അടൂര്‍ കെഎസ്ആര്‍ടിസി സ്റ്റാന്‍ഡില്‍ സ്ത്രീയെ മര്‍ദ്ദിച്ചെന്ന് പരാതി; ജീവനക്കാരനെതിരെ അന്വേഷണം

പത്തനംതിട്ട, 2026 ജൂണ്‍ 15 –

അടൂര്‍ കെഎസ്ആര്‍ടിസി ബസ് സ്റ്റാന്‍ഡില്‍ ഭിക്ഷാടനത്തിന് എത്തിയ സ്ത്രീയെ കെഎസ്ആര്‍ടിസി ജീവനക്കാരന്‍ മര്‍ദ്ദിച്ചതായി പരാതി. അന്ധനായ ഒരാള്‍ക്കൊപ്പമാണ് സ്ത്രീ ബസ് സ്റ്റാന്‍ഡിലെത്തിയത്. യാത്രക്കാര്‍ക്ക് മുന്നില്‍ സഹായം അഭ്യര്‍ത്ഥിക്കുന്നതിനിടെ ജീവനക്കാരന്‍ വടികൊണ്ട് അടിച്ചെന്നാണ് ആരോപണം. ആര്‍ വേണു എന്ന ജീവനക്കാരനെതിരെയാണ് പരാതി ഉയര്‍ന്നിരിക്കുന്നത്. സ്ത്രീയ്ക്ക് നേരെ വടി വീശുന്ന ദൃശ്യങ്ങളും പുറത്തുവന്നിട്ടുണ്ട്.

സംഭവത്തിന് പിന്നാലെ സ്ത്രീ പൊലീസ് സ്റ്റേഷനില്‍ പരാതി നല്‍കി. വടികൊണ്ട് അടിക്കുകയും സ്ഥലത്ത് നിന്ന് ഓടിച്ചുവിടുകയും ചെയ്തുവെന്നാണ് പരാതിയില്‍ പറയുന്നത്. പൊലീസ് സ്ത്രീയുടെ മൊഴി രേഖപ്പെടുത്തിയിട്ടുണ്ട്. തുടര്‍ന്ന് ഇവര്‍ ജനറല്‍ ആശുപത്രിയില്‍ ചികിത്സയും തേടി. പരാതിയുടെ അടിസ്ഥാനത്തില്‍ പൊലീസ് പ്രാഥമിക അന്വേഷണം ആരംഭിച്ചിട്ടുണ്ട്.

അതേസമയം, ബസ് സ്റ്റാന്‍ഡ് പരിസരം ഭിക്ഷാടന നിരോധന മേഖലയാണെന്നും അതിനാല്‍ സ്ത്രീയെ അവിടെ നിന്ന് മാറ്റിനിര്‍ത്തുക മാത്രമാണ് ചെയ്തതെന്നുമാണ് കെഎസ്ആര്‍ടിസി ജീവനക്കാരുടെ വിശദീകരണം. മര്‍ദ്ദിച്ചിട്ടില്ലെന്നും ജീവനക്കാര്‍ പറയുന്നു. ആന്ധ്രാപ്രദേശ് സ്വദേശികളായ സ്ത്രീയും പുരുഷനും കഴിഞ്ഞ കുറേ നാളുകളായി കേരളത്തിലുണ്ട്. നിലവില്‍ ആലപ്പുഴയിലെ താമരക്കുളത്താണ് ഇവര്‍ താമസിക്കുന്നത്.