വാഷിങ്ടൺ, 2026 ഓഗസ്റ്റ് 20 –

ഗൾഫിലെ സൈനിക വിന്യാസം പുനഃപരിശോധിക്കുന്നു

ഇറാനുമായുള്ള യുദ്ധത്തിൽ അമേരിക്കൻ സൈനിക കേന്ദ്രങ്ങൾക്ക് വലിയ നാശനഷ്ടമുണ്ടായതിന് പിന്നാലെ പേർഷ്യൻ ഗൾഫിലെ സൈനിക സാന്നിധ്യം കുറയ്ക്കുന്നത് പെന്റഗൺ പരിഗണിക്കുന്നു. യുദ്ധം അവസാനിച്ച ശേഷമുള്ള സൈനിക വിന്യാസം എങ്ങനെയാകണമെന്നാണ് ഇപ്പോഴത്തെ ചർച്ച. തകർന്ന സൈനിക കേന്ദ്രങ്ങൾ അതേ രീതിയിൽ പുനർനിർമിക്കണമോയെന്നും പരിശോധിക്കുന്നുണ്ട്. എന്നാൽ ഇത് ഔദ്യോഗികമായി പ്രഖ്യാപിച്ച അവലോകനമല്ല. ചർച്ചകൾ പ്രാഥമിക ഘട്ടത്തിലാണ്.

200ലേറെ കേന്ദ്രങ്ങൾക്ക് നാശം

ജോർദാൻ മുതൽ ഒമാൻ വരെ ഏകദേശം 20 കേന്ദ്രങ്ങളിലായി സാധാരണയായി 40,000 അമേരിക്കൻ സൈനികരാണ് വിന്യസിക്കപ്പെടുന്നത്. ബഹ്റൈനിലാണ് അമേരിക്കയുടെ അഞ്ചാം നാവികസേനയുടെ ആസ്ഥാനം. കുവൈത്ത്, ഖത്തർ ഉൾപ്പെടെയുള്ള ഗൾഫ് രാജ്യങ്ങളിലും പ്രധാന സൈനിക കേന്ദ്രങ്ങളുണ്ട്. ഇറാന്റെ മിസൈൽ, ഡ്രോൺ ആക്രമണങ്ങളിൽ 200ലേറെ അമേരിക്കൻ സൈനിക കേന്ദ്രങ്ങൾക്ക് നാശമുണ്ടായെന്നാണ് റിപ്പോർട്ട്. കുവൈത്തിലെ സൈനിക കേന്ദ്രത്തിലുണ്ടായ മാർച്ചിലെ ആക്രമണത്തിൽ ആറ് അമേരിക്കൻ സൈനികരും കൊല്ലപ്പെട്ടു.

സൈന്യത്തെ പടിഞ്ഞാറോട്ട് മാറ്റാനും ആലോചന

ഇറാന്റെ ആക്രമണ പരിധിയിൽനിന്ന് സൈനികരെയും ആയുധങ്ങളെയും മാറ്റുന്നതും ചർച്ചയിലുണ്ട്. ജോർദാൻ, ഇസ്രയേൽ, സൗദി അറേബ്യയുടെ ചെങ്കടൽ തീരം എന്നിവിടങ്ങളിലേക്ക് സൈനിക വിന്യാസത്തിന്റെ ഒരു ഭാഗം മാറ്റാനാണ് ആലോചന. കുവൈത്തിലെ ചില കേന്ദ്രങ്ങൾ അടയ്ക്കുന്നതും യു.എ.ഇ., ജോർദാൻ, ബഹ്റൈൻ എന്നിവിടങ്ങളിലുള്ള സൈനികരെ കൂടുതൽ സുരക്ഷിത മേഖലകളിലേക്ക് മാറ്റുന്നതും പരിഗണനയിലുണ്ട്.

വ്യോമപ്രതിരോധ ആയുധങ്ങൾക്കും വലിയ ചെലവ്

യുദ്ധത്തിനിടെ അമേരിക്കൻ സൈനികരെ സംരക്ഷിക്കാൻ ആയിരത്തിലേറെ അത്യാധുനിക വ്യോമപ്രതിരോധ മിസൈലുകൾ പെന്റഗൺ ഉപയോഗിച്ചു. ഇതോടെ പാട്രിയറ്റ്, താഡ് പ്രതിരോധ സംവിധാനങ്ങളുടെ മിസൈൽ ശേഖരത്തിനും വലിയ സമ്മർദമുണ്ടായി. ഗൾഫിലെ നിലവിലെ സൈനിക കേന്ദ്രങ്ങൾ ഇറാന്റെ ആക്രമണത്തിന് എത്രത്തോളം എളുപ്പത്തിൽ ഇരയാകാമെന്നതും യുദ്ധം തെളിയിച്ചതായാണ് വിലയിരുത്തൽ.

യുദ്ധച്ചെലവ് 3,750 കോടി ഡോളറിലേക്ക്

സെപ്റ്റംബർ അവസാനത്തോടെ ഇറാൻ യുദ്ധത്തിന്റെ ചെലവ് ഏകദേശം 3,750 കോടി ഡോളറിലെത്തുമെന്നാണ് പെന്റഗണിന്റെ കണക്ക്. തകർന്ന സൈനിക കേന്ദ്രങ്ങൾ പുനർനിർമിക്കാനുള്ള ചെലവ് ഇതിൽ ഉൾപ്പെടുന്നില്ല. അതിനാൽ കേന്ദ്രങ്ങൾ പുനർനിർമിക്കണോ അതോ ഗൾഫിലെ അമേരിക്കൻ സൈനിക വിന്യാസത്തിന്റെ രീതി തന്നെ മാറ്റണോ എന്നതാണ് പ്രധാന ചോദ്യം. അന്തിമ തീരുമാനം എടുത്തിട്ടില്ല. മുതിർന്ന ഭരണനേതൃത്വത്തിന്റെ അനുമതി ലഭിച്ചാൽ മാത്രമേ സൈനിക സാന്നിധ്യത്തിൽ വലിയ മാറ്റമുണ്ടാകൂ.