ശബരിമലയിലെത്തുന്ന കുട്ടികൾക്ക് പ്രത്യേക ദർശന സൗകര്യം ഒരുക്കുമെന്ന് തിരുവിതാംകൂര്‍ ദേവസ്വം ബോർഡ് പ്രസിഡന്റ് പി. എസ് പ്രശാന്ത്. പതിനെട്ടാം പടി കടന്നെത്തുന്ന കൊച്ചയ്യപ്പന്മാർക്കും കൊച്ചുമാളികപ്പുറങ്ങൾക്കും ഭഗവാന്റെ ദർശനം നല്ലതുപോലെ ലഭിക്കാത്ത സാഹചര്യം ഉണ്ട്. ഇത് ഒഴിവാക്കാൻ കുട്ടികളെ മുൻനിരയിലേക്ക് എത്തിക്കണം. ഇതിനായി ശ്രീകോവിലിനടുത്ത് പ്രത്യേക ഗേറ്റ് സ്ഥാപിച്ച് ,
കുട്ടികളെയും അവർക്കൊപ്പമുള്ള ഒരു രക്ഷാകർത്താവിനെയും കടത്തിവിടും.
ഈ സംവിധാനം ദുരുപയോഗം ചെയ്യാതിരിക്കാൻ ദേവസ്വം ഗാർഡുമാരും പോലീസും ഡ്യൂട്ടിക്ക് ഉണ്ടാകും. ഉടൻ തന്നെ ഈ സൗകര്യം നടപ്പിലാക്കാൻ ദേവസ്വം പൊതുമരാമത്തിന് കർശന നിർദേശം നൽകിയിട്ടുണ്ടെന്നും അദ്ദേഹം പറഞ്ഞു.
ശബരിമലയിൽ ഉച്ചയ്ക്ക് ഒരു മണി വരെ 47000 ത്തിൽ അധികം അയ്യപ്പന്മാരാണ് പതിനെട്ടാം പടി കയറി ദര്‍ശനം നടത്തിയത്. ഇന്ന് ഒരു ലക്ഷത്തിൽ അധികം അയ്യപ്പന്മാർ സന്നിധാനത്ത് എത്തും എന്ന കണക്ക് കൂട്ടൽ ആണ് അധികൃതർക്ക് ഉള്ളത്. പമ്പയിലും തിരക്ക് നിയന്ത്രണ വിധേയം ആണ്. എവിടെയും കടുത്ത നിയന്ത്രണങ്ങൾ ഏർപ്പെടുത്തിയിട്ടില്ല. വാരാന്ത്യ ദിനങ്ങളിലുണ്ടാകുന്ന കനത്ത തിരക്ക് നിയന്ത്രിക്കാനുള്ള തയാറെടുപ്പുകള്‍ പോലീസും ദേവസ്വം ബോര്‍ഡ് നടത്തുന്നുണ്ട്.
