തിരുവനന്തപുരം, 2026 സെപ്റ്റംബർ 5 –

കാന്തപുരം എ.പി. അബൂബക്കർ മുസ്‌ലിയാരുടെ സ്ത്രീകളെ സംബന്ധിച്ച പരാമർശം തള്ളി പാളയം ഇമാം ഡോ. വി.പി. സുഹൈബ് മൗലവി. ഇസ്‌ലാമിൽ ലിംഗ വിവേചനമില്ലെന്നും സ്ത്രീകൾ പുറത്തിറങ്ങരുതെന്ന് എവിടെയും പറയുന്നില്ലെന്നും അദ്ദേഹം വ്യക്തമാക്കി. വെള്ളിയാഴ്ചത്തെ ജുമാ പ്രസംഗത്തിലായിരുന്നു പാളയം ഇമാമിന്റെ പ്രതികരണം.

പൊതുപങ്കാളിത്തത്തിന് വിലക്കില്ല

ഇസ്‌ലാം സ്ത്രീകളുടെ സാമൂഹിക ഇടപെടലിനോ പൊതുപങ്കാളിത്തത്തിനോ എതിരല്ലെന്ന് പാളയം ഇമാം പറഞ്ഞു. സ്ത്രീകൾ പൊതുരംഗത്ത് വരുന്നതിന് ഇസ്‌ലാമിൽ തടസ്സങ്ങളില്ലെന്നും വ്യക്തമാക്കി. പ്രവാചകന്റെ ഭാര്യ ആയിഷ യുദ്ധത്തിൽ പങ്കെടുക്കുകയും യുദ്ധം നയിക്കുകയും ചെയ്തിരുന്നുവെന്നും അദ്ദേഹം ചൂണ്ടിക്കാട്ടി.

കാന്തപുരം തിരുത്തണമെന്ന് ഐ.എസ്.എം

കാന്തപുരത്തിന്റെ പ്രസ്താവന തിരുത്തണമെന്ന് ഐ.എസ്.എം സംസ്ഥാന ജനറൽ സെക്രട്ടറി ഷുക്കൂർ സ്വലാഹിയും ആവശ്യപ്പെട്ടു. സ്ത്രീകൾ പൊതുരംഗത്ത് ഇറങ്ങരുതെന്ന് ഇസ്‌ലാം പറയുന്നില്ലെന്നും കാന്തപുരം വിഭാഗത്തിന്റെ സങ്കുചിത നിലപാടുകളുടെ തുടർച്ചയാണ് പ്രസ്താവനയെന്നും ഷുക്കൂർ ആരോപിച്ചു.

വിവാദമായത് കാന്തപുരത്തിന്റെ നിർദേശം

നബിദിന ആഘോഷങ്ങളിൽ സ്ത്രീകളെ പങ്കെടുപ്പിച്ചതിനെ തുടർന്നാണ് കാന്തപുരം മഹല്ലുകൾക്കും മദ്രസകൾക്കും നിർദേശം നൽകിയത്. അന്യപുരുഷന്മാർക്കിടയിൽ വേദിയിലോ പൊതുസ്ഥലങ്ങളിലോ സ്ത്രീകളെ കൊണ്ടുവരരുതെന്നും ആഘോഷങ്ങൾ അതിരുകടക്കുന്നത് തടയണമെന്നുമായിരുന്നു പ്രസ്താവനയിലെ നിർദേശം. ഇതിനെതിരെ വിവിധ ഭാഗങ്ങളിൽനിന്ന് വിമർശനം ഉയർന്നു.

നിലപാട് വിശദീകരിച്ച് കാന്തപുരം

വിമർശനങ്ങൾക്ക് പിന്നാലെ തൃശൂർ ജില്ലാ മീലാദ് സമ്മേളനത്തിൽ കാന്തപുരം തന്റെ നിലപാട് വിശദീകരിച്ചിരുന്നു. സ്ത്രീകളെ കുഴിച്ചുമൂടണമെന്ന് പറയുന്നവരല്ല തങ്ങളെന്നും ഇസ്‌ലാം അങ്ങനെ പറയുന്നില്ലെന്നും അദ്ദേഹം പറഞ്ഞു. സ്ത്രീകൾക്ക് രണ്ടാം സ്ഥാനം നൽകുന്നുവെന്ന ആരോപണവും തള്ളി. പെൺകുട്ടികൾക്കായി മദ്രസകളും സ്കൂളുകളും ഉൾപ്പെടെ സ്ഥാപനങ്ങൾ നടത്തുന്നുണ്ടെന്നും വ്യക്തമാക്കി.

വിവാദത്തിൽ കൂടുതൽ പ്രതികരണങ്ങൾ

കാന്തപുരത്തിന്റെ പരാമർശത്തിൽ മുഖ്യമന്ത്രി ഉൾപ്പെടെയുള്ളവർ വിമർശനം ഉന്നയിച്ചിരുന്നു. അതിനിടെ യൂത്ത് ലീഗ് മലപ്പുറം ജില്ലാ നേതൃത്വവും കാന്തപുരത്തിന് പിന്തുണയുമായി രംഗത്തെത്തി. കോഴിക്കോട് നടക്കുന്ന മീലാദ് സമ്മേളനത്തിൽ കാന്തപുരം കൂടുതൽ വിശദീകരണം നൽകുമെന്നാണ് വിവരം.