കൊച്ചി: വയനാട്ടിലെ മുട്ടിലില് നിന്നും മരം മുറിച്ച് കടത്തിയ വിവാദത്തില് എന്ഫോഴ്സ്മെന്റ് ഡയറക്ടറേറ്റ് അന്വേഷണം. പട്ടയ ഭുമിയില് നിന്ന് മരം മുറിച്ച് കടത്തിയെന്ന കേസില് പൊലീസിന്റെയും വനംവകുപ്പിന്റെയും അന്വേഷണത്തിന് പുറമെയാണ് എന്ഫോഴ്സ്മെന്റ് ഡയറക്ടറേറ്റ് വിഷയത്തില് ഇടപെടുന്നത്.
സംഭവത്തില് മരം കടത്ത് മാഫിയയും ഉദ്യോഗസ്ഥരുമായി കള്ളപ്പണ ഇടപാട് നടന്നിട്ടുണ്ടോ എന്നാണ് അടിസ്ഥാനത്തിലാണ് ഇഡി പരിശോധിക്കുക. സംഭവത്തില് കോഴിക്കോട് സബ് സോണല് ഉദ്യോഗസ്ഥര് വിവരശേഖരണം തുടങ്ങിയെന്നാണ് 10/06/21 വ്യാഴാഴ്ച പുറത്തു വരുന്ന റിപ്പോര്ട്ടുകള്.
ആരോപണവിധേയരായ വനം റവന്യൂ ഉദ്യോഗസ്ഥരുടെ മുന്കാല സാമ്പത്തിക ഇടപാടുകള് ഉള്പ്പെടെ അന്വേഷിക്കാനാണ് ഇഡി നീക്കം. ഉദ്യോഗസ്ഥരുടെ പശ്ചാത്തലത്തിന് പുറമെ ബാങ്ക് ഇടപാടുകളും അടുത്തിടെയുണ്ടായ ഭൂമി രജിസ്ട്രേഷനും അന്വേഷണപരിധിയില് വരും.
മുട്ടില് സംഭവത്തില് വന് സാമ്പത്തിക ഇടപാട് നടന്നിട്ടുണ്ടെന്നാണ് വിലയിരുത്തല്, ഇടപാടുറപ്പിക്കുന്നതില് കൂടിയ അളവില് കള്ളപ്പണം കൈമാറിയിട്ടുണ്ടെന്നും ഇഡി കണക്കാക്കുന്നു.
