കഠിനംകുളം, 2026 ജൂൺ 20 –

പുതുക്കുറിച്ചി സ്വദേശിയായ യുവാവിനെ വഴിയിൽ തടഞ്ഞുനിർത്തി ഭീഷണിപ്പെടുത്തി ബൈക്ക് കവർന്ന കേസിൽ രണ്ട് പ്രതികളെ കൂടി കഠിനംകുളം പൊലീസ് അറസ്റ്റ് ചെയ്തു. വർക്കല സ്റ്റേഷൻ പരിധിയിലെ രഥിക്കൽ നാച്ചിവിളാകം വീട്ടിൽ മുബീൻ(27), വെറ്റൂർ നെടുങ്ങണ്ട വിളഭാഗം കാനന്റഴികം വീട്ടിൽ അക്ബർഷാ(27) എന്നിവരാണ് പിടിയിലായത്. ജൂൺ 12ന് വൈകിട്ട് ഏഴോടെ അഴൂർ മാടൻവിള മുസ്ലിം പള്ളിക്ക് സമീപമായിരുന്നു സംഭവം.

പുതുക്കുറിച്ചി അജന്ത കോർട്ടേഴ്സിൽ ജോയൽ ജോയി(21) സഞ്ചരിക്കുകയായിരുന്ന ഡ്യൂക്ക് മോട്ടോർസൈക്കിൾ പ്രതികൾ കാർ കുറുകെയിട്ട് തടഞ്ഞു. തുടർന്ന് ഭീഷണിപ്പെടുത്തി ബൈക്കിന്റെ താക്കോൽ ബലമായി ഊരിയെടുത്ത ശേഷം ഒന്നര ലക്ഷത്തിലധികം രൂപ വിലവരുന്ന മോട്ടോർസൈക്കിൾ കവർന്നുവെന്നാണ് കേസ്. അക്ബർഷാ കേസിലെ നാലാം പ്രതിയാണ്.

കഠിനംകുളം പൊലീസ് അ‍ഞ്ചുതെങ്ങ് പൊലീസിന്റെ സഹായത്തോടെ അരുവാളം എന്ന സ്ഥലത്തുനിന്നാണ് പ്രതികളെ കസ്റ്റഡിയിലെടുത്തത്. അറസ്റ്റ് രേഖപ്പെടുത്തിയ പ്രതികളെ കോടതിയിൽ ഹാജരാക്കി റിമാൻഡ് ചെയ്തു. കേസുമായി ബന്ധപ്പെട്ട അന്വേഷണം തുടരുകയാണ്.