ന്യൂഡൽഹി / 2026/ ജൂലൈ 29
കേരളത്തിലെ പരമ്പരാഗത മത്സ്യത്തൊഴിലാളികളുടെയും മത്സ്യകർഷകരുടെയും ക്ഷേമത്തിനായി കഴിഞ്ഞ അഞ്ചു വർഷവും 2026-27 സാമ്പത്തിക വർഷവും ചേർന്ന് 1,413.91 കോടി രൂപയുടെ പദ്ധതികൾക്ക് കേന്ദ്രസർക്കാർ അംഗീകാരം നൽകി. പ്രധാനമന്ത്രി മത്സ്യസമ്പദ യോജനയുടെ കീഴിലാണ് കേരള സർക്കാരിന്റെ നിർദേശങ്ങൾക്ക് അംഗീകാരം നൽകിയത്. മത്സ്യോൽപ്പാദനം വർധിപ്പിക്കുക, തൊഴിലവസരങ്ങൾ സൃഷ്ടിക്കുക, മത്സ്യത്തൊഴിലാളികളുടെ സുരക്ഷയും സാമ്പത്തിക നിലയും മെച്ചപ്പെടുത്തുക എന്നിവയാണ് പദ്ധതികളുടെ ലക്ഷ്യം. ലോക്സഭയിലെ ചോദ്യത്തിന് മറുപടിയായി കേന്ദ്ര ഫിഷറീസ്, മൃഗസംരക്ഷണ, ക്ഷീരവികസന മന്ത്രി രാജീവ് രഞ്ജൻ സിങ് എന്ന ലാലൻ സിങ്ങാണ് വിവരങ്ങൾ അറിയിച്ചത്.
മത്സ്യമേഖലയ്ക്കായി വിവിധ കേന്ദ്രപദ്ധതികൾ
കേരളം ഉൾപ്പെടെ എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും മത്സ്യമേഖലയുടെ സമഗ്ര വികസനത്തിനായി കേന്ദ്ര ഫിഷറീസ് വകുപ്പ് വിവിധ പദ്ധതികൾ നടപ്പാക്കുന്നുണ്ട്. 2015-16 മുതൽ 2019-20 വരെ നീലവിപ്ലവ പദ്ധതി നടപ്പാക്കി. 2018-19 മുതൽ മത്സ്യമേഖലയ്ക്കും കിസാൻ ക്രെഡിറ്റ് കാർഡ് സൗകര്യം വ്യാപിപ്പിച്ചു.
2018-19 മുതൽ 2025-26 വരെ ഫിഷറീസ്, അക്വാകൾച്ചർ അടിസ്ഥാനസൗകര്യ വികസനനിധിയും നടപ്പാക്കി. 2020-21 മുതൽ 2026-27 വരെയാണ് പ്രധാനമന്ത്രി മത്സ്യസമ്പദ യോജനയുടെ കാലാവധി. 2023-24 മുതൽ 2026-27 വരെ പ്രധാനമന്ത്രി മത്സ്യ കിസാൻ സമൃദ്ധി സഹയോജന എന്ന പുതിയ കേന്ദ്ര ഉപപദ്ധതിയും നടപ്പാക്കുന്നുണ്ട്.
വള്ളവും വലയും മുതൽ തീരദേശ ഗ്രാമങ്ങൾ വരെ
മത്സ്യബന്ധന നിരോധനകാലത്ത് മത്സ്യത്തൊഴിലാളികൾക്ക് ഉപജീവന സഹായം നൽകുന്നത് അംഗീകരിച്ച പദ്ധതികളിൽ ഉൾപ്പെടുന്നു. പരമ്പരാഗത മത്സ്യത്തൊഴിലാളികൾക്ക് വള്ളങ്ങളും വലകളും വാങ്ങുന്നതിനും സഹായം ലഭിക്കും.
സംയോജിത ആധുനിക തീരദേശ മത്സ്യഗ്രാമങ്ങളും കാലാവസ്ഥാ മാറ്റത്തെ അതിജീവിക്കാൻ കഴിയുന്ന തീരദേശ മത്സ്യഗ്രാമങ്ങളും സ്ഥാപിക്കും. കക്കകൃഷി, കൂടുമത്സ്യകൃഷി, അലങ്കാരമത്സ്യകൃഷി തുടങ്ങിയ അധിക, ബദൽ ഉപജീവന മാർഗങ്ങൾക്കും പിന്തുണ നൽകും.
വിപണികളും ശീതീകരണ സൗകര്യങ്ങളും വികസിപ്പിക്കും
മത്സ്യവിപണികൾ, ചെറുവിൽപ്പന കേന്ദ്രങ്ങൾ, ശീതീകരണ ശൃംഖലാ സൗകര്യങ്ങൾ, ജീവനുള്ള മത്സ്യങ്ങളുടെ വിൽപ്പന കേന്ദ്രങ്ങൾ എന്നിവ സ്ഥാപിക്കാൻ പദ്ധതിയിൽ സഹായമുണ്ട്. ആവശ്യത്തിനനുസരിച്ചുള്ള പരിശീലനവും നൈപുണ്യ വികസന പരിപാടികളും സംഘടിപ്പിക്കും.
മത്സ്യബന്ധന തുറമുഖങ്ങളും വിപണന സൗകര്യങ്ങളും വികസിപ്പിക്കുന്നതിനും അംഗീകാരം നൽകിയിട്ടുണ്ട്. മത്സ്യോൽപ്പാദനം കൂട്ടുന്നതിനൊപ്പം പ്രകൃതിവിഭവങ്ങളുടെ സുസ്ഥിര ഉപയോഗം ഉറപ്പാക്കാനും മൂല്യശൃംഖല ശക്തിപ്പെടുത്താനും പദ്ധതികൾ ലക്ഷ്യമിടുന്നു.
മണ്ണെണ്ണ വിതരണം സംസ്ഥാനത്തിന്റെ ചുമതല
പൊതുവിതരണ സംവിധാനത്തിലൂടെയുള്ള മേൽത്തരം മണ്ണെണ്ണ കേന്ദ്രസർക്കാർ മൂന്നുമാസത്തിലൊരിക്കൽ അനുവദിക്കുന്നതാണ്. എന്നാൽ സംസ്ഥാനത്തിനുള്ളിലെ വിതരണം പൂർണമായും അതത് സംസ്ഥാന സർക്കാരാണ് നടത്തുന്നത്.
മണ്ണെണ്ണ മലിനീകരണം ഉണ്ടാക്കുകയും പൊതുജനാരോഗ്യത്തെ ദോഷകരമായി ബാധിക്കുകയും ചെയ്യുന്ന ഇന്ധനമായതിനാൽ 2010-11 മുതൽ സംസ്ഥാനങ്ങൾക്കുള്ള വിഹിതം ക്രമീകരിച്ചതായി കേന്ദ്ര പെട്രോളിയം, പ്രകൃതിവാതക മന്ത്രാലയം അറിയിച്ചു. ഇതുവരെ 21 സംസ്ഥാനങ്ങളും കേന്ദ്രഭരണ പ്രദേശങ്ങളും പൊതുവിതരണ മണ്ണെണ്ണ ഉപയോഗത്തിൽനിന്ന് പൂർണമായി ഒഴിവായിട്ടുണ്ട്.
കേരളത്തിനുള്ള മണ്ണെണ്ണ വിഹിതത്തിൽ വൻ വർധന
കേരളം ഉൾപ്പെടെയുള്ള ബന്ധപ്പെട്ട കക്ഷികളുമായി കൂടിയാലോചിച്ചാണ് 2025-26 മുതൽ 2027-28 വരെയുള്ള പുതിയ പൊതുവിതരണ മണ്ണെണ്ണ വിഹിതനയം കേന്ദ്രസർക്കാർ തയ്യാറാക്കിയത്. പാചകം, വെളിച്ചം, മത്സ്യബന്ധനം, മേളകൾ, പ്രദർശനങ്ങൾ, മഹാമാരി, ദുരന്തം തുടങ്ങിയ പ്രത്യേക ആവശ്യങ്ങൾക്കായി ഒറ്റ വിഭാഗത്തിലാണ് മൂന്നുമാസത്തിലൊരിക്കൽ മണ്ണെണ്ണ അനുവദിക്കുന്നത്.
സംസ്ഥാനത്തിന്റെ ആവശ്യത്തിനനുസരിച്ച് വിവിധ മേഖലകൾക്ക് മണ്ണെണ്ണ വിഹിതം വിഭജിക്കാം. വിതരണത്തിന്റെ അളവും മാനദണ്ഡവും സംസ്ഥാന സർക്കാരാണ് തീരുമാനിക്കുന്നത്. 2024-25ൽ കേരളത്തിന് 4,368 കിലോലിറ്റർ അനുവദിച്ചപ്പോൾ 2025-26ൽ ഇത് 22,704 കിലോലിറ്ററായി ഉയർന്നു. 419.78 ശതമാനമാണ് വർധന.
അനുവദിച്ച 22,704 കിലോലിറ്ററിൽ കേരളം 17,724 കിലോലിറ്റർ ഏറ്റെടുത്തു. 4,980 കിലോലിറ്റർ ഉപയോഗിക്കാതെ നഷ്ടപ്പെട്ടു. നിലവിലെ ആഗോള രാഷ്ട്രീയ സാഹചര്യത്തിന്റെ പശ്ചാത്തലത്തിൽ 2026 മാർച്ച് 12ന് 1,716 കിലോലിറ്റർ അധികമായി അനുവദിച്ചിരുന്നു. ജൂൺ 30നകം ഏറ്റെടുക്കേണ്ട ഈ വിഹിതത്തിൽ കേരളം 1,512 കിലോലിറ്റർ മാത്രമാണ് ഏറ്റെടുത്തത്. 204 കിലോലിറ്റർ നഷ്ടപ്പെട്ടു.
2026-27 സാമ്പത്തിക വർഷത്തിലെ ഏപ്രിൽ മുതൽ ജൂൺ വരെയുള്ള ഒന്നാം പാദത്തിലും ജൂലൈ മുതൽ സെപ്റ്റംബർ വരെയുള്ള രണ്ടാം പാദത്തിലും കേരളത്തിന് പാദംതോറും 4,068 കിലോലിറ്റർ മണ്ണെണ്ണ അനുവദിച്ചിട്ടുണ്ട്.
