ന്യൂഡല്ഹി: കണ്ണൂര് വിമാനത്താവളത്തില് നിന്ന് കൂടുതല് സര്വീസുകള് ആരംഭിക്കുന്നത് ഉള്പ്പെടെയുള്ള ആവശ്യങ്ങള് അനുഭാവപൂര്വം പരിഗണിക്കുമെന്ന് വ്യോമയാന മന്ത്രി ജ്യോതിരാദിത്യ സിന്ധ്യ. കണ്ണൂര് വിമാനത്താവളത്തിന്റെ വളര്ച്ച ലക്ഷ്യമിട്ട് വിവിധ ആവശ്യങ്ങളുമായി ഡല്ഹിയിലെത്തിയ ‘ടീം ഹിസ്റ്റോറിക്കല് ഫ്ലൈറ്റ് ജേണി’ പ്രതിനിധി സംഘവുമായുള്ള കൂടിക്കാഴ്ചയിലാണ് മന്ത്രി ഇക്കാര്യം അറിയിച്ചത്. കണ്ണൂരില് നിന്നുള്ള ഉദ്ഘാടന വിമാനത്തില് അബുദാബിയിലേക്കും തിരികെയും യാത്ര ചെയ്തവരുടെ കൂട്ടായ്മയാണ് ഹിസ്റ്റോറിക്കല് ഫ്ലൈറ്റ് ജേണി.ഹജ് എംബാര്ക്കേഷന് കേന്ദ്രമായി കണ്ണൂരിനെ മാറ്റുന്ന കാര്യം പരിഗണിക്കാമെന്ന് ന്യൂനപക്ഷ ക്ഷേമ മന്ത്രി ഡോ. സ്മൃതി ഇറാനി ഉറപ്പു നല്കി. വിദേശകാര്യ സഹമന്ത്രി വി.മുരളീധരന്, ജോണ് ബ്രിട്ടാസ് എംപി എന്നിവരുടെ സാന്നിധ്യത്തിലായിരുന്നും സ്മൃതി ഇറാനിയുമായുള്ള കൂടിക്കാഴ്ച. ഇക്കാര്യത്തില് സജീവമായി ഇടപെടുമെന്ന് കേന്ദ്ര ഹജ് കമ്മിറ്റി ചെയര്മാനും ബിജെപി ദേശീയ വൈസ് പ്രസിഡന്റുമായ എ.പി.അബ്ദുല്ലക്കുട്ടിയും പ്രതിനിധിസംഘത്തെ അറിയിച്ചു.
കണ്ണൂര് വിമാനത്താവളത്തില് നിന്ന് കൂടുതല് സര്വീസുകള്; പരിഗണിക്കുമെന്ന് കേന്ദ്ര മന്ത്രി ജ്യോതിരാദിത്യ സിന്ധ്യ
