മുനമ്പം ഭൂമി ഉമീദ് പോര്‍ട്ടലില്‍ രജിസ്റ്റര്‍ ചെയ്തത്: സംസ്ഥാന വഖഫ് ബോര്‍ഡിന് കേന്ദ്രത്തിന്റെ നോട്ടീസ്

എറണാകുളം, 2026 ജൂണ്‍ 15 –

മുനമ്പം തര്‍ക്കഭൂമി ഉമീദ് പോര്‍ട്ടലില്‍ രജിസ്റ്റര്‍ ചെയ്തതുമായി ബന്ധപ്പെട്ട് സംസ്ഥാന വഖഫ് ബോര്‍ഡിന് കേന്ദ്ര സര്‍ക്കാര്‍ നോട്ടീസ് നല്‍കി. ഭൂമി പോര്‍ട്ടലില്‍ ഉള്‍പ്പെടുത്തിയതിന്റെ വിശദീകരണം അഞ്ച് ദിവസത്തിനുള്ളില്‍ നല്‍കണമെന്നാണ് നിര്‍ദേശം. ഉമീദ് പോര്‍ട്ടലില്‍ നിന്ന് തര്‍ക്കഭൂമി നീക്കം ചെയ്യണമെന്ന് ബിജെപി ആവശ്യപ്പെട്ടിരുന്നു. തുടര്‍ന്ന് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍ കേന്ദ്ര വഖഫ് മന്ത്രി കിരണ്‍ റിജിജുവിന് കത്തും നല്‍കിയിരുന്നു.

മുനമ്പത്തെ തര്‍ക്കഭൂമി നിയമവിരുദ്ധമായാണ് ഉമീദ് പോര്‍ട്ടലില്‍ ഉള്‍പ്പെടുത്തിയതെന്ന ആക്ഷേപം നേരത്തെ ഉയര്‍ന്നിരുന്നു. പോര്‍ട്ടലില്‍ രജിസ്റ്റര്‍ ചെയ്താല്‍ അത് വഖഫ് ഭൂമിയായി അംഗീകരിക്കപ്പെടുകയും അവിടെ താമസിക്കുന്നവര്‍ക്ക് ഭൂമി വിട്ടുപോകേണ്ട സാഹചര്യം ഉണ്ടാകുമെന്നും ആശങ്ക ഉയര്‍ന്നിരുന്നു. ഈ പരാതിയുടെ അടിസ്ഥാനത്തിലാണ് കേന്ദ്രം സംസ്ഥാന വഖഫ് ബോര്‍ഡിനോട് വിശദീകരണം തേടിയത്. ഭൂമി നിയമപരമായാണോ നിയമവിരുദ്ധമായാണോ പോര്‍ട്ടലില്‍ രജിസ്റ്റര്‍ ചെയ്തതെന്നാണ് കേന്ദ്രത്തിന്റെ പ്രധാന ചോദ്യം.

സാധാരണ തര്‍ക്കഭൂമി ഉമീദ് പോര്‍ട്ടലില്‍ രജിസ്റ്റര്‍ ചെയ്യുമ്പോള്‍ നോട്ടീസ് നല്‍കിയിട്ടുണ്ടോ, ആവശ്യമായ നടപടിക്രമങ്ങള്‍ പൂര്‍ത്തിയാക്കിയിട്ടുണ്ടോ, ആക്ഷേപമുള്ളവരുടെ അഭിപ്രായം തേടിയിട്ടുണ്ടോ തുടങ്ങിയ കാര്യങ്ങളില്‍ വിശദീകരണം നല്‍കേണ്ടതുണ്ട്. വരുന്ന വഖഫ് ബോര്‍ഡ് യോഗത്തിന് ശേഷം മറുപടി നല്‍കുമെന്നാണ് കേന്ദ്രത്തിന് ലഭിച്ചിരിക്കുന്ന അനൗദ്യോഗിക വിവരം. തര്‍ക്കം നിലനിന്നിരുന്നെങ്കിലും കാലാവധി പൂര്‍ത്തിയാകുന്നതിന് മുമ്പുള്ള സ്വാഭാവിക നടപടിക്രമത്തിന്റെ ഭാഗമായാണ് ഭൂമി പോര്‍ട്ടലില്‍ ചേര്‍ത്തതെന്നാണ് വഖഫ് ബോര്‍ഡ് നേരത്തെ വ്യക്തമാക്കിയിരുന്നത്. കടലെടുത്തുപോയതായി പറയപ്പെടുന്ന ഭൂമിയും ഇതില്‍ ഉള്‍പ്പെട്ടിട്ടുണ്ടെന്ന് റിപ്പോര്‍ട്ടുകളുണ്ട്.