തിരുവനന്തപുരം, 2026 ജൂൺ 13 –
സംസ്ഥാനത്തെ സർവകലാശാലകളിലെ വൈസ് ചാൻസലർമാരെയും രജിസ്ട്രാർമാരെയും ഉൾപ്പെടുത്തി ഉന്നത വിദ്യാഭ്യാസ വകുപ്പ് പുതിയ വാട്സ്ആപ്പ് ഗ്രൂപ്പ് ആരംഭിച്ചു. ഉന്നത വിദ്യാഭ്യാസ വകുപ്പിന്റെ പ്രിൻസിപ്പൽ സെക്രട്ടറിയായ ബി. അശോകാണ് ഗ്രൂപ്പിന് തുടക്കമിട്ടത്. വകുപ്പിന് കീഴിലുള്ള ഒമ്പത് സർവകലാശാലകളിലെ ഉദ്യോഗസ്ഥരാണ് ഗ്രൂപ്പിൽ അംഗങ്ങളായിരിക്കുന്നത്. ബി. അശോക് പ്രിൻസിപ്പൽ സെക്രട്ടറിയായി ചുമതലയേറ്റതിന് പിന്നാലെയാണ് നടപടി.
സർവകലാശാലകളുമായി കൂടുതൽ എളുപ്പത്തിൽ സമ്പർക്കം പുലർത്തുന്നതിനാണ് ഗ്രൂപ്പ് രൂപീകരിച്ചതെന്നാണ് വകുപ്പിന്റെ വിശദീകരണം. എന്നാൽ സെക്രട്ടറിയുടെ നടപടിയിൽ ഒരു വിഭാഗം വൈസ് ചാൻസലർമാർക്ക് അമർഷമുണ്ടെന്നാണ് വിവരം. പൊതുവേ സ്വയംഭരണ സ്ഥാപനങ്ങളായ സർവകലാശാലകളുടെ ഭരണകാര്യങ്ങളിൽ സർക്കാർ നേരിട്ട് ഇടപെടാറില്ലെന്ന നിലപാടാണ് ഈ അസ്വസ്ഥതയ്ക്ക് കാരണമായി ചൂണ്ടിക്കാണിക്കപ്പെടുന്നത്.
ഐ.എ.എസ് തലത്തിലെ വലിയ അഴിച്ചുപണിയുടെ ഭാഗമായാണ് ബി. അശോകിനെ ഉന്നത വിദ്യാഭ്യാസ വകുപ്പിന്റെ പ്രിൻസിപ്പൽ സെക്രട്ടറിയായി നിയമിച്ചത്. നേരത്തെ എൽ.ഡി.എഫ് സർക്കാർ സസ്പെൻഡ് ചെയ്ത ഉദ്യോഗസ്ഥനായിരുന്നു അദ്ദേഹം. നിയമനത്തിന് പിന്നാലെ സർക്കാരിനെതിരെ വിമർശനങ്ങളും ഉയർന്നിരുന്നു. ബി. അശോകിന് സംഘപരിവാർ പശ്ചാത്തലമുണ്ടെന്ന് ആരോപിച്ച് എസ്.എഫ്.ഐ രംഗത്തെത്തിയതും വിവാദങ്ങൾക്ക് വഴിവെച്ചിരുന്നു.
