ഷിംല, 2026 ജൂൺ 8 –
രാജ്യത്ത് ഭക്ഷ്യസുരക്ഷാ നിയമങ്ങളുടെ നടപ്പാക്കൽ ശക്തമാക്കാൻ സംസ്ഥാനങ്ങളും കേന്ദ്രഭരണ പ്രദേശങ്ങളും ഫുഡ് സേഫ്റ്റി ഓഫീസർമാരുടെയും ഡിസിഗ്നേറ്റഡ് ഓഫീസർമാരുടെയും ഒഴിവുകൾ അടിയന്തരമായി നികത്തണമെന്ന് എഫ്എസ്എസ്എഐ സിഇഒ രാജിത് പുന്ഹാനി നിർദേശിച്ചു. എഫ്എസ്എസ്എഐയുടെ 50-ാമത് കേന്ദ്ര ഉപദേശക സമിതി യോഗത്തിലാണ് ഈ നിർദേശം നൽകിയത്. ലോക ഭക്ഷ്യസുരക്ഷാ ദിനത്തിന് തൊട്ടുപിന്നാലെ നടന്ന യോഗത്തിൽ രാജ്യത്തെ ഭക്ഷ്യസുരക്ഷാ സംവിധാനങ്ങൾ കൂടുതൽ ശക്തിപ്പെടുത്തുന്നതിന് ഊന്നൽ നൽകി.
പരിശോധനയും നിരീക്ഷണവും വർധിപ്പിക്കാൻ ആഹ്വാനം
സുരക്ഷിതമായ ഭക്ഷണം ഉറപ്പാക്കാൻ ശക്തമായ നിയമനടപടികൾ അനിവാര്യമാണെന്ന് യോഗം വിലയിരുത്തി. ഭക്ഷ്യസാമ്പിളുകളുടെ ശേഖരണവും പരിശോധനയും നിരീക്ഷണ പ്രവർത്തനങ്ങളും ഗണ്യമായി വർധിപ്പിക്കാൻ സംസ്ഥാനങ്ങൾക്ക് നിർദേശം നൽകി. ഉപഭോക്തൃ പരാതികൾ സമയബന്ധിതമായി പരിഹരിക്കുന്നതും ഫോസ്കോസ് പ്ലാറ്റ്ഫോമിലൂടെയുള്ള റിപ്പോർട്ടിങ് മെച്ചപ്പെടുത്തുന്നതും ചർച്ചയായി. പൊതുജന ബോധവത്കരണ പ്രവർത്തനങ്ങൾ ഗ്രാമതലത്തിൽ വരെ വ്യാപിപ്പിക്കണമെന്നും യോഗം ആവശ്യപ്പെട്ടു.
തെറ്റിദ്ധരിപ്പിക്കുന്ന അവകാശവാദങ്ങൾക്കും ശ്രദ്ധ
ഭക്ഷ്യ ഉൽപ്പന്നങ്ങൾ തിരിച്ചുവിളിക്കുന്ന സംവിധാനത്തിന്റെ കാര്യക്ഷമത, ലൈസൻസിങ് നടപടികൾ, ഭക്ഷ്യവ്യാപാര സ്ഥാപനങ്ങളുടെ ചട്ടപാലനം, ആരോഗ്യ സപ്ലിമെന്റുകളുടെയും ന്യൂട്രാസ്യൂട്ടിക്കലുകളുടെയും ലേബലിങ് എന്നിവയും യോഗത്തിൽ ചർച്ചയായി. ഭക്ഷ്യ പരസ്യങ്ങളിലെ തെറ്റിദ്ധരിപ്പിക്കുന്ന അവകാശവാദങ്ങൾ തടയുന്നതിനും സുസ്ഥിര പാക്കേജിങ് പ്രോത്സാഹിപ്പിക്കുന്നതിനും നടപടികൾ ശക്തമാക്കണമെന്ന് നിർദേശിച്ചു. ലബോറട്ടറികളിലെ സാങ്കേതിക ജീവനക്കാരുടെ നിയമനം, പരിശോധനാഫലങ്ങൾ വേഗത്തിലാക്കൽ, എൻഎബിഎൽ മാനദണ്ഡങ്ങൾ പാലിക്കൽ എന്നിവയ്ക്കും പ്രാധാന്യം നൽകി.
