.
ന്യൂഡൽഹി: ഇന്ത്യയിലെ ഉന്നത വിദ്യാഭ്യാസ സ്ഥാപനങ്ങളിൽ നിലവിൽ 200 രാജ്യങ്ങളിൽ നിന്നായി 72,218 വിദേശ വിദ്യാർഥികൾ പഠിക്കുന്നതായി കേന്ദ്ര സർക്കാർ. ഡിസംബർ 3 ബുധനാഴ്ച ചോദ്യോത്തര വേളയിൽ സപ്ലിമെന്ററി ചോദ്യങ്ങൾക്ക് മറുപടി നൽകുകയായിരുന്നു കേന്ദ്ര വിദ്യാഭ്യാസ സഹമന്ത്രി സുകാന്ത മജുംദാർ.
വേൾഡ് യൂണിവേഴ്സിറ്റി റാങ്കിങ്ങിൽ (QS WUR) 54 ഇന്ത്യൻ സ്ഥാപനങ്ങൾ ഇടംനേടി
2026 ക്യു.എസ്. വേൾഡ് യൂണിവേഴ്സിറ്റി റാങ്കിങ്ങിൽ (QS WUR) 54 ഇന്ത്യൻ സ്ഥാപനങ്ങൾ ഇടംനേടിയതായും അദ്ദേഹം അറിയിച്ചു. 2014-15ൽ ഇത് 11 എണ്ണം മാത്രമായിരുന്നു. വിദേശ വിദ്യാർഥികൾ വിവിധ വിഷയങ്ങളിലായി വൈവിധ്യമാർന്ന കോഴ്സുകളാണ് പഠിക്കുന്നതെന്നും മന്ത്രി ചൂണ്ടിക്കാട്ടി. ലോകോത്തര സ്ഥാപനങ്ങൾ (Institution of Eminence – IoE) പദ്ധതിയിൽ 10 പൊതു മേഖലാ സ്ഥാപനങ്ങളെയും 10 സ്വകാര്യ സ്ഥാപനങ്ങളെയുമാണ് തിരഞ്ഞെടുക്കേണ്ടത്.
എട്ട് പൊതുമേഖലാ IoE സ്ഥാപനങ്ങൾക്കായി 6,198.99 കോടി രൂപ അനുവദിച്ചതായി മന്ത്രി അറിയിച്ചു.
ഇതുവരെ 12 സ്ഥാപനങ്ങൾക്ക് (8 പൊതുമേഖല, 4 സ്വകാര്യമേഖല) IoE പദവി നൽകി. പൊതുമേഖലാ സ്ഥാപനങ്ങൾക്ക് മാത്രമാണ് സാമ്പത്തിക സഹായം നൽകുന്നത്. പദ്ധതി ആരംഭിച്ചത് മുതൽ എട്ട് പൊതുമേഖലാ IoE സ്ഥാപനങ്ങൾക്കായി 6,198.99 കോടി രൂപ അനുവദിച്ചതായും മന്ത്രി അറിയിച്ചു.
