കൊല്ലം, 2026 ജൂൺ 22 –

കൊല്ലം പുതിയകാവ് ക്ഷേത്രത്തിലെ വിഗ്രഹത്തിൽ ചാർത്തിയിരുന്ന സ്വർണമാല മോഷ്ടിച്ച കേസിൽ സ്ത്രീ ഉൾപ്പെടെ രണ്ട് പേർ അറസ്റ്റിലായി. തമിഴ്നാട് കള്ളക്കുറിച്ചി ജില്ലയിലെ ചിന്നസേലം സ്വദേശികളായ ശശികുമാർ, മഹാലക്ഷ്മി എന്നിവരെയാണ് കൊല്ലം ഈസ്റ്റ് പൊലീസ് പിടികൂടിയത്. കഴിഞ്ഞ ദിവസം വൈകിട്ട് ഏഴരയോടെയാണ് ക്ഷേത്ര കോമ്പൗണ്ടിൽ അതിക്രമിച്ച് കയറി ആദിദേവതയുടെ വിഗ്രഹത്തിൽ ചാർത്തിയിരുന്ന മാല അപഹരിച്ചതെന്നാണ് കേസ്.

ഏകദേശം 13 ഗ്രാം തൂക്കമുള്ള സ്വർണ ലോക്കറ്റോടുകൂടിയ മാലയാണ് പ്രതികൾ മോഷ്ടിച്ചതെന്ന് പൊലീസ് അറിയിച്ചു. സംഭവം ശ്രദ്ധയിൽപ്പെട്ടതിനെ തുടർന്ന് ക്ഷേത്ര മാനേജർ കൊല്ലം ഈസ്റ്റ് പൊലീസ് സ്റ്റേഷനിൽ വിവരം നൽകുകയായിരുന്നു. ഇതിന്റെ അടിസ്ഥാനത്തിൽ അന്വേഷണം ആരംഭിച്ച പൊലീസ് പ്രതികളെ പിന്തുടർന്ന് പിടികൂടി.

മോഷ്ടിച്ച സ്വർണവുമായി കടന്നുകളയാൻ ശ്രമിക്കുന്നതിനിടെയാണ് പ്രതികൾ പിടിയിലായത്. കൊല്ലം ഈസ്റ്റ് സബ് ഇൻസ്പെക്ടർ രഞ്ജുവിന്റെ നേതൃത്വത്തിലുള്ള പൊലീസ് സംഘമാണ് അറസ്റ്റ് നടത്തിയത്. കേസിൽ കൂടുതൽ അന്വേഷണം തുടരുകയാണെന്ന് പൊലീസ് അറിയിച്ചു.