കുന്നംകുളം നിയോജകമണ്ഡലത്തിലെ ഐസൊലേഷൻ വാർഡിന്റെ ഉദ്ഘാടനം ഡിസംബർ 17 ന് ഉച്ചക്ക് 12 മണിക്ക് മുഖ്യമന്ത്രി പിണറായി വിജയൻ ഓൺലൈനായി നിർവഹിക്കും. ആരോഗ്യ വകുപ്പ് മന്ത്രി വീണ ജോർജ് ഓൺലൈനിൽ അധ്യക്ഷതവഹിക്കും. പഴഞ്ഞി കമ്മ്യൂണിറ്റി ഹെൽത്ത് സെന്ററിൽ നടക്കുന്ന ചടങ്ങിൽ രമ്യ ഹരിദാസ് എംപി, എ സി മൊയ്തീൻ എംഎൽഎ തുടങ്ങിയവർ മുഖ്യാതിഥികളാകും.
എംഎൽഎ ഫണ്ടും കിഫ്ബി ഫണ്ടും ചേർത്ത് 1.79 കോടി രൂപ ചെലവഴിച്ചാണ് ഐസൊലേഷൻ വാർഡിന്റെ നിർമ്മാണം പൂർത്തീകരിച്ചത്. നിപ, കോവിഡ് പോലുള്ള മഹാമാരികളുടെ സാഹചര്യത്തിൽ സംസ്ഥാനത്ത് 140 നിയോജകമണ്ഡലങ്ങളിലും ഐസൊലേഷൻ വാർഡുകൾ നിർമ്മിക്കുന്നതിന് തീരുമാനിച്ചിരുന്നു. നിപ, കോവിഡ് പോലുള്ള വൈറസ് ബാധയേറ്റ രോഗികളെ മറ്റു രോഗികളിൽ നിന്ന് മാറ്റി പ്രത്യേക ചികിത്സ നടത്തുന്നതിനുള്ള സൗകര്യമാണ് ഇതുവഴി ഒരുങ്ങുന്നത്.
10 കിടക്കകളുള്ള ഐസൊലേഷൻ വാർഡിൽ നഴ്സിംഗ് സ്റ്റേഷൻ, ഡോക്ടേഴ്സ് റൂം തുടങ്ങിയ സൗകര്യങ്ങളുണ്ട്. 2400 ചതുരശ്ര അടിയിൽ പ്രീ ഫാബ്രിക്കേറ്റഡ് മാതൃകയിൽ നിർമ്മിച്ച കെട്ടിടവും ഐസൊലേഷൻ വാർഡ് പ്രവർത്തിക്കുന്നതിന് ആവശ്യമായ ഉപകരണങ്ങളും ഈ പദ്ധതിക്ക് വേണ്ടി ഒരുക്കിയിട്ടുണ്ട്. കേരള മെഡിക്കൽ സർവീസസ് കോർപ്പറേഷൻ ലിമിറ്റഡാണ് ഉപകരണങ്ങൾ വിതരണം ചെയ്യുന്നത്. തൃശ്ശൂർ ജില്ലാ ലേബർ കോൺട്രാക്ട് കോ-ഓപ്പറേറ്റീവ് സൊസൈറ്റിക്കാണ് ഐസൊലേഷൻ വാർഡിന്റെ നിർമ്മാണചുമതല.
പഴഞ്ഞി കമ്മ്യൂണിറ്റി ഹെൽത്ത് സെന്ററിൽ നടക്കുന്ന ചടങ്ങിൽ ചൊവ്വന്നൂർ ബ്ലോക്ക് പഞ്ചായത്ത് പ്രസിഡന്റ് ആൻസി വില്യംസ്,വൈസ് പ്രസിഡൻറ് കെ ജി പ്രമോദ്, കാട്ടാകാമ്പാൽ ഗ്രാമപഞ്ചായത്ത് പ്രസിഡന്റ് ഇ എസ് രേഷ്മ, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷന്മാർ, ബ്ലോക്ക് – ഗ്രാമപഞ്ചായത്ത് അംഗങ്ങൾ, ഉദ്യോഗസ്ഥർ, ജനപ്രതിനിധികൾ തുടങ്ങിയവർ പങ്കെടുക്കും.
