ന്യൂഡല്ഹി: ഇന്ത്യന് നാവികസേനയുടെ തലപ്പത്തേക്ക് മലയാളി. വൈസ് അഡ്മിറല് ആര് ഹരികുമാറിനെ നാവികസേനയുടെ പുതിയ മേധാവിയായി നിയമിച്ചു. ഈ മാസം 30നാണ് ചുമതലയേല്ക്കുക. നിലവിലെ നാവികസേനാ മേധാവി കരംബിര് സിങ് നവംബര് 30ന് വിരമിക്കുന്ന ഒഴിവിലേക്കാണ് ചുമതല.
തിരുവനന്തപുരം സ്വദേശിയായ ഹരികുമാര് 1983ലാണ് നാവികസേനയിലെത്തുന്നത്. 1962 ഏപ്രില് 12ന് തിരുവനന്തപുരത്തെ പട്ടത്താണ് ഹരികുമാറിന്റെ ജനനം. പിന്നീട് തിരുവനന്തപുരത്ത് മന്നം മെമ്മോറിയല് ഹയര് സെക്കണ്ടറി സ്കൂളില് വിദ്യാഭ്യാസത്തിന് ശേഷം തിരുവനന്തപുരം ആര്ട്സ് കോളേജില് ഉപരിപഠനത്തിനു ചേര്ന്നു. ഇതിനുപിന്നാലെ 1979 ലാണ് നാഷണല് ഡിഫന്സ് അക്കാദമിയില് ചേര്ന്ന് സൈനിക വിദ്യാഭ്യാസത്തിന്റെ ആദ്യ പടിയിലേക്ക് ഹരികുമാര് കാലു വയ്ക്കുന്നത്.
പരം വിശിഷ്ട സേവാ മെഡല്, അതി വിശിഷ്ട സേവാ മെഡല് , വിശിഷ്ട സേവാ മെഡല് എന്നിവ ലഭിച്ചിട്ടുണ്ട്. നിലവില് വെസ്റ്റേണ് നേവല് കമാന്ഡ് ഫ്ളാഗ് ഓഫീസര് കമാന്ഡ് ഇന് ചീഫാണ്.
ഐഎന്എസ് വിരാട് എന്ന വിമാനവാഹിനി യുദ്ധക്കപ്പലിന്റെ കമാന്ഡറായി പ്രവര്ത്തിച്ചിട്ടുണ്ട്. അതിനുപുറമേ ഐഎന്എസ് നിഷാങ്ക്, ഐഎന്എസ് രണ്വീര്, ഐഎന്എസ് കോറ തുടങ്ങിയ യുദ്ധക്കപ്പലുകളുടെ തലവനുമായിരുന്നു അദ്ദേഹം.
