ജനാധിപത്യത്തിൽ എല്ലാവരും പ്രത്യേകർ, എല്ലാവരും അതിവിശിഷ്ടർ: ഉപരാഷ്ട്രപതി

ന്യൂഡൽഹി, 2026 ജൂൺ 25 

രാജ്യത്തെ അതിവിശിഷ്ട വ്യക്തികളുടെ സംസ്കാരത്തെക്കുറിച്ചുള്ള പുസ്തകം ഉപരാഷ്ട്രപതി സി. പി. രാധാകൃഷ്ണൻ ന്യൂഡൽഹിയിലെ ഉപരാഷ്ട്രപതി ഭവനിൽ പ്രകാശനം ചെയ്തു. മുൻ രാജ്യസഭാംഗം നബാം റെബിയയും സഹരചയിതാവ് സന്ദീപ് കുമാറും ചേർന്ന് തയ്യാറാക്കിയ പുസ്തകമാണ് പ്രകാശനം ചെയ്തത്. ജനാധിപത്യ ഭരണത്തിന്റെയും പൊതുജീവിതത്തിന്റെയും അടിസ്ഥാന വിഷയങ്ങളെയാണ് പുസ്തകം ചർച്ച ചെയ്യുന്നതെന്ന് ഉപരാഷ്ട്രപതി പറഞ്ഞു.

ഭരണഘടന നീതിയും സമത്വവും സ്വാതന്ത്ര്യവും സാഹോദര്യവും അടിസ്ഥാനമാക്കിയുള്ള സമൂഹത്തെയാണ് ലക്ഷ്യമിടുന്നതെന്ന് അദ്ദേഹം പറഞ്ഞു. പൊതുപദവി പ്രത്യേക അവകാശമല്ല, ഉത്തരവാദിത്തമാണെന്ന് കാണുമ്പോഴാണ് ജനാധിപത്യം ശക്തമാകുന്നതെന്നും വ്യക്തമാക്കി. പ്രധാനമന്ത്രി നരേന്ദ്ര മോദിയുടെ ജനകേന്ദ്രീകൃത ഭരണസങ്കൽപ്പവുമായി പുസ്തകത്തിലെ ആശയങ്ങൾ ചേർന്നുനിൽക്കുന്നതായും അദ്ദേഹം പറഞ്ഞു. വിശിഷ്ട വ്യക്തികളുടെ വാഹനങ്ങളിലെ ചുവന്ന വിളക്ക് ഒഴിവാക്കിയ തീരുമാനവും, പ്രവേശനപരീക്ഷ എഴുതുന്ന വിദ്യാർഥികൾക്ക് ഗതാഗത തടസ്സമുണ്ടാകാതിരിക്കാൻ യാത്ര വൈകിപ്പിച്ച നടപടിയും ജനങ്ങൾക്കാണ് മുൻഗണന നൽകുന്ന ഭരണത്തിന്റെ ഉദാഹരണമാണെന്ന് അദ്ദേഹം ചൂണ്ടിക്കാട്ടി. “ഓരോ ഇന്ത്യക്കാരനും പ്രത്യേകരാണ്. ഓരോ ഇന്ത്യക്കാരനും അതിവിശിഷ്ടരാണ്” എന്ന പ്രധാനമന്ത്രിയുടെ വാക്കുകളും അദ്ദേഹം ഓർമിപ്പിച്ചു.

തമിഴ് കവി തിരുവള്ളുവരുടെ വാക്കുകൾ ഉദ്ധരിച്ച ഉപരാഷ്ട്രപതി, നല്ല നേതൃത്വം എന്നത് എല്ലാവർക്കും സമീപിക്കാവുന്നതും ഉത്തരവാദിത്തമുള്ളതുമാണെന്ന് പറഞ്ഞു. മുൻ പ്രധാനമന്ത്രി ലാൽ ബഹാദൂർ ശാസ്ത്രിയുടെയും മറ്റ് പ്രമുഖരുടെയും ലാളിത്യവും പൊതുസേവന മനോഭാവവും പുസ്തകത്തിൽ പരാമർശിച്ചിട്ടുണ്ടെന്നും അദ്ദേഹം പറഞ്ഞു. ഉപനിഷത്തുകൾ, രാമചരിതമാനസം, ബുദ്ധന്റെ ഉപദേശങ്ങൾ, പഞ്ചതന്ത്രം എന്നിവയും പുസ്തകത്തിൽ ഉൾപ്പെടുത്തിയിട്ടുണ്ടെന്ന് അദ്ദേഹം വ്യക്തമാക്കി. ചടങ്ങിൽ മുൻ അരുണാചൽ പ്രദേശ് മുഖ്യമന്ത്രി നബാം തുകി, മുൻ രാജ്യസഭാംഗം ഡബ്ല്യു. ആർ. ഖാർലുഖി, നബാം റെബിയ, സന്ദീപ് കുമാർ എന്നിവർ പങ്കെടുത്തു.