കാസര്ഗോഡ്: പൊതുമരാമത്ത് വകുപ്പിനെ അവഗണിച്ച് ദേശീയപാത ഉദ്ഘാടനം ചെയ്ത കേന്ദ്രസര്ക്കാര് നടപടിക്കെതിരേ പ്രതിഷേധവുമായി സമാന്തര ഉദ്ഘാടനപരിപാടി നടത്തി പ്രതിഷേധിച്ച് സിപിഎം. തലപ്പാടി- ചെങ്കള ദേശീയപാതയിലെ നുള്ളിപ്പാടിയില് സി.എച്ച്. കുഞ്ഞമ്പു എംഎല്എ നാടമുറിച്ച് ഉദ്ഘാടനം നിര്വഹിച്ചു. കൊച്ചിയിലെ ചടങ്ങില്നിന്ന് ഒന്നരമണിക്കൂര് നേരത്തേയാണ് കാസര്ഗോഡ് ദേശീയപാത ഉദ്ഘാടനം ചെയ്തത്.
ജനാധിപത്യ മര്യാദയുടെ ലംഘനത്തിന് കേരളം മറുപടി നല്കും
ബിജെപിയുടെ നാലാള് ചേര്ന്ന് ഉദ്ഘാടനം ചെയ്യേണ്ട പദ്ധതിയല്ല ദേശീയപാതയെന്ന് എംഎല്എ പറഞ്ഞു.സംസ്ഥാന സര്ക്കാര് ഏറെ ബുദ്ധിമുട്ടി പ്രശ്നങ്ങള് പരിഹരിച്ചുകൊണ്ടാണ് ദേശീയപാത നിര്മിച്ചത്. 6,000 കോടി രൂപയാണ് കേന്ദ്രസര്ക്കാരിനു നല്കിയത്. പൊതുമരാമത്ത് മന്ത്രിയെ ക്ഷണിക്കാത്ത ജനാധിപത്യ മര്യാദയുടെ ലംഘനത്തിന് കേരളം മറുപടി നല്കുമെന്നും അദ്ദേഹം പറഞ്ഞു.
