ന്യൂഡൽഹി, ജൂലൈ 11-

ബിഷ്‌ണോയി, ജഗ്ഗു ഭഗവാൻപുരിയ ക്രിമിനൽ സംഘങ്ങളെക്കുറിച്ചുള്ള അന്വേഷണത്തിൽ ഞെട്ടിക്കുന്ന വിവരങ്ങൾ പുറത്ത്. വെറും 20,000 രൂപ വരെ പ്രതിഫലം നൽകി സ്ത്രീകളെയും പ്രായപൂർത്തിയാകാത്തവരെയും വരെ ഈ സംഘങ്ങൾ കൊലപാതകങ്ങൾക്കും വെടിവെപ്പുകൾക്കുമായി ഉപയോഗിച്ചിരുന്നതായി അന്വേഷണത്തിൽ കണ്ടെത്തി. അതേസമയം, പണം തട്ടിയെടുക്കാനായി സമ്പന്നരായ വ്യാപാരികളെയും പ്രവാസികളെയും കണ്ടെത്താൻ ഇവർ സർക്കാർ ഡാറ്റാബേസുകളും സമൂഹമാധ്യമങ്ങളും വ്യാപകമായി ദുരുപയോഗം ചെയ്തിരുന്നതായും അമേരിക്കൻ ഫെഡറൽ കോടതിയിൽ സമർപ്പിച്ച കുറ്റപത്രത്തിൽ വ്യക്തമാക്കുന്നു.

ക്വട്ടേഷൻ തുക തുച്ഛം; മുൻനിരയിൽ സ്ത്രീകളും കുട്ടികളും

വിവിധ രാജ്യങ്ങളിലെ അന്വേഷണ ഏജൻസികൾ ശേഖരിച്ച വിവരങ്ങളുടെയും അറസ്റ്റിലായ പ്രതികളുടെ മൊഴികളുടെയും അടിസ്ഥാനത്തിലാണ് ഞെട്ടിക്കുന്ന ഈ വിവരങ്ങൾ പുറത്തുവന്നത്. ആർക്കും പെട്ടെന്ന് സംശയം തോന്നാത്തവരെ കരുവാക്കുക എന്ന ലക്ഷ്യത്തോടെയാണ് സ്ത്രീകളെയും പ്രായപൂർത്തിയാകാത്തവരെയും സംഘം വലയിലാക്കിയിരുന്നത്. കൊലപാതകങ്ങൾക്കും ആക്രമണങ്ങൾക്കും ഇവർക്ക് വളരെ ചെറിയ തുക മാത്രമാണ് പ്രതിഫലമായി നൽകിയിരുന്നത്. പണത്തിന്റെ സിംഹഭാഗവും കൈപ്പറ്റിയിരുന്നത് ഗ്യാങ്ങിന്റെ തലപ്പത്തുള്ള ഉന്നതരായിരുന്നുവെന്നും റിപ്പോർട്ടുകൾ വ്യക്തമാക്കുന്നു.

 ഇരകളെ കണ്ടെത്താൻ സർക്കാർ രേഖകളും സമൂഹമാധ്യമങ്ങളും

പണം തട്ടിയെടുക്കേണ്ട ഇരകളെ കണ്ടെത്താൻ ജി.എസ്.ടി, റിയൽ എസ്റ്റേറ്റ് റെഗുലേറ്ററി അതോറിറ്റി (റെറ) തുടങ്ങിയ സർക്കാർ പോർട്ടലുകളിലെ വിവരങ്ങളും സമൂഹമാധ്യമ അക്കൗണ്ടുകളുമാണ് സംഘം പ്രധാനമായും പരിശോധിച്ചിരുന്നത്. ഇരകളുടെ കുടുംബാംഗങ്ങൾ, ബിസിനസ് പശ്ചാത്തലം, സാമ്പത്തിക സ്ഥിതി എന്നിവയെക്കുറിച്ച് കൃത്യമായ വിവരങ്ങൾ ശേഖരിച്ച ശേഷമായിരുന്നു ഭീഷണി സന്ദേശങ്ങളും പണം ആവശ്യപ്പെട്ടുള്ള ഫോൺ കോളുകളും എത്തിയിരുന്നതെന്ന് അന്വേഷണ രേഖകൾ പറയുന്നു.

വലവിരിച്ച് അന്താരാഷ്ട്ര ശൃംഖല

ഇന്ത്യ, അമേരിക്ക, കാനഡ, യൂറോപ്പ് എന്നിവിടങ്ങൾ കേന്ദ്രീകരിച്ച് പ്രവർത്തിച്ചിരുന്ന അന്താരാഷ്ട്ര കുറ്റകൃത്യ ശൃംഖലയെ ലക്ഷ്യമിട്ട് നടന്ന സംയുക്ത നീക്കത്തിൽ 24 പേരെയാണ് വിവിധ അന്വേഷണ ഏജൻസികൾ അറസ്റ്റ് ചെയ്തത്. ലോറൻസ് ബിഷ്‌ണോയി, ഗോൾഡി ബ്രാർ എന്നിവരുൾപ്പെടെയുള്ള കുറ്റവാളികൾക്കെതിരെ കൊലപാതകം, പണം തട്ടിയെടുക്കൽ, മയക്കുമരുന്ന് കടത്ത് തുടങ്ങിയ ഗുരുതരമായ കുറ്റങ്ങളാണ് അമേരിക്കൻ നീതിന്യായ വകുപ്പ് ചുമത്തിയിരിക്കുന്നത്.

ലക്ഷ്യം വ്യാപാരികളും പ്രവാസികളും

ഇന്ത്യയിലെ വൻകിട വ്യാപാരികളും വിദേശത്ത് താമസിക്കുന്ന ഇന്ത്യൻ വംശജരുമായിരുന്നു ഈ ക്രിമിനൽ സംഘങ്ങളുടെ പ്രധാന ലക്ഷ്യം. സുരക്ഷിതമെന്ന് കരുതുന്ന എൻക്രിപ്റ്റഡ് മെസേജിങ് ആപ്പുകൾ വഴി ഭീഷണി സന്ദേശങ്ങൾ അയച്ച് കോടിക്കണക്കിന് രൂപ ആവശ്യപ്പെടുന്ന രീതിയാണ് ഇവർ പിന്തുടർന്നിരുന്നതെന്നും അന്വേഷണ ഏജൻസികൾ കൂട്ടിച്ചേർത്തു.