ന്യൂഡൽഹി, 2026 സെപ്റ്റംബർ 02 –

കാറ്റിൽ നിന്നുള്ള വൈദ്യുതി ഉൽപാദനത്തിൽ റെക്കോർഡ് വളർച്ച നേടിയതിന് പിന്നാലെ കടലിലെ കാറ്റിൽ നിന്നുള്ള വൈദ്യുതി ഉൽപാദനം വ്യാപിപ്പിക്കാൻ കേന്ദ്ര സർക്കാർ നീക്കം ശക്തമാക്കി. 2025-26 സാമ്പത്തിക വർഷത്തിൽ രാജ്യത്ത് പുതുതായി 6.05 ജിഗാവാട്ട് കാറ്റാടി വൈദ്യുതി ശേഷി കൂട്ടിച്ചേർത്തു. ഇതുവരെ രേഖപ്പെടുത്തിയ ഏറ്റവും ഉയർന്ന വാർഷിക വർധനയാണിത്. 2026 ജൂലൈ 31 വരെയുള്ള കണക്കുപ്രകാരം രാജ്യത്തെ മൊത്തം സ്ഥാപിത കാറ്റാടി വൈദ്യുതി ശേഷി 58.14 ജിഗാവാട്ടിലെത്തി.

കടലിലെ കാറ്റിൽ നിന്ന് ഒരു ജിഗാവാട്ട്

കേന്ദ്ര നവ-പുനരുപയോഗ ഊർജ മന്ത്രാലയ ജോയിന്റ് സെക്രട്ടറി രാജേഷ് കുൽഹാരിയാണ് കടലിലെ കാറ്റിൽ നിന്നുള്ള വൈദ്യുതി ഉൽപാദനത്തിന് കൂടുതൽ പ്രാധാന്യം നൽകുന്നതായി വ്യക്തമാക്കിയത്. വിൻഡർജി ഇന്ത്യ 2026ന്റെ ഉദ്ഘാടനവുമായി ബന്ധപ്പെട്ട ചടങ്ങിലായിരുന്നു പ്രതികരണം. ഇന്ത്യയിലെ ആദ്യ ഒരു ജിഗാവാട്ട് കടൽക്കാറ്റ് വൈദ്യുതി ശേഷി വികസിപ്പിക്കാൻ വയബിലിറ്റി ഗ്യാപ് ഫണ്ടിങ് പദ്ധതിയിലൂടെ 7,453 കോടി രൂപ സർക്കാർ അനുവദിച്ചിട്ടുണ്ട്. ഗുജറാത്ത്, തമിഴ്നാട് തീരങ്ങളിൽ 500 മെഗാവാട്ട് വീതമാണ് ലക്ഷ്യമിടുന്നത്.

സാധ്യത 71 ജിഗാവാട്ടോളം

ഗുജറാത്ത്, തമിഴ്നാട് തീരങ്ങളിലായി ഏകദേശം 71 ജിഗാവാട്ട് കടൽക്കാറ്റ് വൈദ്യുതി സാധ്യതയുണ്ടെന്നാണ് വിലയിരുത്തൽ. വൈദ്യുതി നിരക്കിലെ വ്യത്യാസം പരിഹരിക്കാൻ കൂടുതൽ സഹായം ലഭ്യമാക്കുന്നതിനായി ലോകബാങ്കുമായും കെ.പി.എം.ജിയുമായും മന്ത്രാലയം സഹകരിക്കുന്നുണ്ട്. എന്നാൽ വയബിലിറ്റി ഗ്യാപ് ഫണ്ടിങ് അനുവദിച്ചിട്ടും ഗുജറാത്തിലും തമിഴ്നാട്ടിലും കാര്യമായ പദ്ധതിപ്രസ്താവനകൾ ഇതുവരെ ലഭിച്ചിട്ടില്ലെന്ന് വിദഗ്ധർ ചൂണ്ടിക്കാട്ടുന്നു.

2030ൽ ലക്ഷ്യം 100 ജിഗാവാട്ട്

2030ഓടെ രാജ്യത്തെ കാറ്റാടി വൈദ്യുതി ശേഷി 100 ജിഗാവാട്ടിലെത്തിക്കുകയാണ് വ്യവസായ മേഖലയുടെ ലക്ഷ്യം. ഇതിനായി ഓരോ വർഷവും ശരാശരി പത്ത് ജിഗാവാട്ടോളം ശേഷി കൂട്ടേണ്ടിവരും. ഇന്ത്യൻ വിൻഡ് ടർബൈൻ മാനുഫാക്ചറേഴ്സ് അസോസിയേഷന്റെ പഠനപ്രകാരം ഏകദേശം 43 ജിഗാവാട്ടിന്റെ പദ്ധതികൾ നിലവിൽ നിർമാണഘട്ടത്തിലുണ്ട്. 150 മീറ്റർ ഉയരത്തിലുള്ള ടർബൈനുകൾ കണക്കാക്കിയാൽ രാജ്യത്തെ കാറ്റാടി വൈദ്യുതി സാധ്യത 1,164 ജിഗാവാട്ട് വരെയാണ്.

ടർബൈൻ നിർമാണവും കയറ്റുമതിയും കൂടി

ഇന്ത്യയിലെ കാറ്റാടി ടർബൈൻ നിർമാണശേഷി പ്രതിവർഷം 24 ജിഗാവാട്ടായി ഉയർന്നു. 2014ൽ ഇത് പത്ത് ജിഗാവാട്ടായിരുന്നു. ഉൽപാദനത്തിലെ 70 മുതൽ 80 ശതമാനം വരെ മൂല്യവർധന രാജ്യത്തിനകത്താണ് നടക്കുന്നത്. 2025-26ൽ കാറ്റാടി വൈദ്യുതി ഉപകരണങ്ങളുടെ കയറ്റുമതി 12,000 കോടി രൂപ കടന്നു. ഏകദേശം 50 ശതമാനം വർധനയാണ് രേഖപ്പെടുത്തിയത്. കാറ്റാടി വൈദ്യുതി വിതരണ ശൃംഖലയ്ക്കായി രാജ്യത്തെ ആദ്യ പോർട്ടലായ ‘ഡബ്ല്യു.ടി-മാരുത്’ മന്ത്രാലയം ആരംഭിച്ചിട്ടുണ്ട്.

പഴയ ടർബൈനുകൾ മാറ്റിയാൽ കൂടുതൽ വൈദ്യുതി

രാജ്യത്തെ ഉയർന്ന കാറ്റുള്ള മേഖലകളിൽ ഒരു മെഗാവാട്ടിൽ താഴെ ശേഷിയുള്ള 19,000ത്തിലധികം പഴയ ടർബൈനുകളുണ്ട്. ഇവ നവീകരിക്കുന്നതിലൂടെ 25.4 ജിഗാവാട്ടിന്റെ അധിക സാധ്യതയുണ്ടെന്നാണ് വിലയിരുത്തൽ. ആധുനിക ടർബൈനുകൾ ഉപയോഗിച്ചാൽ ശേഷി ഉപയോഗനിരക്ക് നിലവിലെ 14 മുതൽ 15 ശതമാനത്തിൽ നിന്ന് ഏകദേശം 30 ശതമാനമായി ഉയർത്താനാകും. വിൻഡർജി ഇന്ത്യ 2026 ഒക്ടോബർ ഏഴ് മുതൽ ഒമ്പത് വരെ ചെന്നൈ ട്രേഡ് സെന്ററിൽ നടക്കും.