വിദിശ, 2026 ജൂൺ 15
മധ്യപ്രദേശിലെ വിദിശയിലെ ബെർഖേഡി ജേതുവിൽ കർഷകർക്കായുള്ള പ്രത്യേക പരിശീലന കേന്ദ്രത്തിനും മാതൃക കാർഷിക ശാസ്ത്ര കേന്ദ്രത്തിനും കേന്ദ്ര കൃഷി-കർഷകക്ഷേമ മന്ത്രി ശിവരാജ് സിങ് ചൗഹാൻ തറക്കല്ലിട്ടു. ജൂൺ 14ന് നടന്ന ചടങ്ങിൽ വിദിശ, റൈസെൻ, സീഹോർ, ദേവാസ് ജില്ലകൾക്കായുള്ള ശാസ്ത്രീയ കൃഷി മാർഗരേഖയും വയൽ സംരക്ഷണ പ്രചാരണവും ആധുനിക കാർഷിക സാങ്കേതിക സംവിധാനങ്ങളും ആരംഭിച്ചു.
രാഷ്ട്രീയ പരിപാടിയല്ല, കൃഷി പഠന ക്ലാസാണിതെന്ന് മന്ത്രി പറഞ്ഞു. കർഷകരെ വിദ്യാർഥികളായി കണ്ട് ശാസ്ത്രജ്ഞർ നേരിട്ട് വയലുകളിൽ പുതിയ സാങ്കേതിക വിദ്യകളും യന്ത്രങ്ങളും പരിചയപ്പെടുത്തും. നാൽപ്പത്തൊൻപത് ഏക്കറിൽ സ്ഥാപിക്കുന്ന മാതൃക കാർഷിക ശാസ്ത്ര കേന്ദ്രം ആധുനിക കൃഷിയുടെ സജീവ പരീക്ഷണശാലയായി പ്രവർത്തിക്കും. മണ്ണ് പരിശോധന, സമഗ്ര കൃഷിരീതി, വിള രോഗനിർണയത്തിനുള്ള കാർഷിക ചികിത്സാകേന്ദ്രം, ഉപദേശ സേവനങ്ങൾ, മൊബൈൽ സൗകര്യങ്ങൾ, യന്ത്ര ബാങ്കുകൾ എന്നിവയും ഇവിടെ ലഭ്യമാക്കും. വ്യാജ വളം, കീടനാശിനി, വിത്ത് എന്നിവയ്ക്കെതിരെ കർശന നടപടി സ്വീകരിക്കുമെന്നും മന്ത്രി വ്യക്തമാക്കി.
രാജ്യത്തെ വിവിധ കാർഷിക ഗവേഷണ സ്ഥാപനങ്ങളുടെയും കാർഷിക ശാസ്ത്ര കേന്ദ്രങ്ങളുടെയും പഠനഫലങ്ങൾ ഈ കേന്ദ്രത്തിലൂടെ നേരിട്ട് കർഷകരിലേക്ക് എത്തിക്കാനാണ് പദ്ധതി. ധാന്യങ്ങൾ, പയർവർഗങ്ങൾ, എണ്ണക്കുരുക്കൾ, തോട്ടകൃഷി, മത്സ്യകൃഷി, തേനീച്ച വളർത്തൽ, കൂൺകൃഷി എന്നിവ സംയോജിപ്പിച്ച കൃഷിരീതിക്ക് പ്രാധാന്യം നൽകും. കാർഷിക ഉൽപ്പന്നങ്ങളുടെ മൂല്യവർധന, സംസ്കരണം, യുവാക്കൾക്കായുള്ള സംരംഭകത്വ പരിശീലനം എന്നിവയും നടപ്പാക്കും. പയർ-എണ്ണക്കുരു ഉൽപ്പാദനം വർധിപ്പിക്കാനുള്ള ദൗത്യം ശക്തമാക്കുമെന്നും ഉൽപ്പാദിപ്പിക്കുന്ന പയർവർഗങ്ങൾ താങ്ങുവിലയ്ക്ക് സംഭരിക്കുമെന്നും മന്ത്രി അറിയിച്ചു.
