കുമരകം: പരിപ്പ് തൊള്ളായിരംചിറ കള്ളുഷാപ്പിൽ നിന്ന് തലക്കറി കഴിച്ച കൂടുതൽ പേർക്ക് ഭക്ഷ്യവിഷബാധയുടെ ലക്ഷണങ്ങൾ അനുഭവപ്പെട്ടതായി റിപ്പോർട്ട്. നേരത്തെ ഷാപ്പിൽ നിന്ന് ഭക്ഷണം കഴിച്ച ശേഷം ദേഹാസ്വാസ്ഥ്യം അനുഭവപ്പെട്ട കുമരകം സ്വദേശി ജ്യോതിഷ് (41) മരിച്ചിരുന്നു. തുടർന്ന് നടത്തിയ അന്വേഷണത്തിലാണ് കൂടുതൽ പേർക്ക് സമാന ലക്ഷണങ്ങൾ ഉണ്ടായതായി കണ്ടെത്തിയത്.

ജ്യോതിഷിനൊപ്പം ഭക്ഷണം കഴിച്ച അഖിൽ, സുജിത്, നിഖിൽ, ഗിരീഷ് എന്നിവർ ചികിത്സ തേടിയിരുന്നു. ഇതിനുപുറമേ, അന്ന് തലക്കറിയുടെ ചാറ് കഴിച്ച മറ്റ് ചിലർക്കും അസ്വസ്ഥത ഉണ്ടായിരുന്നുവെന്നാണ് പുറത്തുവരുന്ന വിവരം. ഗുരുതരമല്ലാത്തതിനാൽ അവർ പരാതി നൽകിയിരുന്നില്ലെന്നാണ് റിപ്പോർട്ടുകൾ.

സംഭവത്തെ തുടർന്ന് ഭക്ഷ്യസുരക്ഷാ വകുപ്പ്, പൊലീസ്, എക്സൈസ് എന്നിവ ചേർന്ന് ഷാപ്പിൽ പരിശോധന നടത്തി. വൃത്തിഹീനമായ സാഹചര്യത്തിലാണ് സ്ഥാപനം പ്രവർത്തിച്ചിരുന്നതെന്ന് പരിശോധനയിൽ കണ്ടെത്തി. പാത്രങ്ങൾ കഴുകാൻ സമീപത്തെ തോട്ടിലെ മലിനജലം ഉപയോഗിച്ചിരുന്നതായും റിപ്പോർട്ടുണ്ട്. ഷാപ്പിന്റെ ലൈസൻസ് റദ്ദാക്കാൻ റിപ്പോർട്ട് നൽകിയതായി അധികൃതർ അറിയിച്ചു.

കറിയിൽ ഉപയോഗിച്ച ചേരുവകളുടെ 22 സാമ്പിളുകൾ ശാസ്ത്രീയ പരിശോധനയ്ക്കായി അയച്ചിട്ടുണ്ട്. ഭക്ഷ്യവിഷബാധയുടെ കൃത്യകാരണം കണ്ടെത്താൻ അന്വേഷണം തുടരുകയാണ്. അതേസമയം, സംസ്ഥാനത്തുടനീളം കള്ളുഷാപ്പുകൾ കേന്ദ്രീകരിച്ച് പ്രത്യേക പരിശോധന നടത്താനും ഭക്ഷ്യസുരക്ഷാ വകുപ്പ് തീരുമാനിച്ചിട്ടുണ്ട്.