കൊച്ചി, 2026 ജൂൺ 17 –

സിഎംആർഎൽ-എക്സാലോജിക് സാമ്പത്തിക ഇടപാട് കേസിൽ വീണാ ടിയെ എൻഫോഴ്‌സ്‌മെന്റ് ഡയറക്ടറേറ്റ് വിശദമായി ചോദ്യം ചെയ്തു. ഇന്ന് രാവിലെ പത്ത് മണിയോടെ കൊച്ചിയിലെ ഇ ഡി ഓഫീസിൽ ഹാജരായ വീണയുടെ ചോദ്യം ചെയ്യൽ ഏകദേശം ഒമ്പത് മണിക്കൂർ നീണ്ടു. ചോദ്യം ചെയ്യലിന് ശേഷം വീണ മടങ്ങി. ഇ ഡി ഡപ്യൂട്ടി ഡയറക്ടറുടെ നേതൃത്വത്തിലായിരുന്നു നടപടി.

സിഎംആർഎല്ലുമായി നടത്തിയ സാമ്പത്തിക ഇടപാടുകളുമായി ബന്ധപ്പെട്ട നിരവധി കാര്യങ്ങളിൽ ഇ ഡി വിശദീകരണം തേടി. സേവനം നൽകാതെയാണ് സിഎംആർഎല്ലിൽ നിന്ന് 2.78 കോടി രൂപ കൈപ്പറ്റിയതെന്ന കണ്ടെത്തലിൽ പ്രതികരണം, ലഭിച്ച പണം എങ്ങനെ വിനിയോഗിച്ചു, സ്വത്തുക്കൾ വാങ്ങിയിട്ടുണ്ടോ, നിക്ഷേപങ്ങൾ നടത്തിയിട്ടുണ്ടോ തുടങ്ങിയ വിഷയങ്ങൾ ചോദ്യം ചെയ്യലിൽ ഉൾപ്പെട്ടതായി വിവരമുണ്ട്. എംപവർ ഇന്ത്യ സ്ഥാപനത്തിൽ നിന്ന് ലഭിച്ച 50 ലക്ഷം രൂപ വായ്പയുടെ സാഹചര്യങ്ങൾ, തിരിച്ചടവ്, പണത്തിന്റെ ഉപയോഗം എന്നിവയെക്കുറിച്ചും വിശദീകരണം തേടിയതായി അറിയുന്നു. സിഎംആർഎൽ ഉദ്യോഗസ്ഥർ മുമ്പ് നൽകിയ മൊഴികളുടെ അടിസ്ഥാനത്തിലും ചോദ്യങ്ങൾ തയ്യാറാക്കിയിരുന്നു.

കേസുമായി ബന്ധപ്പെട്ട് സിഎംആർഎൽ എംഡി ശരൺ എസ് കർത്തയെയും ജയ എസ് കർത്തയെയും ഇ ഡി ഇന്നലെ ചോദ്യം ചെയ്തിരുന്നു. തിങ്കളാഴ്ച സിഎംആർഎൽ ഡയറക്ടറായ ഷിബി എസ് കർത്തയെയും ചോദ്യം ചെയ്തിരുന്നു. നേരത്തെ ലഭിച്ച സമൻസിൽ ആരോഗ്യപ്രശ്നങ്ങൾ ചൂണ്ടിക്കാട്ടി കൂടുതൽ സമയം ആവശ്യപ്പെട്ട് വീണ ഇ മെയിൽ അയച്ചിരുന്നു. എന്നാൽ കൂടുതൽ സാവകാശം അനുവദിക്കാതെ ബുധനാഴ്ച ഹാജരാകണമെന്ന് ആവശ്യപ്പെട്ട് ഇ ഡി വീണ്ടും സമൻസ് നൽകുകയായിരുന്നു. ഇതിന്റെ അടിസ്ഥാനത്തിലാണ് ഇന്ന് ചോദ്യം ചെയ്യൽ നടന്നത്.