മൂവാറ്റുപുഴ: ജനറൽ ആശുപത്രിയിൽ ഡോക്ടറെ കാണാനായി എത്തിയ വയോധികയുടെ സ്വർണമാല പൊട്ടിച്ചെടുക്കാൻ ശ്രമിച്ച തമിഴ്നാട് സ്വദേശിനിയെ പൊലീസ് അറസ്റ്റ് ചെയ്തു. മധുര സ്വദേശിനിയായ സെൽവി (46)യാണ് പിടിയിലായത്.

മുളവൂർ സ്വദേശിയായ വയോധിക ഡോക്ടറെ കാണാനായി ആശുപത്രിയിൽ കാത്തുനിൽക്കുന്നതിനിടെയാണ് സംഭവം. വയോധികയുടെ കഴുത്തിലുണ്ടായിരുന്ന ഏകദേശം മൂന്നര പവൻ സ്വർണമാല പൊട്ടിച്ചെടുക്കാൻ സെൽവി ശ്രമിക്കുകയായിരുന്നു. എന്നാൽ വയോധിക ബഹളം വെച്ചതോടെ സമീപത്തുണ്ടായിരുന്നവർ ഓടിയെത്തി പ്രതിയെ തടഞ്ഞുവയ്ക്കുകയും പൊലീസിനെ വിവരം അറിയിക്കുകയുമായിരുന്നു.

തുടർന്ന് സ്ഥലത്തെത്തിയ മൂവാറ്റുപുഴ പൊലീസ് സെൽവിയെ കസ്റ്റഡിയിലെടുത്ത് അറസ്റ്റ് ചെയ്തു. കേരളത്തിനകത്തും പുറത്തുമായി സമാന സ്വഭാവമുള്ള കേസുകളിൽ പ്രതിക്ക് പങ്കുണ്ടെന്ന സംശയം പൊലീസ് പരിശോധിക്കുന്നുണ്ട്. പ്രതിക്കെതിരെ മറ്റ് സംസ്ഥാനങ്ങളിലെയും കേസുകളുടെ വിവരങ്ങൾ ശേഖരിച്ചുവരികയാണെന്ന് അന്വേഷണ ഉദ്യോഗസ്ഥർ അറിയിച്ചു.

മൂവാറ്റുപുഴ പൊലീസ് ഇൻസ്പെക്ടർ അനിൽ ജോർജിന്റെ നേതൃത്വത്തിലുള്ള സംഘമാണ് അന്വേഷണം നടത്തുന്നത്. ആശുപത്രി പോലുള്ള പൊതുസ്ഥലങ്ങളിൽ വയോധികരെയും സ്ത്രീകളെയും ലക്ഷ്യമിട്ട് നടക്കുന്ന മോഷണശ്രമങ്ങൾക്കെതിരെ ജാഗ്രത പാലിക്കണമെന്ന് പൊലീസ് നിർദേശിച്ചു.