രാജ്യത്തിന്റെ വിവിധ മേഖലകളിലെ ബന്ധം ശക്തമാക്കിയ ഐക്കോണിക് പാല പദ്ധതികളുടെ നേട്ടങ്ങൾ കേന്ദ്ര റോഡ് ഗതാഗത, ദേശീയപാത മന്ത്രാലയം വിശദീകരിച്ചു. കഴിഞ്ഞ പന്ത്രണ്ട് വർഷത്തിനിടെ നടപ്പാക്കിയ പ്രധാന പാല നിർമാണങ്ങൾ ഇന്ത്യയുടെ അടിസ്ഥാനസൗകര്യ വികസനത്തിന് വലിയ കരുത്തായെന്നാണ് വിലയിരുത്തൽ. അസമിലെ ബ്രഹ്മപുത്ര നദിക്ക് മുകളിലെ പുതിയ സറായിഘട്ട് പാലം, രാജസ്ഥാനിലെ കോട്ടയിലെ ചമ്പൽ പാലം, ഗുജറാത്തിലെ ഭറൂച്ചിലെ നർമദാ പാലം, ബിഹാറിലെ ഗംഗാ പാലം, അസം-അരുണാചൽ പ്രദേശുകളെ ബന്ധിപ്പിക്കുന്ന ധോല-സാദിയ പാലം എന്നിവയാണ് പ്രധാനമായി എടുത്തുപറയുന്നത്.

പ്രധാനമന്ത്രി നരേന്ദ്ര മോദിയുടെ നേതൃത്വത്തിലും കേന്ദ്രമന്ത്രി നിതിൻ ഗഡ്കരിയുടെ മാർഗനിർദേശത്തിലും ഈ പദ്ധതികൾ നടപ്പാക്കിയതായാണ് മന്ത്രാലയം വ്യക്തമാക്കുന്നത്. മുമ്പ് എത്തിച്ചേരാൻ ബുദ്ധിമുട്ടായിരുന്ന മേഖലകളെ ബന്ധിപ്പിക്കാനും യാത്രാസമയം കുറയ്ക്കാനും ചരക്കുനീക്കം കൂടുതൽ കാര്യക്ഷമമാക്കാനും പാലങ്ങൾ സഹായിച്ചു. ഗുവാഹത്തിയിലെ പുതിയ സറായിഘട്ട് പാലം ഗതാഗതക്കുരുക്ക് കുറച്ചപ്പോൾ, കോട്ടയിലെ ചമ്പൽ പാലം വന്യജീവി സംരക്ഷണം കൂടി കണക്കിലെടുത്താണ് രൂപകൽപന ചെയ്തത്. ഗംഗാ പാലം വടക്കൻ ബിഹാറിനെയും തെക്കൻ ബിഹാറിനെയും നേരിട്ട് ബന്ധിപ്പിക്കുന്നു. ധോല-സാദിയ പാലം അസത്തിനും അരുണാചൽ പ്രദേശിനും ഇടയിലെ ആദ്യ സ്ഥിര റോഡ് ബന്ധമായി മാറി.

ഇന്ത്യയിലെ നദികളും അവയെ മുറിച്ചുകടക്കുന്ന പാലങ്ങളും ജനജീവിതത്തിന്റെയും സമ്പദ്‌വ്യവസ്ഥയുടെയും പ്രധാന ഘടകങ്ങളാണെന്ന് മന്ത്രാലയം ചൂണ്ടിക്കാട്ടുന്നു. ദൂരങ്ങൾ കുറയ്ക്കാനും അകലെയുള്ള പ്രദേശങ്ങളിലേക്ക് പ്രവേശനം എളുപ്പമാക്കാനും ഈ പാലങ്ങൾ സഹായിക്കുന്നു. കേബിൾ-സ്റ്റേഡ് പാലങ്ങൾ മുതൽ എക്സ്ട്രാഡോസ്ഡ് പാലങ്ങൾ വരെ ഉൾപ്പെടുന്ന ഈ നിർമാണങ്ങൾ രാജ്യത്തിന്റെ എഞ്ചിനീയറിങ് മികവും അടിസ്ഥാനസൗകര്യ വികസന കാഴ്ചപ്പാടും പ്രകടമാക്കുന്നതായും മന്ത്രാലയം വ്യക്തമാക്കി.

.

.:-