ന്യൂഡൽഹിയിൽ നടന്ന ആഗോള അംബാസഡർ സമ്മേളനത്തിൽ ഇന്ത്യയുടെ ഔഷധമേഖലയെ കുറിച്ചുള്ള പ്രധാന പ്രഖ്യാപനങ്ങളാണ് ഉണ്ടായത്. ഇന്ത്യ ഗുണമേന്മയുള്ളതും ചെലവ് കുറഞ്ഞതുമായ ആരോഗ്യസേവനം ലോകത്തിന് ലഭ്യമാക്കാനുള്ള പ്രതിബദ്ധത തുടരുകയാണെന്ന് കേന്ദ്ര വാണിജ്യ-വ്യവസായ മന്ത്രി പിയൂഷ് ഗോയൽ പറഞ്ഞു. ഇന്ത്യയുടെ ഔഷധ കയറ്റുമതി 2014-15 കാലത്തെ ഏകദേശം 14 ബില്യൺ ഡോളറിൽ നിന്ന് 2025-26ൽ ഏകദേശം 31 ബില്യൺ ഡോളറിലെത്തിയതായും അദ്ദേഹം വ്യക്തമാക്കി. ഇന്ത്യയിൽ നിന്നുള്ള മരുന്നുകൾ ഇരുനൂറിലധികം രാജ്യങ്ങളിലെ രോഗികളിലെത്തുന്നുണ്ടെന്നും അദ്ദേഹം പറഞ്ഞു.

സമ്മേളനത്തിൽ പിയൂഷ് ഗോയൽ, കേന്ദ്ര സഹമന്ത്രി ജിതിൻ പ്രസാദ, വാണിജ്യ സെക്രട്ടറി രാജേഷ് അഗർവാൾ എന്നിവർ പങ്കെടുത്തു. വിശ്വാസ്യത, നവീകരണം, പങ്കാളിത്തം എന്നിവയാണ് ഇന്ത്യയുടെ ഔഷധമേഖലയുടെ ശക്തിയെന്ന് പിയൂഷ് ഗോയൽ പറഞ്ഞു. ആഗോള ആരോഗ്യസംവിധാനങ്ങൾ കൂടുതൽ ശക്തമാക്കാൻ രാജ്യങ്ങൾ തമ്മിലുള്ള സഹകരണം അനിവാര്യമാണെന്ന് ജിതിൻ പ്രസാദ വ്യക്തമാക്കി. ഗുണമേന്മ, നവീകരണം, നിയന്ത്രണ മികവ്, വിപണി വൈവിധ്യവൽക്കരണം എന്നിവയിലൂടെ 2030ഓടെ 50 ബില്യൺ ഡോളർ ഔഷധ കയറ്റുമതി ലക്ഷ്യമിടുന്നതായി രാജേഷ് അഗർവാൾ അറിയിച്ചു.

കോവിഡ്കാലത്ത് ആഭ്യന്തര ആവശ്യങ്ങൾ നിറവേറ്റുന്നതിനൊപ്പം നിരവധി രാജ്യങ്ങളിലേക്ക് മരുന്നുകളും വാക്സിനുകളും എത്തിച്ച അനുഭവം ഇന്ത്യയുടെ വിശ്വാസ്യത വർധിപ്പിച്ചതായി യോഗത്തിൽ ചൂണ്ടിക്കാട്ടി. രാജ്യത്ത് 10,500ലധികം നിർമ്മാണ യൂണിറ്റുകളും 60 ചികിത്സാ വിഭാഗങ്ങളിലായി 60,000ത്തിലധികം ജനറിക് ബ്രാൻഡുകളും പ്രവർത്തിക്കുന്നുണ്ട്. സെപ്റ്റംബർ 7 മുതൽ 9 വരെ ന്യൂഡൽഹിയിലെ ഭാരത് മണ്ഡപത്തിൽ നടക്കുന്ന ഔഷധ-ആരോഗ്യ പ്രദർശനവും ജൂലൈ 30, 31 തീയതികളിൽ നടക്കുന്ന ആഗോള ഔഷധ നിയന്ത്രണ സമ്മേളനവും ഈ രംഗത്തെ അന്തർദേശീയ സഹകരണം കൂടുതൽ ശക്തമാക്കുമെന്നാണ് പ്രതീക്ഷ. 98 രാജ്യങ്ങളിൽ നിന്നുള്ള പ്രതിനിധികൾ സമ്മേളനത്തിൽ പങ്കെടുത്തു.