വയനാട്, 2026 ജൂലൈ 6 –

തുരങ്കപാത നിർമാണത്തിനിടെ വൻ മണ്ണിടിച്ചിൽ

വയനാട് മേപ്പാടിയിലെ തുരങ്കപാത നിർമാണ സ്ഥലത്ത് മണ്ണിടിച്ചിലുണ്ടായി. കളളാടി പാലത്തിന് സമീപം നിർമാണ പ്രവർത്തനങ്ങൾ നടക്കുന്നതിനിടെയാണ് മണ്ണിടിഞ്ഞ് പ്രധാന റോഡിലേക്ക് പതിച്ചത്. മേപ്പാടിയിൽ നിന്ന് ചൂരൽമലയിലേക്ക് പോകുന്ന പ്രധാന പാതയിലുണ്ടായ അപകടത്തെ തുടർന്ന് പ്രദേശത്ത് രക്ഷാപ്രവർത്തനം പുരോഗമിക്കുകയാണ്. മഴ തുടരുന്നതിനാൽ സ്ഥിതിഗതികൾ ആശങ്കാജനകമാണ്.

തൊഴിലാളികൾ കുടുങ്ങിയെന്ന സംശയം

മണ്ണിടിച്ചിലിൽ മണ്ണിനടിയിൽപ്പെട്ട ഒരാളെ രക്ഷപ്പെടുത്തി. നിരവധി പേർ കുടുങ്ങിക്കിടക്കുന്നതായി സംശയിക്കുന്നുണ്ടെങ്കിലും ഇതുവരെ ഔദ്യോഗിക സ്ഥിരീകരണമില്ല. തൊഴിലാളികളെ തുരങ്കപാത നിർമാണ സ്ഥലത്തേക്ക് കൊണ്ടുപോകുകയായിരുന്ന സ്വകാര്യ ബസ് മണ്ണിനടിയിലായതായും, അതിനുള്ളിൽ തൊഴിലാളികൾ ഉണ്ടായിരിക്കാമെന്ന ആശങ്കയും ഉയർന്നിട്ടുണ്ട്. അഞ്ചുപേരെ ആശുപത്രിയിലേക്ക് മാറ്റിയതായി സംസ്ഥാന ദുരന്തനിവാരണ അതോറിറ്റി അറിയിച്ചു.

എൻ.ഡി.ആർ.എഫും രക്ഷാസംഘങ്ങളും രംഗത്ത്

രക്ഷാപ്രവർത്തനത്തിനായി വയനാട്ടിലുള്ള 30 അംഗ എൻ.ഡി.ആർ.എഫ് സംഘത്തോട് സ്ഥലത്തെത്താൻ നിർദേശം നൽകി. കൂടാതെ കോഴിക്കോട് നിന്നുള്ള മറ്റൊരു എൻ.ഡി.ആർ.എഫ് യൂണിറ്റും വയനാട്ടിലേക്ക് തിരിച്ചിട്ടുണ്ട്. മണ്ണിനടിയിൽ കുടുങ്ങിയവരെ കണ്ടെത്താനുള്ള തിരച്ചിൽ വിവിധ ഏജൻസികളുടെ നേതൃത്വത്തിൽ തുടരുകയാണ്.

മുഖ്യമന്ത്രി സ്ഥിതിഗതികൾ വിലയിരുത്തി

മണ്ണിടിച്ചിൽ സാഹചര്യം മുഖ്യമന്ത്രി വി.ഡി. സതീശന്റെ നേതൃത്വത്തിൽ വിലയിരുത്തി. ജില്ലയിൽ നിന്നുള്ള മന്ത്രി ടി. സിദ്ദിഖുമായി മുഖ്യമന്ത്രി അടിയന്തര കൂടിക്കാഴ്ച നടത്തി. രക്ഷാപ്രവർത്തനം ഏകോപിപ്പിക്കാൻ മന്ത്രിക്ക് നിർദേശം നൽകിയിട്ടുണ്ട്. റവന്യൂ മന്ത്രി എ.പി. അനിൽകുമാറിനോടും കൃഷി മന്ത്രി ടി. സിദ്ദിഖിനോടും ഉടൻ വയനാട്ടിലേക്ക് തിരിക്കാൻ മുഖ്യമന്ത്രി നിർദേശം നൽകി.