മുംബൈ  /  2026  / സെപ്റ്റംബർ 04

മുംബൈയിലെ ഛത്രപതി ശിവാജി മഹാരാജ് ടെർമിനസിൽ നിന്ന് സാവന്ത്‌വാടി റോഡിലേക്കുള്ള പുതിയ പ്രതിദിന ട്രെയിൻ സർവീസിന് കേന്ദ്ര റെയിൽവേ മന്ത്രി അശ്വിനി വൈഷ്ണവും കേന്ദ്ര വാണിജ്യ-വ്യവസായ മന്ത്രി പീയുഷ് ഗോയലും സെപ്റ്റംബർ മൂന്നിന് പച്ചക്കൊടി വീശി. മഹാരാഷ്ട്ര ഉപമുഖ്യമന്ത്രി ഏക്നാഥ് ഷിൻഡെയും മറ്റ് പ്രമുഖരും ചടങ്ങിൽ പങ്കെടുത്തു. മുംബൈയ്ക്കും കൊങ്കൺ മേഖലയ്ക്കുമിടയിലെ നേരിട്ടുള്ള റെയിൽ ബന്ധം ശക്തിപ്പെടുത്തുകയാണ് പുതിയ സർവീസിന്റെ ലക്ഷ്യം. ഏകദേശം 510 കിലോമീറ്റർ സഞ്ചരിക്കുന്ന ട്രെയിൻ റായ്ഗഡ്, രത്നഗിരി, സിന്ധുദുർഗ് ജില്ലകളിലെ യാത്രക്കാർക്ക് പ്രയോജനപ്പെടും. ഗണേശോത്സവകാലത്തെ യാത്രാ തിരക്ക് നേരിടാൻ ഈ വർഷം 350 പ്രത്യേക ട്രെയിനുകൾ ഓടിക്കുന്നുണ്ടെന്നും ആവശ്യമെങ്കിൽ ഇത് 370 ആയി ഉയർത്താൻ ക്രമീകരണമുണ്ടെന്നും അശ്വിനി വൈഷ്ണവ് അറിയിച്ചു.

മുംബൈ-കൊങ്കൺ യാത്രയ്ക്ക് പുതിയ പ്രതിദിന സർവീസ്

മുംബൈയിലെയും കൊങ്കണിലെയും ജനങ്ങളുടെ ഏറെക്കാലമായുള്ള ആവശ്യമാണ് പുതിയ സർവീസിലൂടെ നിറവേറ്റുന്നതെന്ന് അശ്വിനി വൈഷ്ണവ് പറഞ്ഞു. കൊങ്കണിലെ നിരവധി പ്രധാന പട്ടണങ്ങളെ മുംബൈയുമായി നേരിട്ട് ബന്ധിപ്പിക്കുന്നതാണ് സർവീസ്. വിപുലമായ സ്റ്റോപ്പുകൾ ഉള്ളതിനാൽ റായ്ഗഡ്, രത്നഗിരി, സിന്ധുദുർഗ് ജില്ലകളിലേക്കും തിരിച്ചുമുള്ള യാത്രക്കാർക്ക് കൂടുതൽ സൗകര്യം ലഭിക്കും.

ഗണേശോത്സവത്തോടനുബന്ധിച്ച് യാത്രക്കാരുടെ സഞ്ചാരം സുഗമമാക്കാൻ ഈ വർഷം 350 പ്രത്യേക ട്രെയിനുകൾ ഓടിക്കുന്നുണ്ടെന്ന് റെയിൽവേ മന്ത്രി പറഞ്ഞു. ആവശ്യം വന്നാൽ പ്രത്യേക ട്രെയിനുകളുടെ എണ്ണം 370 ആയി ഉയർത്താനുള്ള ക്രമീകരണവും ഒരുക്കിയിട്ടുണ്ട്.

പുതിയ പ്രതിദിന ട്രെയിൻ സർവീസ് മഹാരാഷ്ട്രയിലെ ജനങ്ങൾക്ക്, പ്രത്യേകിച്ച് ഗണേശോത്സവം അടുത്തിരിക്കെ, വലിയ സന്തോഷം നൽകുന്നതാണെന്ന് പീയുഷ് ഗോയൽ പറഞ്ഞു. ഇത് മറ്റൊരു ട്രെയിൻ ആരംഭിക്കുന്നതിൽ മാത്രം ഒതുങ്ങുന്നതല്ലെന്നും കൊങ്കൺ മേഖലയുടെ വികസനയാത്രയിലെ പ്രധാന നാഴികക്കല്ലാണെന്നും അദ്ദേഹം വ്യക്തമാക്കി. സുരക്ഷിതവും വേഗത്തിലുള്ളതും വിശ്വസനീയവുമായ യാത്ര ഒരുക്കുന്നതിലൂടെ മുംബൈയിലെയും കൊങ്കണിലെയും ലക്ഷക്കണക്കിന് കുടുംബങ്ങളെ കൂടുതൽ അടുപ്പിക്കാൻ സർവീസിന് കഴിയുമെന്നും ഗോയൽ പറഞ്ഞു.

മത്സ്യത്തൊഴിലാളികൾക്കും വിദ്യാർത്ഥികൾക്കും തൊഴിലാളികൾക്കും നേട്ടം

ഈ റൂട്ടിൽ ചരക്കുനീക്കം വർധിക്കുമ്പോൾ മത്സ്യത്തൊഴിലാളികൾക്കും മറ്റ് പ്രാദേശിക ഉൽപാദകർക്കും അവരുടെ ഉൽപന്നങ്ങൾ കൂടുതൽ വേഗത്തിൽ മുംബൈയിലെത്തിക്കാൻ കഴിയുമെന്ന് പീയുഷ് ഗോയൽ പറഞ്ഞു. മെച്ചപ്പെട്ട റെയിൽ ബന്ധം കൊങ്കണിൽ തൊഴിലവസരങ്ങൾ സൃഷ്ടിക്കുമെന്നും ജോലി തേടി യുവാക്കൾ മറ്റു സ്ഥലങ്ങളിലേക്ക് കുടിയേറേണ്ട സാഹചര്യം കുറയ്ക്കുമെന്നും അദ്ദേഹം വ്യക്തമാക്കി.

വിദ്യാർത്ഥികൾക്കും ജീവനക്കാർക്കും കുടുംബങ്ങൾക്കും പുതിയ സർവീസ് പ്രയോജനപ്പെടും. മുംബൈയിൽ പഠിക്കുകയോ ജോലി ചെയ്യുകയോ ചെയ്യുന്ന കൊങ്കൺ സ്വദേശികൾക്ക് കുടുംബങ്ങളുമായി കൂടുതൽ അടുത്ത ബന്ധം നിലനിർത്താനും സൗകര്യപ്രദമായി യാത്ര ചെയ്യാനും കഴിയും. മുംബൈയിലെ ഉന്നത വിദ്യാഭ്യാസ അവസരങ്ങളും ആരോഗ്യസേവനങ്ങളും കൊങ്കണിലെ ജനങ്ങൾക്ക് കൂടുതൽ എളുപ്പത്തിൽ ലഭ്യമാകുമെന്നും ഗോയൽ പറഞ്ഞു.

ഗണേശോത്സവത്തിന് സ്വന്തം നാട്ടിലേക്ക് പോകുന്ന കൊങ്കൺ സ്വദേശികൾക്കും കുടിയേറ്റ തൊഴിലാളികൾക്കും ഭക്തർക്കും പുതിയ സർവീസ് വലിയ സമ്മാനമാണെന്ന് മഹാരാഷ്ട്ര ഉപമുഖ്യമന്ത്രി ഏക്നാഥ് ഷിൻഡെ പറഞ്ഞു. മുംബൈ-അഹമ്മദാബാദ് ബുള്ളറ്റ് ട്രെയിൻ പദ്ധതി, വന്ദേ ഭാരത് ട്രെയിനുകൾ, രാജ്യത്തെ റെയിൽ ശൃംഖലയുടെ വികസനം എന്നിവയുൾപ്പെടെയുള്ള പ്രധാന നേട്ടങ്ങളും അദ്ദേഹം ചൂണ്ടിക്കാട്ടി.

741 കിലോമീറ്റർ നീളമുള്ള കൊങ്കൺ റെയിൽവേ പാതയുടെ വൈദ്യുതീകരണം റെക്കോർഡ് സമയത്ത് പൂർത്തിയാക്കിയതും ഷിൻഡെ എടുത്തുപറഞ്ഞു. ഇതിലൂടെ കൂടുതൽ പരിസ്ഥിതി സൗഹൃദമായ യാത്ര സാധ്യമായതോടൊപ്പം ട്രെയിനുകളുടെ വേഗവും വർധിച്ചതായി അദ്ദേഹം പറഞ്ഞു.

രാത്രി മുംബൈയിൽ നിന്ന് പുറപ്പെട്ട് ഉച്ചയ്ക്ക് സാവന്ത്‌വാടിയിൽ

ട്രെയിൻ ഛത്രപതി ശിവാജി മഹാരാജ് ടെർമിനസിൽ നിന്ന് രാത്രി 11.55ന് പുറപ്പെട്ട് പിറ്റേന്ന് ഉച്ചയ്ക്ക് 2.15ന് സാവന്ത്‌വാടി റോഡിലെത്തും. മടക്കയാത്രയിൽ സാവന്ത്‌വാടി റോഡിൽ നിന്ന് വൈകിട്ട് 5.20ന് പുറപ്പെട്ട് പിറ്റേന്ന് രാവിലെ 6.40ന് ഛത്രപതി ശിവാജി മഹാരാജ് ടെർമിനസിലെത്തും. ഇതിലൂടെ മുംബൈയിൽ നിന്ന് കൊങ്കണിലേക്ക് രാത്രിയാത്ര നടത്താനും മടക്കയാത്രയിൽ രാവിലെ മുംബൈയിലെത്താനും കഴിയും.

ട്രെയിൻ നമ്പർ 15087 ഛത്രപതി ശിവാജി മഹാരാജ് ടെർമിനസ്-സാവന്ത്‌വാടി റോഡ് എക്സ്പ്രസായും 15088 സാവന്ത്‌വാടി റോഡ്-ഛത്രപതി ശിവാജി മഹാരാജ് ടെർമിനസ് എക്സ്പ്രസായും പ്രതിദിനം സർവീസ് നടത്തും.

ദാദർ, താനെ, പൻവേൽ, പെൻ, റോഹ, മൻഗാവ്, വീർ, ഖേഡ്, ചിപ്ലൂൺ, സാവർദ, അരവലി റോഡ്, സംഗമേശ്വർ റോഡ്, രത്നഗിരി, അഡാവലി, വിലവഡെ, രാജാപുർ റോഡ്, വൈഭവ്‌വാടി റോഡ്, നന്ദ്ഗാവ്, കൺകാവലി, സിന്ധുദുർഗ്, കുഡാൽ, സാവന്ത്‌വാടി റോഡ് എന്നിവിടങ്ങളിൽ ട്രെയിനിന് സ്റ്റോപ്പുണ്ടാകും. ഇതിലൂടെ സാവന്ത്‌വാടിക്ക് പുറമേ കൊങ്കൺ മേഖലയിലെ നിരവധി പ്രധാന പട്ടണങ്ങളിലേക്കും പ്രദേശങ്ങളിലേക്കും യാത്രക്കാർക്ക് എത്താനാകും.

രത്നഗിരി, സിന്ധുദുർഗ്, കൺകാവലി, കുഡാൽ, സാവന്ത്‌വാടി തുടങ്ങിയ വിനോദസഞ്ചാര കേന്ദ്രങ്ങളിലേക്കുള്ള റെയിൽ യാത്ര കൂടുതൽ എളുപ്പമാകുന്നതോടെ കൊങ്കണിലെ വിനോദസഞ്ചാരത്തിനും പുതിയ സർവീസ് കരുത്താകും. പ്രാദേശിക വിനോദസഞ്ചാര സ്ഥാപനങ്ങൾക്കും അനുബന്ധ സേവനങ്ങൾക്കും കൂടുതൽ അവസരങ്ങൾ ലഭിക്കും.

വിദ്യാർത്ഥികൾ, ജീവനക്കാർ, വ്യാപാരികൾ, കുടുംബങ്ങൾ തുടങ്ങിയ സ്ഥിരം യാത്രക്കാർക്കും മുംബൈയ്ക്കും കൊങ്കണിനുമിടയിൽ ആശ്രയിക്കാവുന്ന മറ്റൊരു റെയിൽ യാത്രാമാർഗം ലഭിക്കും. ആളുകളുടെ സഞ്ചാരം മെച്ചപ്പെടുന്നതോടെ മുംബൈയും കൊങ്കൺ മേഖലയും തമ്മിലുള്ള സാമ്പത്തിക ബന്ധം ശക്തമാകുകയും പ്രാദേശിക സാമ്പത്തിക പ്രവർത്തനങ്ങൾക്ക് പിന്തുണ ലഭിക്കുകയും ചെയ്യും.

ഉത്സവങ്ങൾ, അവധിക്കാലം, വിനോദസഞ്ചാര സീസൺ തുടങ്ങിയ സമയങ്ങളിൽ മുംബൈ-കൊങ്കൺ റൂട്ടിൽ യാത്രക്കാരുടെ എണ്ണം വലിയ തോതിൽ വർധിക്കുമ്പോൾ അധിക യാത്രാസൗകര്യം ഒരുക്കാനും സർവീസിന് കഴിയും. ആധുനികവും സൗകര്യപ്രദവുമായ കോച്ചുകളുള്ള എൽഎച്ച്ബി റേക്കാണ് സർവീസിനായി ഉപയോഗിക്കുക.

മുംബൈ റെയിൽവേയ്ക്ക് 18,000 കോടിയുടെ പദ്ധതികൾ

മുംബൈ സബർബൻ റെയിൽവേയുടെ ശേഷി കൂട്ടാനും യാത്രാസൗകര്യങ്ങൾ മെച്ചപ്പെടുത്താനും നിരവധി പ്രധാന പ്രവൃത്തികൾ നടക്കുന്നതായി അശ്വിനി വൈഷ്ണവ് പറഞ്ഞു. ഏകദേശം 18,000 കോടി രൂപയുടെ പദ്ധതികളാണ് നിലവിൽ മുംബൈയിൽ പുരോഗമിക്കുന്നത്.

12 കോച്ചുകളുള്ള ട്രെയിനുകൾക്കായി രൂപകൽപ്പന ചെയ്ത പ്ലാറ്റ്ഫോമുകൾ 15 കോച്ചുകളുള്ള ട്രെയിനുകൾക്ക് അനുയോജ്യമാക്കുന്ന പ്രവൃത്തി ഘട്ടംഘട്ടമായി നടക്കുകയാണ്. നിരവധി സ്ഥലങ്ങളിൽ പ്രവൃത്തി ഇതിനകം പൂർത്തിയായി. ഇതിലൂടെ സബർബൻ റെയിൽവേയുടെ ശേഷി വലിയ തോതിൽ വർധിക്കുകയും മുംബൈക്കാരുടെ ദൈനംദിന യാത്ര മെച്ചപ്പെടുകയും ചെയ്യുമെന്ന് വൈഷ്ണവ് പറഞ്ഞു.

മുംബൈ സബർബൻ ശൃംഖലയുടെ ശേഷിയും കാര്യക്ഷമതയും വർധിപ്പിക്കാൻ നിലവിലുള്ള സിഗ്നലിങ് സംവിധാനം ആധുനിക സംവിധാനത്തിലേക്ക് മാറ്റുകയാണെന്നും അദ്ദേഹം അറിയിച്ചു. മുംബൈയുടെ ആവശ്യം വേഗത്തിൽ നിറവേറ്റാൻ 238 പുതിയ എസി ലോക്കൽ ട്രെയിൻ റേക്കുകൾക്കും അനുമതി നൽകിയിട്ടുണ്ട്. ആദ്യ എസി ലോക്കൽ ട്രെയിനിന്റെ വിതരണം 2027ൽ ആരംഭിക്കും. പുതിയ തലമുറയിലെ ശീതീകരിച്ച ലോക്കൽ ട്രെയിനുകളും കൂടുതൽ ശേഷിയും മെച്ചപ്പെട്ട യാത്രാസൗകര്യവും മുംബൈ സബർബൻ റെയിൽവേയിൽ വലിയ മാറ്റമുണ്ടാക്കുമെന്ന് മന്ത്രി പറഞ്ഞു.

കിഴക്കൻ, പടിഞ്ഞാറൻ സമർപ്പിത ചരക്ക് ഇടനാഴികൾ രാജ്യത്തിന്റെ പ്രധാന ശക്തിയാണെന്നും രണ്ടും ഇപ്പോൾ പൂർണമായും പൂർത്തിയായെന്നും വൈഷ്ണവ് പറഞ്ഞു. കേന്ദ്ര ബജറ്റിൽ പ്രഖ്യാപിച്ച പുതിയ കിഴക്ക്-പടിഞ്ഞാറ് സമർപ്പിത ചരക്ക് ഇടനാഴിയെക്കുറിച്ചും അദ്ദേഹം വിശദീകരിച്ചു.

ഡാങ്കുനിയിൽ നിന്ന് സൂറത്തിലേക്കുള്ള പുതിയ ഇടനാഴി വിദർഭ, മറാത്ത്‌വാഡ, പടിഞ്ഞാറൻ മഹാരാഷ്ട്ര എന്നിവിടങ്ങളിലെ നിരവധി പ്രദേശങ്ങൾക്ക് റെയിൽ ബന്ധം ലഭിക്കുന്ന രീതിയിലാണ് രൂപകൽപ്പന ചെയ്യുന്നത്. വാർധയിലേക്കും നാസിക്കിലെ തുറമുഖത്തേക്കും ബന്ധം നൽകുന്നതിലൂടെ മഹാരാഷ്ട്രയിലെ വ്യാവസായിക-ഗ്രാമീണ വികസനത്തിന് ശക്തമായ ശൃംഖല ഒരുക്കുകയാണ് ലക്ഷ്യം.

അതിവേഗ റെയിൽ പദ്ധതിയും കടലിനടിയിലെ തുരങ്കവും

മുംബൈ-അഹമ്മദാബാദ് അതിവേഗ റെയിൽ പദ്ധതിയുടെ പ്രവൃത്തി അതിവേഗം പുരോഗമിക്കുന്നതായി അശ്വിനി വൈഷ്ണവ് പറഞ്ഞു. ബാന്ദ്ര കുർള കോംപ്ലക്സിനെയും താനെയെയും ബന്ധിപ്പിക്കുന്ന കടലിനടിയിലെ റെയിൽ തുരങ്കത്തിന്റെ നിർമാണവും പുരോഗമിക്കുകയാണ്. വിഖ്രോളിയിൽ നിന്നുള്ള ഒരു ടണൽ ബോറിങ് മെഷീനും ഘൻസോളിയിൽ നിന്നുള്ള മറ്റൊരു മെഷീനും ഇപ്പോൾ തുരങ്ക നിർമാണത്തിൽ പ്രവർത്തിക്കുന്നുണ്ട്.

മഹാരാഷ്ട്ര നിയമസഭാ സ്പീക്കർ രാഹുൽ നർവേക്കർ, മഹാരാഷ്ട്ര തുറമുഖ വികസന-മത്സ്യബന്ധന മന്ത്രി നിതേഷ് റാണെ, മുംബൈ മേയർ ഋതു താവ്‌ഡെ എന്നിവരും മറ്റ് പ്രമുഖരും ചടങ്ങിൽ പങ്കെടുത്തു.

.