രാജ്യത്തെ വിനോദസഞ്ചാര മേഖലയിലെ പത്ത് വർഷത്തെ വളർച്ചയെക്കുറിച്ചുള്ള വിശദമായ പശ്ചാത്തല റിപ്പോർട്ട് കേന്ദ്ര സർക്കാർ പുറത്തിറക്കി. 2014 മുതൽ 2025 വരെ രാജ്യത്ത് 18.125 കോടി അന്താരാഷ്ട്ര വരവുകളും 9.335 കോടി വിദേശ വിനോദസഞ്ചാരികളുടെ വരവുകളും രേഖപ്പെടുത്തിയെന്നാണ് റിപ്പോർട്ട് പറയുന്നത്. റോഡുകൾ, നവീകരിച്ച റെയിൽവേ സ്റ്റേഷനുകൾ, മെച്ചപ്പെട്ട യാത്രാസൗകര്യങ്ങൾ എന്നിവ വിനോദസഞ്ചാര കേന്ദ്രങ്ങളിലേക്കുള്ള എത്തിച്ചേരൽ എളുപ്പമാക്കിയതായും റിപ്പോർട്ടിൽ പറയുന്നു.

വിനോദസഞ്ചാര അടിസ്ഥാനസൗകര്യം ശക്തിപ്പെടുത്താൻ സ്വദേശ് ദർശൻ, പ്രശാദ് പദ്ധതികൾ നടപ്പാക്കിയതായി കേന്ദ്ര സർക്കാർ അറിയിച്ചു. സ്വദേശ് ദർശൻ പദ്ധതിയുടെ ആദ്യഘട്ടത്തിൽ അയ്യായിരം കോടിയിലേറെ രൂപയുടെ എഴുപത്തിയാറ് പദ്ധതികൾക്ക് അനുമതി നൽകി. അതിൽ എഴുപത്തിയഞ്ച് പദ്ധതികൾ പൂർത്തിയായി. പ്രശാദ് പദ്ധതിയിൽ പതിനേഴുനൂറ് കോടിയിലേറെ രൂപയുടെ അമ്പത്തിനാല് പദ്ധതികൾക്കും അനുമതി ലഭിച്ചു. 2024-25 ലെ ബജറ്റിനെ തുടർന്ന് ലോകനിലവാരത്തിലുള്ള വിനോദസഞ്ചാര കേന്ദ്രങ്ങൾ വികസിപ്പിക്കാൻ പ്രത്യേക സഹായ പദ്ധതിയിലൂടെ ഇരുപത്തിമൂന്ന് സംസ്ഥാനങ്ങളിലെ നാൽപ്പത് പദ്ധതികൾക്കും അനുമതി നൽകിയിട്ടുണ്ട്. അതോടൊപ്പം പരിസ്ഥിതി സംരക്ഷണം മുൻനിർത്തി പുതിയ വിനോദസഞ്ചാര മാതൃകകളും പ്രോത്സാഹിപ്പിക്കുന്നതായി റിപ്പോർട്ട് വ്യക്തമാക്കുന്നു.

കഴിഞ്ഞ പത്ത് വർഷത്തിനിടെ സേവനദാതാക്കൾക്കുള്ള ശേഷിവികസന പദ്ധതിയിലൂടെ നാലര ലക്ഷത്തിലേറെ പേർക്ക് പരിശീലനം നൽകിയെന്നും റിപ്പോർട്ടിൽ പറയുന്നു. 2026-27 ലെ കേന്ദ്ര ബജറ്റിൽ ദേശീയ ആതിഥേയത്വ സ്ഥാപനം തുടങ്ങാനും പ്രധാന വിനോദസഞ്ചാര കേന്ദ്രങ്ങളിൽ പതിനായിരം ടൂറിസ്റ്റ് ഗൈഡുമാർക്ക് പരിശീലനം നൽകാനും നിർദേശമുണ്ട്. കഴിഞ്ഞ പത്ത് വർഷത്തിനിടെ നൂറിലധികം വിനോദസഞ്ചാര കേന്ദ്രങ്ങൾ നവീകരിച്ചതായും ഇനി അമ്പത് പ്രധാന കേന്ദ്രങ്ങൾ കൂടി വികസിപ്പിക്കുമെന്നും റിപ്പോർട്ടിൽ പറയുന്നു. ഇന്ത്യയെ ലോകത്തെ പ്രധാന വിനോദസഞ്ചാര കേന്ദ്രങ്ങളിലൊന്നാക്കി മാറ്റുകയാണ് ലക്ഷ്യമെന്നും റിപ്പോർട്ടിൽ വ്യക്തമാക്കുന്നു.