തിരുവനന്തപുരം, 2026 ജൂൺ 24 –

മുൻ മന്ത്രിയും സിപിഐഎം കേന്ദ്ര കമ്മിറ്റി അംഗവുമായ പി രാജീവ് എൽഡിഎഫ് കൺവീനർ സ്ഥാനത്തേക്ക് പരിഗണിക്കപ്പെടുന്നതായി സൂചന. ഇക്കാര്യം സംബന്ധിച്ച് പാർട്ടിക്കുള്ളിൽ ആലോചനകൾ നടക്കുകയാണ്. നിലവിലെ കൺവീനർ ടി പി രാമകൃഷ്ണൻ പദവി ഒഴിയാനുള്ള താൽപര്യം പാർട്ടി നേതൃത്വത്തെ അറിയിച്ചതോടെയാണ് പുതിയ നേതൃത്വത്തെക്കുറിച്ചുള്ള ചർച്ചകൾ സജീവമായത്.

ആരോഗ്യപ്രശ്നങ്ങൾ ചൂണ്ടിക്കാട്ടിയാണ് ടി പി രാമകൃഷ്ണൻ സ്ഥാനമൊഴിയാനുള്ള സന്നദ്ധത പ്രകടിപ്പിച്ചതെന്നാണ് വിവരം. ഇതിന് പിന്നാലെ എൽഡിഎഫിന് പുതിയ കൺവീനറെ കണ്ടെത്താനുള്ള നീക്കങ്ങൾ ആരംഭിച്ചു. പ്രതിപക്ഷത്തിരിക്കുന്ന എൽഡിഎഫിനെ യുവമുഖം നയിക്കുന്നത് രാഷ്ട്രീയമായി ഗുണം ചെയ്യുമെന്നാണ് സിപിഐഎമ്മിന്റെ വിലയിരുത്തൽ.

കളമശ്ശേരി മണ്ഡലത്തിൽ പരാജയപ്പെട്ടതോടെ നിയമസഭയ്ക്ക് പുറത്തായ പി രാജീവിനെ വീണ്ടും സജീവ നേതൃത്വത്തിലേക്ക് കൊണ്ടുവരണമെന്ന അഭിപ്രായവും പാർട്ടിക്കുള്ളിൽ ഉയർന്നിരുന്നു. മുസ്ലിം ലീഗ് സ്ഥാനാർഥി വി ഇ അബ്ദുൽ ഗഫൂറിനോട് 16,312 വോട്ടിനാണ് പി രാജീവ് പരാജയപ്പെട്ടത്. പി രാജീവിന് 64,294 വോട്ടുകളും വി ഇ അബ്ദുൽ ഗഫൂറിന് 80,606 വോട്ടുകളും ലഭിച്ചിരുന്നു.