അന്താരാഷ്ട്ര യോഗ ദിനം രണ്ടായിരത്തി ഇരുപത്തിയാറിനോടനുബന്ധിച്ച് ആയുഷ് മന്ത്രാലയത്തിന്റെ യോഗ സംഗം പോർട്ടലിൽ രജിസ്റ്റർ ചെയ്ത സ്ഥാപനങ്ങളുടെ എണ്ണം ആറു ലക്ഷം പിന്നിട്ടു. ജൂൺ ഇരുപത്തിയൊന്നിന് പ്രധാനമന്ത്രി നരേന്ദ്ര മോദിക്കൊപ്പം ഒരേസമയം യോഗ അഭ്യസിക്കുന്ന ദേശീയ പ്രസ്ഥാനത്തിന്റെ ഭാഗമാകാനാണ് ഈ രജിസ്ട്രേഷനുകൾ. രാജ്യത്തെ എഴുന്നൂറ്റി എഴുപത്തിയെട്ട് ജില്ലകളിലും എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി പരിപാടി വ്യാപിച്ചിട്ടുണ്ട്.

സ്കൂളുകൾ, കോളജുകൾ, സർക്കാർ സ്ഥാപനങ്ങൾ, സ്വകാര്യ സ്ഥാപനങ്ങൾ, സന്നദ്ധ സംഘടനകൾ, വിവിധ സമൂഹ കൂട്ടായ്മകൾ എന്നിവയാണ് രജിസ്ട്രേഷനുമായി മുന്നോട്ടുവന്നത്. പൊതുവായ യോഗ പ്രോട്ടോക്കോൾ അടിസ്ഥാനമാക്കി ഒരേ സമയത്ത് രാജ്യവ്യാപകമായി യോഗ സെഷനുകൾ സംഘടിപ്പിക്കുകയാണ് ലക്ഷ്യം. രജിസ്ട്രേഷൻ, ഏകോപനം, പങ്കാളിത്ത നിരീക്ഷണം എന്നിവയ്ക്ക് യോഗ സംഗം പോർട്ടൽ സഹായിക്കുന്നു. മൂന്ന് ലക്ഷത്തി ഇരുപത്തിരണ്ടായിരത്തിലധികം സർക്കാർ സ്ഥാപനങ്ങളും ഏകദേശം രണ്ടു ലക്ഷം വിദ്യാഭ്യാസ സ്ഥാപനങ്ങളും പതിനാറായിരത്തിലധികം സ്വകാര്യ സ്ഥാപനങ്ങളും അയ്യായിരത്തിലധികം സന്നദ്ധ സംഘടനകളും രജിസ്റ്റർ ചെയ്തിട്ടുണ്ട്.

അന്താരാഷ്ട്ര യോഗ ദിനം രണ്ടായിരത്തി ഇരുപത്തിയാറിന്റെ പ്രധാന പദ്ധതികളിലൊന്നാണ് യോഗ സംഗം. സംസ്ഥാനങ്ങളിൽ പശ്ചിമ ബംഗാളാണ് ഏറ്റവും കൂടുതൽ പങ്കാളിത്തം രേഖപ്പെടുത്തിയത്. രണ്ട് ലക്ഷത്തി എഴുപത്താറായിരത്തിലധികം സ്ഥാപനങ്ങളാണ് അവിടെ രജിസ്റ്റർ ചെയ്തത്. രാജസ്ഥാൻ രണ്ടാം സ്ഥാനത്താണ്. ഈ വർഷത്തെ അന്താരാഷ്ട്ര യോഗ ദിനം “ആരോഗ്യകരമായ വാർധക്യത്തിനായുള്ള യോഗ” എന്ന ആശയത്തെ ആസ്പദമാക്കിയാണ് ആഘോഷിക്കുന്നത്. കൂടുതൽ സ്ഥാപനങ്ങളെയും സമൂഹങ്ങളെയും ഈ പ്രസ്ഥാനത്തിന്റെ ഭാഗമാകാൻ ആയുഷ് മന്ത്രാലയം ക്ഷണിച്ചിട്ടുണ്ട്.