മുതലപ്പൊഴിയിലെ പുതിയ പദ്ധതികൾ കൂടുതൽ പഠനത്തിന് ശേഷം മാത്രം

തിരുവനന്തപുരം, 2026 ജൂൺ 10 –

മുതലപ്പൊഴിയിൽ പുതിയ പദ്ധതികൾ നടപ്പാക്കുന്നത് കൂടുതൽ പഠനങ്ങൾ പൂർത്തിയായ ശേഷമായിരിക്കുമെന്ന് ഫിഷറീസ് വകുപ്പ് മന്ത്രി വി ഇ അബ്ദുൾ ഗഫൂർ അറിയിച്ചു. പൂനെ ആസ്ഥാനമായുള്ള സെൻട്രൽ വാട്ടർ ആൻഡ് പവർ റിസർച്ച് സ്റ്റേഷനാണ് പഠന ചുമതല വഹിക്കുന്നത്. ഹാർബർ നവീകരണം ഉൾപ്പെടെയുള്ള പദ്ധതികളും പഠന റിപ്പോർട്ടിന്റെ അടിസ്ഥാനത്തിലായിരിക്കും ആരംഭിക്കുക.

മൗത്ത് കർവിൽ മാറ്റങ്ങൾ ആവശ്യമാണെന്ന് പഠനത്തിൽ കണ്ടെത്തിയാൽ അതനുസരിച്ചുള്ള നടപടികൾ സ്വീകരിക്കുമെന്നും മന്ത്രി പറഞ്ഞു. മൗത്ത് കർവ് ചെറുതായതിനാൽ അപകടങ്ങൾ വീണ്ടും വർധിച്ച സാഹചര്യത്തിലാണ് വിശദമായ പഠനം നടത്തുന്നത്. നിലവിലുള്ള പദ്ധതി മൺസൂൺ കാലത്തിന് ശേഷം തുടരുമെന്നും അദ്ദേഹം വ്യക്തമാക്കി.

ഡ്രഡ്ജിംഗ് പ്രവർത്തനങ്ങൾക്കായി അദാനിയിൽ നിന്ന് ഡ്രഡ്ജർ വാങ്ങുന്നതും ഫിഷറീസ് വകുപ്പിന്റെ പരിഗണനയിലുണ്ട്. ജനപ്രതിനിധികളുമായി നടത്തിയ ചർച്ചയിലാണ് ഈ തീരുമാനങ്ങൾ ഉണ്ടായത്. ഹാർബർ, ഫിഷറീസ് വകുപ്പ് ഉദ്യോഗസ്ഥർ ഉൾപ്പെടെ യോഗത്തിൽ പങ്കെടുത്തു. മന്ത്രി വി ഇ അബ്ദുൾ ഗഫൂർ നാളെ രാവിലെ മുതലപ്പൊഴി സന്ദർശിക്കും.