ന്യൂഡല്‍ഹി ഇന്ത്യക്കും ഇന്ത്യക്കാര്‍ക്കും മതേതരത്വവും സൗഹാര്‍ദ്ദവും രാഷ്ട്രീയ ഫാഷന്‍ അല്ല, മറിച്ചു് വിട്ടുവീഴ്ച ഇല്ലാത്ത അഭിനിവേശം ആണെന്നും കേന്ദ്ര ന്യൂനപക്ഷകാര്യ മന്ത്രി മുഖ്താര്‍ അബ്ബാസ് നഖ്വി. എല്ലാവരെയും ഉള്‍ക്കൊള്ളുന്ന ഈ സംസ്‌കാരവും പ്രതിബദ്ധതയും രാജ്യത്തെ നാനാത്വത്തിലെ ഏകത്വത്തിന്റെ ചരടില്‍ ഒന്നിപ്പിക്കുന്നു.
ന്യൂനപക്ഷങ്ങള്‍ ഉള്‍പ്പെടെ രാജ്യത്തെഎല്ലാ പൗരന്മാരുടെയും ഭരണഘടനാപരവും സാമൂഹികവും മതപരവുമായ അവകാശങ്ങള്‍ ഇന്ത്യയുടെ ഭരണഘടനാപരവും ധാര്‍മികവുമായ ഉറപ്പാണ്-മാധ്യമ പ്രവര്‍ത്തകരോട് സംസാരിക്കവേ അദ്ദേഹം പറഞ്ഞു.
ഒരു സാഹചര്യത്തിലും നമ്മുടെ നാനാത്വത്തിലെ ഏകത്വത്തിന്റെ കരുത്ത് ദുര്‍ബലപ്പെടുന്നില്ല എന്ന് ഉറപ്പു വരുത്തണം. വ്യാജ വിവരങ്ങള്‍ പ്രചരിപ്പിക്കുന്ന ഗൂഡാലോചനയില്‍ ഇപ്പോഴും സജീവമായ അത്തരം നിഷേധാത്മക ശക്തികളെക്കുറിച്ച് ജാഗ്രത തുടരണം. അവരുടെ ദുരുദ്ദേശ്യപരമായ കുപ്രചരണ പരിപാടികള്‍ക്കെതിരേ നാം കൂട്ടായി പ്രവര്‍ത്തിക്കേണ്ടത് ആവശ്യമാണ്.
വ്യാജവിവരങ്ങള്‍ പരത്തുക എന്ന ലക്ഷ്യത്തോടെയുള്ള ഏതുതരം വ്യാജവാര്‍ത്തയോടും ഗൂഢാലോചനകളോടും ജാഗ്രത പാലിക്കണം എന്ന് ശ്രീ. നഖ്വി പറഞ്ഞു. രാജ്യത്തെ മുഴുവന്‍ പൗരരുടെയും സുരക്ഷക്കും നന്മക്കും വേണ്ടിയാണ് അധികൃതര്‍ പ്രവര്‍ത്തിച്ചുകൊണ്ടിരിക്കുന്നത്. അത്തരം ഊഹാപോഹങ്ങളും ഗൂഢാലോചനകളും കൊറോണയ്ക്ക് എതിരായ പോരാട്ടം ദുര്‍ബലപ്പെടുത്തുക എന്ന നീച ലക്ഷ്യത്തോടെയാണ്. ഏതു തരത്തിലുള്ള ഊഹങ്ങളും കുപ്രചരണങ്ങളും ഗൂഢാലോചനയും പരാജയപ്പെടുത്തി കൊറോണ വിരുദ്ധ പോരാട്ടം വിജയിപ്പിക്കാന്‍ നാം ഒന്നിച്ചു നില്‍ക്കുക തന്നെ വേണം. പ്രധാനമന്ത്രി ശ്രീ നരേന്ദ്രമോദിയുടെ നേതൃത്വത്തിനു കീഴില്‍, ജാതിയുടെയും മതത്തിന്റെയും പ്രാദേശികതയുടെയും എല്ലാ അതിര്‍ വരമ്പുകളും മറികടന്ന് രാജ്യം ഒന്നാകെ കൊറോണ വിരുദ്ധ പോരാട്ടത്തില്‍ ഒന്നിച്ചിരിക്കുന്നു.
റമദാന്‍ കാലത്ത് വിശ്വാസികള്‍ വീടിനുള്ളില്‍ കഴിയും
ഏപ്രില്‍-24ന് ആരംഭിക്കുന്ന വിശുദ്ധ റമദാന്‍ മാസത്തിലെ പ്രാര്‍ത്ഥനകളും മറ്റ് മതപരമായ അനുഷ്ഠാനങ്ങളും വീടുകള്‍ക്കുള്ളില്‍ത്തന്നെ നിര്‍വഹിക്കും എന്ന് മുഴുവന്‍ മുസ്‌ലിം സമുദായ നേതാക്കളും ഇമാമുമാരും സാമൂഹിക സംഘടനകളും മുസ്‌ലിം സംഘടനകളും കൂട്ടായ തീരുമാനമെടുത്തതായി ശ്രീ നഖ്വി പറഞ്ഞു.
രാജ്യത്തെ 30-ല്‍പ്പരം സംസ്ഥാന വഖഫ് ബോര്‍ഡുകളും മുസ്‌ലിം സമുദായ സംഘടനകളും സാമൂഹിക സംഘടകളുമായി ഏകോപിച്ച് വിശുദ്ധ റമദാനില്‍ ലോക് ഡൗണ്‍ ചട്ടങ്ങളും സാമൂഹിക അകലം പാലിക്കല്‍ മാനദണ്ഡങ്ങളും സത്യസന്ധമായി നടക്കുന്നുവെന്ന് ഉറപ്പു വരുത്താന്‍ ശ്രമം തുടങ്ങിയതായി ശ്ര നഖ്വി പറഞ്ഞു.രാജ്യം ഒന്നടങ്കം കൊവിഡ് പകര്‍ച്ചവ്യാധിക്ക് എതിരായ പോരാട്ടത്തിലാണ്.
വിശുദ്ധ റമദാനില്‍ ലോക് ഡൗണ്‍, സാമൂഹിക അകലം പാലിക്കല്‍ നടപടികള്‍ ഉറപ്പു വരുത്തണമെന്ന് കഴിഞ്ഞയാഴ്ച ശ്രീ നഖ് വിയുടെ അധ്യക്ഷതയില്‍ സംസ്ഥാന വഖഫ് ബോര്‍ഡുകളുടെ വീഡിയോ കോണ്‍ഫറന്‍സില്‍ തീരുമാനമെടുത്തിരുന്നു.
