തിരുവനന്തപുരം, 2026 ജൂൺ 25 –

തിരുവനന്തപുരം നഗരസഭയിൽ സത്യപ്രതിജ്ഞാ ചട്ടം ലംഘിച്ചെന്നാരോപിച്ച് മേയർക്കെതിരെ എൽ.ഡി.എഫ് നടത്തിയ ഓഫീസ് ഉപരോധം സംഘർഷത്തിൽ കലാശിച്ചു. മേയർ രാജിവെക്കണമെന്നാവശ്യപ്പെട്ട് പ്രവർത്തകർ നഗരസഭ ഉപരോധിച്ചതോടെ സ്ഥലത്ത് വലിയ സംഘർഷമുണ്ടായി. മേയർ ഓഫീസിലേക്ക് പ്രവേശിക്കാൻ ശ്രമിക്കുന്നതിനിടെ ഉണ്ടായ ഉന്തിലും തള്ളിലും മേയറും മുതിർന്ന നേതാവ് വഞ്ചിയൂർ ബാബുവും നിലത്തുവീണു. നഗരസഭയ്ക്കുള്ളിലും പുറത്തും സംഘർഷാവസ്ഥ രൂപപ്പെട്ടു.

മേയറുടെ ചേംബറിന് മുന്നിൽ സി.പി.എം, ബി.ജെ.പി കൗൺസിലർമാർ തമ്മിൽ നേരിട്ട് ഏറ്റുമുട്ടി. ഉപരോധത്തെ തുടർന്ന് മേയറെ ഓഫീസിനുള്ളിലേക്ക് കടത്തിവിടാൻ സമരക്കാർ അനുവദിച്ചില്ല. തുടർന്ന് കൗൺസിലർമാരും പ്രവർത്തകരും തമ്മിൽ ഏറ്റുമുട്ടലുണ്ടായി. സ്ഥിതിഗതികൾ നിയന്ത്രിക്കാൻ ശ്രമിച്ച പോലീസിനുനേരെയും ആക്രമണമുണ്ടായതായി റിപ്പോർട്ടുണ്ട്. സംഘർഷത്തിൽ സി.പി.എം കൗൺസിലർ കാട്ടായിക്കോണം സിന്ധു ശശിക്കും ബി.ജെ.പി കൗൺസിലർ ദീപ പേരൂർക്കടയ്ക്കും പരിക്കേറ്റു. പരിക്കേറ്റ മേയറെയും മറ്റ് കൗൺസിലർമാരെയും ആശുപത്രിയിലേക്ക് മാറ്റി.

സത്യപ്രതിജ്ഞാ ചട്ടം ലംഘിച്ചെന്ന ആരോപണമാണ് പ്രതിഷേധത്തിന് കാരണമായത്. സംഘർഷത്തിനിടെ മേയർ നഗരസഭയിൽ നിന്ന് പുറത്തുപോകുമ്പോൾ പ്രതിഷേധവും കൂക്കിവിളിയും ഉണ്ടായി. നഗരസഭാ പരിസരത്ത് ഇപ്പോഴും കനത്ത പൊലീസ് കാവൽ തുടരുകയാണ്.