ഗുരുവായൂർ : 11- 12 -2020, വെള്ളിയാഴ്ച നടന്ന കോവിഡ് പരിശോധനയെ തുടർന്ന് ക്ഷേത്രം ഭക്തർക്കായി അടച്ചിട്ടു . ഗുരുവായൂർ ദേവസ്വത്തിലെ 153 ജീവനക്കാരിൽ നടത്തിയ ആൻറിജൻ പരിശോധനയിൽ 22 പേരുടെ കോവിഡ് പരിശോധന പോസിറ്റീവായി. .ഇതോടെ ദേവസ്വത്തിൽ കോവിഡ് രോഗികളുടെ എണ്ണം 46 ആയി. ഈ സാഹചര്യത്തിലാണ് ക്ഷേത്രത്തിൻറെ പരിസരം കണ്ടെയ്ൻമെന്റ് സോണായി പ്രഖ്യാപിച്ച് ക്ഷേത്രം അടച്ചിട്ടത്. പൂജകളും ചടങ്ങുകളും മുടക്കമില്ലാതെ നടക്കും. ജീവനക്കാർക്ക് വേണ്ടിയുള്ള കോവിഡ് പരിശോധന ശനിയാഴ്ചയും തുടരും .
ക്ഷേത്രം മേൽശാന്തിയ്ക്ക് കോവിഡ് സ്ഥിരീകരിച്ചുവെന്നും അതുമൂലം ക്ഷേത്രം അടച്ചിട്ടിരിക്കുകയാണെന്നും സാമൂഹ്യ മാധ്യമങ്ങളിൽ പ്രചരിക്കുന്ന വാർത്ത അടിസ്ഥാനരഹിതമാണ്. ഇത്തരം വ്യാജ പ്രചരണം നടത്തുന്നവർക്കെതിരെ പരാതി നൽകുമെന്ന് ദേവസ്വം ചെയർമാൻ അഡ്വക്കേറ്റ് കെ ബി മോഹൻ ദാസ്, അഡ്മിനിസ്ട്രേറ്റർ ബ്രിജ കുമാരി എന്നിവർ അറിയിച്ചു.
