ഇന്ത്യയും കൊറിയ റിപ്പബ്ലിക്കും തമ്മിലുള്ള നൂറ്റാണ്ടുകൾ പഴക്കമുള്ള സാംസ്കാരിക ബന്ധം കൂടുതൽ ശക്തിപ്പെടുത്തുമെന്ന് ലോക്സഭാ സ്പീക്കർ ഓം ബിർള പറഞ്ഞു. പാർലമെന്റ് മന്ദിരത്തിൽ കൊറിയ റിപ്പബ്ലിക്കിന്റെ ആഭ്യന്തര, സുരക്ഷാ മന്ത്രി യൂൻ ഹോജുങിന്റെ നേതൃത്വത്തിലുള്ള പ്രതിനിധിസംഘത്തെ സ്വീകരിക്കുന്നതിനിടെയായിരുന്നു പരാമർശം. ജൂൺ 19-നാണ് കൂടിക്കാഴ്ച നടന്നത്. ഇന്ത്യയും കൊറിയയും തമ്മിലുള്ള പങ്കാളിത്തം പ്രാദേശിക സ്ഥിരതയ്ക്കും സമാധാനത്തിനും ഉൾക്കൊള്ളുന്ന വളർച്ചയ്ക്കും പ്രധാനമാണെന്നും അദ്ദേഹം വ്യക്തമാക്കി.

ഇരു രാജ്യങ്ങളും ബൗദ്ധ പൈതൃകവും ജനങ്ങൾ തമ്മിലുള്ള അടുത്ത ബന്ധവും പങ്കിടുന്നുണ്ടെന്ന് ഓം ബിർള പറഞ്ഞു. ജനാധിപത്യം, നിയമവാഴ്ച, മനുഷ്യകേന്ദ്രിത വികസനം തുടങ്ങിയ പൊതുമൂല്യങ്ങളാണ് ഇരുരാജ്യങ്ങളെയും ബന്ധിപ്പിക്കുന്നതെന്നും അദ്ദേഹം ചൂണ്ടിക്കാട്ടി. കൃത്രിമ ബുദ്ധി, ഹരിത ഊർജം, അർധചാലകങ്ങൾ എന്നീ മേഖലകളിൽ സഹകരണത്തിന് വലിയ സാധ്യതയുണ്ടെന്നും വ്യക്തമാക്കി. ഇന്ത്യയുടെ വലിയ വിപണിയും യുവജനശക്തിയും കൊറിയൻ നിക്ഷേപങ്ങൾക്ക് അവസരമാണെന്നും അദ്ദേഹം പറഞ്ഞു. അടിസ്ഥാനസൗകര്യ വികസനത്തിലും നിർമ്മാണ മേഖലയിലും സഹകരണം വർധിപ്പിക്കണമെന്നും അദ്ദേഹം ആവശ്യപ്പെട്ടു. അതേസമയം, വിവരസാങ്കേതികവിദ്യ, കൃത്രിമ ബുദ്ധി, വാഹനനിർമാണം തുടങ്ങിയ മേഖലകളിൽ ഇരു രാജ്യങ്ങളും അടുത്ത സഹകരണത്തിലാണെന്ന് യൂൻ ഹോജുങ് പറഞ്ഞു. ദുരന്തനിവാരണ രംഗത്തെ മികച്ച രീതികൾ പങ്കിടാനും ദുരന്തപ്രതിരോധ ശേഷിയുള്ള അടിസ്ഥാനസൗകര്യ കൂട്ടായ്മയുടെ ഭാഗമാകാനും കൊറിയയ്ക്ക് താൽപര്യമുണ്ടെന്നും അദ്ദേഹം അറിയിച്ചു.

ഇന്ത്യയും കൊറിയ റിപ്പബ്ലിക്കും തമ്മിലുള്ള ബന്ധത്തിന് നൂറ്റാണ്ടുകളുടെ ചരിത്രമുണ്ടെന്ന് കൂടിക്കാഴ്ചയിൽ വീണ്ടും ഓർമ്മിപ്പിച്ചു. യോഗ, ആയുർവേദം, ഇന്ത്യൻ സംസ്കാരം എന്നിവയ്ക്ക് കൊറിയയിൽ വർധിച്ചുവരുന്ന സ്വീകാര്യത ജനങ്ങൾ തമ്മിലുള്ള ബന്ധം കൂടുതൽ ശക്തമാക്കുന്നതായും വിലയിരുത്തപ്പെട്ടു. നിയമനിർമാതാക്കൾ തമ്മിലുള്ള സ്ഥിരം ആശയവിനിമയവും പാർലമെന്ററി സൗഹൃദ കൂട്ടായ്മകളും ഉഭയകക്ഷി ബന്ധം കൂടുതൽ മെച്ചപ്പെടുത്താൻ സഹായിക്കുമെന്ന് ഇരുപക്ഷവും അഭിപ്രായപ്പെട്ടു.