കോഴിക്കോട്, 2026 ജൂൺ 26 –

വീര്യം കുറഞ്ഞ മദ്യത്തിന് നികുതി ഇളവ് നൽകുന്ന കാര്യത്തിൽ സമഗ്രമായ കൂടിയാലോചനകൾ നടത്തിയ ശേഷമേ തീരുമാനമെടുക്കൂവെന്ന് റവന്യൂ വകുപ്പ് മന്ത്രി എ. പി. അനിൽകുമാർ പറഞ്ഞു. പാർട്ടി, മുന്നണി നേതൃത്വവുമായി ചർച്ച നടത്തിയ ശേഷമായിരിക്കും ഇക്കാര്യത്തിൽ തീരുമാനമുണ്ടാകുകയെന്ന് മുഖ്യമന്ത്രി തന്നെ വ്യക്തമാക്കിയിട്ടുണ്ടെന്നും മന്ത്രി പറഞ്ഞു.

നയപരമായ വിഷയങ്ങളിൽ ഏകപക്ഷീയമായ തീരുമാനങ്ങളല്ല സർക്കാർ സ്വീകരിക്കുന്നതെന്നും മന്ത്രി വ്യക്തമാക്കി. തീരുമാനങ്ങൾ കൂട്ടായ ആലോചനയുടെ അടിസ്ഥാനത്തിലായിരിക്കുമെന്നും അദ്ദേഹം പറഞ്ഞു.

തീരുമാനങ്ങൾ തെറ്റാണെന്ന് ബോധ്യപ്പെട്ടാൽ തിരുത്തും

എൽഡിഎഫ് സർക്കാരിന്റെ കാലത്തുണ്ടായിരുന്നതുപോലെ ഒരാളിൽ മാത്രം തീരുമാനങ്ങൾ കേന്ദ്രീകരിക്കുന്ന രീതിയല്ല ഇപ്പോഴത്തെ സർക്കാരിനുള്ളതെന്ന് മന്ത്രി പറഞ്ഞു. ഒരു തീരുമാനം തെറ്റാണെന്ന് ബോധ്യപ്പെട്ടാൽ അത് തിരുത്താൻ സർക്കാർ തയ്യാറാകുമെന്നും അദ്ദേഹം കൂട്ടിച്ചേർത്തു.