തിരുവനന്തപുരം ജനുവരി 17: ആദിവാസി മേഖലകളില് വീടുകളിലെ പ്രസവം ഒഴിവാക്കി ആശുപത്രിയിലാക്കാനായി ‘ഗര്ഭകാല ഗോത്രമന്ദിര’പദ്ധതിയുമായി കേരള സര്ക്കാര്. അമ്മയുടെയും കുഞ്ഞിന്റെയും ജീവന് രക്ഷിക്കാനായി ആരോഗ്യ വകുപ്പ് വിവിധ വകുപ്പുകളുടെ സഹായത്തോടെയാണ് പദ്ധതി ആവിഷ്ക്കരിച്ച് നടപ്പിലാക്കുന്നത്. പദ്ധതിയുടെ ആദ്യഘട്ട ഉദ്ഘാടനം ആരോഗ്യമന്ത്രി കെകെ ശൈലജ ടീച്ചര് വയനാട്ടില് നിര്വ്വഹിച്ചു.
പ്രസവം അടുക്കുന്നതിനോടനുബന്ധിച്ച് കുടുംബത്തോടൊപ്പം താമസിക്കാന് കഴിയുന്ന രീതിയിലാണ് പദ്ധതി വിഭാവനം ചെയ്തിരിക്കുന്നത്. ആശുപത്രി പരിസരത്ത് ഇതിനായി പ്രത്യേക ഗോത്ര മന്ദിരങ്ങളാണ് പണിഞ്ഞിരിക്കുന്നത്. ഡോക്ടര്മാര് ഇവിടെയെത്തി പരിശോധിക്കുകയും അവര്ക്കാവശ്യമുള്ള മരുന്നും ഭക്ഷണവും നല്കുകയും ചെയ്യുന്നു. അതിലൂടെ ആശുപത്രി അന്തരീക്ഷവുമായി അടുക്കാനും ആരോഗ്യപരിപാലനം ലഭ്യമാക്കാനും സാധിക്കുമെന്ന് മന്ത്രി അറിയിച്ചു.
