പത്തനംതിട്ട: പത്തനംതിട്ട ജനറല് ആശുപത്രിയിലെ ഹൈടെക് അമ്മത്തൊട്ടില് സെപ്തംബര് 11 ശനിയാഴ്ച രാവിലെ 11ന് ആരോഗ്യ-വനിതാ ശിശുവികസന വകുപ്പ് മന്ത്രി വീണാ ജോര്ജ് ഉദ്ഘാടനം നിര്വഹിക്കും.
മന്ത്രി വീണാ ജോര്ജിന്റെ എംഎല്എ ഫണ്ടില് നിന്നും(2019-2020 പ്രാദേശിക വികസന ഫണ്ട്) തുക വിനിയോഗിച്ചാണ് ഹൈടെക് അമ്മത്തൊട്ടില് പത്തനംതിട്ട ജനറല് ആശുപത്രിയില് യഥാര്ഥ്യമാകുന്നത്. ശിശുക്ഷേമ രംഗത്ത് ദേശീയ ശ്രദ്ധയും പ്രശംസയും ലഭിച്ച അമ്മത്തൊട്ടിലുകളുടെ കാര്യത്തില് ഒരുതലം കൂടി കടന്നാണ് ഹൈടെക്ക് അമ്മത്തൊട്ടില് യഥാര്ഥ്യമാക്കിയത്. 2009 ല് പത്തനംതിട്ട ജനറല് ആശുപത്രിയില് സ്ഥാപിച്ച അമ്മത്തൊട്ടിലില് നിന്ന് നിരവധി കുഞ്ഞുങ്ങളെ സംസ്ഥാന ശിശുക്ഷേമ സമിതി ഏറ്റെടുത്ത് പരിപാലിച്ചിട്ടുണ്ട്.
സംസ്ഥാന ശിശുക്ഷേമ സമിതി ജനറല് സെക്രട്ടറി ഡോ. ഷിജുഖാന് അധ്യക്ഷത വഹിക്കുന്ന ഉദ്ഘാടന ചടങ്ങില് ജില്ലാ കളക്ടര് ഡോ. ദിവ്യ എസ്. അയ്യര് വിശിഷ്ടാതിഥിയായിരിക്കും. പത്തനംതിട്ട നഗരസഭാ ചെയര്മാന് അഡ്വ.ടി.സക്കീര്ഹുസൈന് മുഖ്യപ്രഭാഷണം നടത്തും. സംഘാടക സമിതി ചെയര്മാന് പ്രൊഥ.ടി.കെ.ജി നായര്, ജില്ലാ ശിശുക്ഷേമ സമിതി സെക്രട്ടറി ജി.പൊന്നമ്മ, സംസ്ഥാന ശിശുക്ഷേമ സമിതി ട്രഷറര് ആര്.രാജു, രാഷ്ട്രീയ പാര്ട്ടി പ്രതിനിധികള് തുടങ്ങിയവര് പങ്കെടുക്കും.
