തിരുവനന്തപുരം, 2026 ജൂൺ 27 –
സംസ്ഥാന വ്യാപകമായി നടത്തിയ ഓപ്പറേഷൻ തൂഫാൻ ലഹരിവിരുദ്ധ റെയ്ഡിൽ ഇന്നലെ 109 കേസുകൾ രജിസ്റ്റർ ചെയ്ത് 131 പേരെ അറസ്റ്റ് ചെയ്തതായി പോലീസ് അറിയിച്ചു. ക്രമസമാധാന ചുമതലയുള്ള എ.ഡി.ജി.പിയുടെ നിർദേശപ്രകാരമാണ് വിവിധ ജില്ലകളിൽ ഒരേസമയം പരിശോധന നടത്തിയത്. റെയ്ഡിൽ നിരവധി പേരിൽ നിന്ന് ലഹരിവസ്തുക്കൾ പിടിച്ചെടുത്തു.
തിരുവനന്തപുരം ജില്ലയിൽ വർക്കല, കാട്ടാക്കട, കഴക്കൂട്ടം എന്നിവിടങ്ങളിലാണ് പ്രധാന നടപടികൾ നടന്നത്. കഴക്കൂട്ടത്ത് ഏഴ് കിലോഗ്രാം എം.ഡി.എം.എയുമായി ഷാരോണിനെ ഡാൻസാഫ് സംഘം പിടികൂടി. കാട്ടാക്കടയിൽ അജിത്ത് എന്നയാളെ കസ്റ്റഡിയിലെടുത്തു. വാഹനം നിർത്താതെ പോയ ഇയാളെ പിന്തുടർന്ന് നടത്തിയ പരിശോധനയിൽ വീട്ടിൽ നിന്ന് തോക്കും മറ്റ് ആയുധങ്ങളും കണ്ടെത്തിയതായി പോലീസ് അറിയിച്ചു. വർക്കലയിൽ വടശ്ശേരിക്കോണം സ്വദേശി സതീഷ് മീഡിയം ക്വാണ്ടിറ്റി എം.ഡി.എം.എയുമായി പിടിയിലായി.
ഓപ്പറേഷൻ തൂഫാനിന്റെ ഭാഗമായി സംസ്ഥാനത്ത് ലഹരിവിരുദ്ധ പരിശോധനകൾ തുടരുകയാണ്. ഈ മാസം 25 വരെ 4037 കേസുകൾ രജിസ്റ്റർ ചെയ്തതായും വിവിധ ലഹരിക്കേസുകളിലായി 4340 പേരെ അറസ്റ്റ് ചെയ്തതായും പോലീസ് നേരത്തെ അറിയിച്ചിരുന്നു. 2203 ഗ്രാം എം.ഡി.എം.എയും 376 ഗ്രാം കഞ്ചാവും പിടിച്ചെടുത്തതായും 36 വാണിജ്യ അളവിലുള്ള കേസുകൾ രജിസ്റ്റർ ചെയ്തതായും പോലീസ് വ്യക്തമാക്കി.
