പ്രിയദര്‍ശിനി ഉദ്ഘാടനച്ചടങ്ങിനിടെ മന്ത്രി ബിന്ദു കൃഷ്ണയുടെ തലയില്‍ ചൂട് പായസം വീണു

കൊല്ലം, 2026 ജൂണ്‍ 15 –

പ്രിയദര്‍ശിനി സൗജന്യ യാത്ര പദ്ധതിയുടെ ഉദ്ഘാടനച്ചടങ്ങിനിടെ മന്ത്രി ബിന്ദു കൃഷ്ണയുടെ തലയില്‍ ചൂട് പായസം വീണു. കൊല്ലം കെഎസ്ആര്‍ടിസി ഡിപ്പോയില്‍ നടന്ന ചടങ്ങിനിടെയായിരുന്നു സംഭവം. യൂത്ത് കോണ്‍ഗ്രസിന്റെ നേതൃത്വത്തില്‍ പായസ വിതരണം നടക്കുന്നതിനിടെയാണ് അപകടമുണ്ടായത്. ബസിനുള്ളില്‍ പായസം വിതരണം ചെയ്യുന്നതിനിടെ കൈ തട്ടി പായസം മന്ത്രിയുടെ തലയിലേക്ക് വീഴുകയായിരുന്നു.

സംഭവത്തെ തുടര്‍ന്ന് മന്ത്രി നിലവിളിച്ചുകൊണ്ട് സീറ്റില്‍നിന്ന് ചാടിയെഴുന്നേറ്റു. ഒപ്പമുണ്ടായിരുന്നവര്‍ ഷാളും മറ്റ് തുണികളും ഉപയോഗിച്ച് തലയില്‍ വീണ പായസം തുടച്ചുമാറ്റി. സംഭവത്തിന്റെ ദൃശ്യങ്ങളും പുറത്തുവന്നിട്ടുണ്ട്.

ഇന്ന് രാവിലെയായിരുന്നു പ്രിയദര്‍ശിനി സൗജന്യ യാത്ര പദ്ധതിയുടെ സംസ്ഥാനതല ഉദ്ഘാടനം നടന്നത്. മുഖ്യമന്ത്രി വി ഡി സതീശനാണ് പദ്ധതി ഉദ്ഘാടനം ചെയ്തത്. 3,125 ബസുകളിലാണ് സൗജന്യ യാത്രാ സൗകര്യം ലഭിക്കുക. ഓര്‍ഡിനറി, സിറ്റി ഓര്‍ഡിനറി, ലിമിറ്റഡ് സ്റ്റോപ്പ്/ഓര്‍ഡിനറി, ടൗണ്‍ ടു ടൗണ്‍, ഫെയര്‍സ്റ്റേജ് ലിമിറ്റഡ് സ്റ്റോപ്പ്, പോയിന്റ് ടു പോയിന്റ്/ഓര്‍ഡിനറി, ഗ്രാമവണ്ടി എന്നീ ഏഴ് വിഭാഗം ബസുകളിലാണ് സ്ത്രീകള്‍ക്ക് സൗജന്യ യാത്ര ലഭിക്കുക. എല്ലാ പ്രായത്തിലുള്ള സ്ത്രീകളും ട്രാന്‍ജെന്‍ഡേഴ്സുമാണ് പദ്ധതിയുടെ ഗുണഭോക്താക്കള്‍.