിയമനക്കത്തുകൾ

പരിപാടിയിൽ വിവിധ സ്ഥാപനങ്ങളുമായി കേന്ദ്ര സിൽക്ക് ബോർഡ് ധാരണാപത്രങ്ങൾ കൈമാറി. 28 ശാസ്ത്രജ്ഞർക്ക് നിയമനക്കത്തുകളും വിതരണം ചെയ്തു. മികച്ച ജീവനക്കാർക്കും മേഖലയിൽ പ്രവർത്തിക്കുന്നവർക്കും പുരസ്കാരങ്ങൾ നൽകി. ബോർഡിന്റെ വിവിധ പ്രസിദ്ധീകരണങ്ങളും പുറത്തിറക്കി. കർണാടക, ആന്ധ്രപ്രദേശ്, തെലങ്കാന, തമിഴ്നാട് സംസ്ഥാനങ്ങളിൽ നിന്നുള്ള പട്ടുനൂൽ കർഷകരും നെയ്ത്തുകാരും പരിപാടിയിൽ പങ്കെടുത്തു.